1 Timoti 4

₁Deo Corimecca marinarra iaza auato inanarrarope arrima narraro: Niza zotode Zeso Cristoza rrehe quenarrarideni motapa rrehenirrirideni tomirrirezape Deocca parrissehe inebomananitoui. Mamaizadedeni attidenizana iboraqquiri nauitoui. Naraha narraro mamaizadedenicca marinarrape Tocorime-Taminecca zozosse tocorimedenicca marinarra. ₂Arra mamaizadedenipa poccadeni marinarra pina parrissassa naraha maiza maiza quenarrari. Poccadeni uaidireherrine pouadeni bodideni ccaracossarize-manarrari. ₃Arrina mamaizadedenicca marinarrape: —Carricarripe poni −quequenanarrari. —Rrirripa naco motapa oppina taui, tirripemana terrerarri −quequenanarrari. Naraha narraro marinarrape parrissa rrerani, uaidira tani. Zamatapa, bani bazimapa Deo inauatorizarrari. Zeso Cristoza rrehe inarrarope Deocca parrissehe nauatoqquiri inarraro. Nazapa iaza rrirripa oppina tauicca noueraui. Deoza ettipe: —Rrehe, peperri Abi Deo, ticca danirri irripauiuarrine bica taui −inezape bazima irripani bica tani. ₄Deocca nauatonirripa bazima bica taui. Pouarrine nauatorizaui ettarro-rrarana. Deo iaza inanazapa manaco Pouaza: —Rrehe, ticca danirri iaza bica taui −inana. —Rripera onani, oppina taui −inerrerana. ₅Pocca danirri zamatapa, bani naco irripauiuarrinepa Deo Pouaza uati inaza Poua Attirrine icca rrirripa touissozapa irripani bica taui, onarraro.

₆Rrehe Timoti, arri tiaza dozo onarrarocca marinarrape imecotedeniza mari mari tarizezape narraro marinarraza teribo ssiuarra teza naqui Zeso Cristocca zozosse bicaui tirranitoui. Zeso Cristo tauimari parrissaccatoui tibodi uauatoma zanapozape Deocca marinarra parrissehecca tiattaporraro tinebo-rrereza naqui ticca rrehenirri denima todacorani nanitoui.

₇Naraha arrirraro namicca uima, touatti ponimacca Deo Attissa nerrerarraro timittezape: —Rrehe parrissa –terrerana. Deo Attissa tinananiuarrinepe Pouatouira tibodi uauato nana, Pouazara ibora tinaniuarrine, onarraro. ₈Arrana madirra tarabaiade damera tazapa poua assire todacora, poua birri todacora, poua isso naco todacora taui. Ccanarrabote zorrode naco parrireuitoui. Narrarossa narraro uima denima bica tarrarope Deoza damera ineza Pouaza icca rrehenirri todacoraniuarrine. Narraroa icca madie arrirraro namiza bica taniuarrine. Niza memeuarri Deoza imadiza naqui icca madie denima bica taniuarrine. ₉Arrirraro uima tiaza dozo onarrarope parrissa. Narraro uima nemaneheza madirra bazima rrehe quenana. —Parrissa rreranitide −quena-rrarana, onarraro. ₁₀Narrarorrine ocasserani eraha nema nehe dameraqquiri ineza izepe irrirraroparri. Abi Deo camitta tarraripa ia tonassiuauabaqquiuiuarrine touini imadirraro. Pouapa madirra bazima Tonassiuauade. Pouaza rrehe quenarrarideni inassiuauabaqquiuitoui, parrissa.

₁₁Rrehe Timoti, arrirraro uima tiaza dozo onarrarope ticca mamari tabaqqui mari ticanabaqquiza: —Arri occa marinarrassa narrarora tinanemanarri! −tana, onarraro. ₁₂Naraha madirra attideni tiaza: —Zabisso tirrani. Ssamo tinani. Tettiza iboraqquiri inaniuarrinequi? −quenazapa ticappine-rrerarri. Attideniza naqui rrehe terrerana, onarraro. Manaco ticca madiera denima bica tinaneza Zeso Cristoza rrehe quenarrarideni qqui toquenazapa pina ticca madiessa inanemananitoui. Uima bicanira uati uati tinezape pouadeni naco uima bicani uatide tocauatterauiuarrine. Madirra bazimaza teti cauanari canezape pouadeni naco touati uanehe tocauatterauiuarrine. Deoza ticca rrehenirri dacorani qqui toquenazapa poccadeni rrehenirri todacoraniuarrine. Uimasiri tinane-rreraniuarrine tia cacauade nauato tinezape pouadeni naco pouadeni cacauade tocauatterauiuarrine. ₁₃Tiauarri bacco onerreraccazama ticca mamari tabaqqui titinequeriqquibaqqui naza pouadeniza Deo Atti ua ua tizanapona. Deo Attiza iboraqquiri nauiuarrine pouadeni tinauatizebaqquiza mari ticanabaqquiuissa tarro, onarraro. ₁₄Deo Atti maride nauato tinaniuarrine Deo pocca nauatoue tiaza da inarrarope teti rrima terrerana. Narrarope Zesoza rrehe quenarrarideni cacauadedeni titezerremacca uima tiaza ecomeremanade. Pouadeni zepeza titatiza bara quenaza Deoza uatide toquerrenazapa tiaza inanarrarode. Narraro Deocca danirri ticarrirrarope tinebo terrerana, onarraro.

₁₅Rrehe Timoti, arrirraro uimassa tinananiuarrine damera tinarri. Nema tezape Deoza tizepe irrie tobicazanapozape narraro bazima qqui toquenauiuarrine. ₁₆Ticca madie tecauanissa tarri. Deo Atti naqui mari tanissa tarri. Nema tizanapozape tia, ticca mamari tabaqquima Deorrine ticassiuaueraniuarrine, onarraro.