1 Timoti 5

₁Timoti, tetti bica teza ticca mamari tabaqqui mari ticanabaqquina. Rradauideni uima carrimanazapa pouadeniza rroua terrerana. Pina ticca abi noppine ticappinarrarossa teza mouaraza pouadeniza uati tinanissa tarri. Zabissodeniza naqui pina timecoteza uati tinarrarossa teza mouaraza pouadeniza uati tinarri. ₂Rradanideni mari ticanabaqquiza naqui pina ticca ami mari ticanarrarossa teza mouaraza mari ticanabaqquirri. Zouatodeniza naqui pina timecoteza uati tinarrarossa teza mouaraza ponideniza uati tinarri. Ponideniza naqui uima tinana-rreraniuarrinepe tia tecauanissa tarri, onarraro.

₃Rrehe Timoti, amonerre maqquirini zoqquerrari tobaccopero birrinideni acco ticanabaqquina, onarraro. ₄Naraha amonerre tobaccopero bedideni animana, rrinodideni animana nazapa pouadenina taide imenideni, midinideni cacauade tocauatterana. Arrina, ponipe taide poni bedi, poni rrinodideni naco baziraqquiri naza ecauabaqquiporrarirrine. Nema inanemananipe bica tani. Deo naco pouadeniza uatize taui. ₅Amonerre tobaccopero tocarremanarrarodeni parrissa ponideni accode cappiremanezape ponideni bodini: —Deo oua acco canauitoui −quequenanarraro. Zome, ssiuarra Deoza uati uati zazanapomana narraro. ₆Naraha amonerre tobaccopero tocarremanarraro motadenipe Deo rrirehe madimanarraro. Ponidenipe namicca uima toui, arri ponideni touini quenanicca touira madirizemanezape ponidenicca madiepe pina uatiarrarossa narraro. Arri Deocca camittehe rriquerreranicca cappiremanarraro. ₇Rrehe Timoti, ticca mamari tabaqqui tocauatterauiuarrine narraro uima mari ticanabaqquina. Poccadeni madirra amonerre tobaccopero tocarrarraro cacauade tocauatterazapa madirra ouaha attideni pouadeniza: —A, Deocca madirraraha poccadeni madirra amonerre tobaccopero cacauade nacasseraqquiri naui −quena-rrarauiuarrine. ₈Naraha madirra poua pocca madirra cacauade nacassera tazapa bica terrerani. Arra pocca ozaza madimanarrarideni naco ecauabaqquiuiuarrine nacassera tazapa pocca rrehenirri pina nouerarrarossa narraro. Pocca uima uaidira tani, pina Zesoza rrehe narrararraricca uimassa naraha denima uaidira tani, onarraro.

₉Nazama Zesoza titiqueriqquimana narrarodeni amonerre Zesoza rrehe quenarraro amonerre tobaccoperodeni acco acco titicanariza-baqquimana naniuarrinepe oninideni dozo tiquenarri. Nazama uarrano 60 carrimanarraro, denima uarrano carrimanarraro narrarodenira oninideni dozo tiquenarri. Naraha ponidenicca uarrano 60 bacco terrerarrarope oninideni dozo tiquenerrerarri. Nazama oninideni dozo tiquenaniuarrinepe ponidenicca madie arrima nanina bica tani: Amonerre taide ponicca maqqui zoqque-rraraccazama narrarizara madinissa taporraro. ₁₀Poni zapani irrirrarope uima bicani inanarizani madirra bazimaza auato tarraro. Pina ponicca erredeni inanapiuissa tarrari, pina poniza madirra bacco quenaza naco itapabaqquiuirrine nanarrorapo narraro. Zesoza rrehe quenarrarideni acco canade nacassa tarraro, amorideni ssauade naqui ibora tarraro. Madirra nanarrizo toquerrenarrarideni naco acco acco ihicanabaqqui narrari. Uima bicaniza zapani irrizanaponirrine damera tarraro. Narrarossa narrarora oninideni dozo tiquenarri, onarraro.

₁₁Naraha amonerre ponidenicca uarrano arramani pina 60 bacco tarrararaha amonerre tobaccoperope oninideni dozo tiquena terrerarri. Narrarodenipe maqquiderre ouaha carrimanapomaniuarrine touini quenezape Cristoza zapanideni irrimananiuarrine nebomananitoui. ₁₂Nema quenarrarodenipe taide attinideni: —Rrehe, Cristozara ozepe irriniuarrine −quenaporaha zotodepe ponideni attinidenissa inanemana-rrerarraro. Nezape ponidenirrine ponideniza uima ssonarirraro. ₁₃Ponidenipe zapanideni irriniuarrine touibomaneza oza onihiuarrira qquide rrauirizarridede rarraro. Naraha narraro uimaha orrari-rrerani. Uimarinideni onihipe uarrirriraza uima ponimacca uati uati nanarizemana narraro. Ponidenipe madirra ouahadenicca uimaza ssonacossemanarraro. Uima bica terreranicca naqui uati toqquimarridede rarraro. ₁₄Narraro noppineni ouattipe: Amonerre zouato amonerre tobaccopero denipe maqquiderre carrimanapomaniuarrine bica tani. Erredeni naco carrimanapomaniuarrine bica tani. Ponidenicca oza naqui ecauemananiuarrine bica tani. Ponidenicca madie bica tezape iaza nacassaqquiri narraridenipa Zeso Cristoza iquerrenarrarodeniza uima inassonarimananiuarrine ssamo tani. ₁₅Nema onarrarope amonerre tobaccopero motadenipe Zeso Cristoza rrehe quenaporaha nebomaneza Tocorime-Taminezana toquerrenarraro.

₁₆Rrehe, nazama amonerre Zeso Cristoza rrehe nezape ponicca madirra amonerre tobaccopero deni acco icananiuarrinepe bica tani. Pina poni midini amonerre tobaccoperoza, imeni amonerre tobaccopero, onihideni amonerre tobaccopero, naqui acco icanabaqquiniuarrine bica tani. Nema nezape Zeso Cristoza quequeriqquimana narrarideni ponideni acco canade zepedeni irrimana-rrarauiuarrine. Naraha amonerre tobaccoperodeni bedi cappiremana, bedeni cappiremana, rrinodi cappiremana nezape narrarodenina Zeso Cristoza quequeriqquimana narrarideni acco acco ihicanabaqquimana naniuarrine, onarraro.

₁₇Rrehe Timoti, uima onihi naqui: Zesoza rrehe quenarrarideni cacauadedenipa poccadeni cacacaua tabaqqui ecauabaqqui-manauissa tazapa pouadeniza da da zazanapomana nauiuarrine. Deo Atti maride zepedeni irrimanazapa pouadeniza denima da da zazanapomana nana, onarraro. ₁₈Narrarossa narraro Deo Atti dozo naniza arrima narraro: —Arroi rrizaza tirico nocco catorrauiuarrine boui ttai ttai nazapa boui bono ssoque tacossemana tarrararro. Poua naco pocca ttainarraza rripauiuarrine −napoui nade Deo. Poua Atti onihi dozo naporraro naqui: –Tatarabaiadedenipa poccadeni tarabaia manaconi cacarrimana nana −napoui nade.

₁₉Madirra orraria uitide tiaza uati tazapa: —Zesoza rrehe quenarrarideni cacauadepa uima inanani −nazapa amazati parrissa terrerarri. Naraha madirra pamaha uitide, denima uatimade torrari nauitide tiaza uati toquenazapa: —Parrissa inoccoza qqui inani −quenazana timitteza parrissa tana. ₂₀Nazapa pocca uima nebo-rraraza Deo Atti mamariuarri Zesoza rrehe quenarrarideni bazima mittemanauiuarrine uati ticanarro. Nema tezape tirrine bazima uimasiri inanemananiuarrine noppineni cappinemanauitoui, onarraro. ₂₁Rrehe Timoti, ouatti Deo mittaui, Poua Bedi Zeso Cristo naco mittaui, Deo pocca zozosse tabaqqui memeuarri toquerrenauirrine icatterriza-baqquirrarideni naco mittemanaui. Nezape tiaza arrima onarraro: Occa marinarra tiaza dozo onarrarope nemanehe tecauanissa tarri. Madirra orrariaza teti uana tani orrari nerrerarri. Pina titesse uima carriza naco: —Narraripa otesse, uati ocana-rrarana −terrerarri. Nama naha uati ticanarro. Madirra bazimaza uima tirrine parrirenissa tana, onarraro.

₂₂Madirra Zesoza rrehe quenarrarideni cacauade torrauiuarrine ticatterrizauiuarrinepa taide pocca uima tibodi uatonissa tarri. Amazati pouaza bara taza Deoza uati tina-rreraccana. Arra ticatterrizarrari uimasiri inanezape tiaza naqui uima ssonarirana. Parri, madirra ouahacca uimasiriza ticarrima terrerana, onarraro.

₂₃Tiaza ouatti onihi naqui: Uarrirriraza tizone coma tezape passo ponira ze terrerarri. Nomi tinaniuarrinepe uva pperrene ssicataui naco bazira taha ze tana, onarraro.

₂₄Arrirraro uima teti rrima terrerarri: Madirra motadenipa uimasiri inanemanezape Deocca narrizoueuarri bacco toquena-rraraccazama poccadeni uimasiri ia bazima nauatoqquiri inaponi. Naraha motadenipa auatoraniza uimasiri inanemanezape bazima ssamoqquiri inaccani. Naraha niza Deo Poua baccouarri bazima idomo uezana auatoraniza uima inanemanarrarocca Deorrine auato tanitoui. ₂₅Narrarossa narraroa uima bicanicca naqui auatoniza inanemanezape bazima qqui toquenaui. Naraha uima bicanicca auatoraniza inanemanezape nizaranibote narraro naqui Deorrine auato tanitoui.