Zesoza rrehe quenarrarideni cacauade toquerrenauiuarrinepa arrama quenauiuarrine
1Rrehe, uima onihi parrisseheccape arrima narraro: Madirra attipa: —Rrehe, Zesoza rrehe quenarrarideni cacauade orraniuarrine touini onani −nazapa cacauehe bicani touini narrari. 2Nama nazapa Zesoza rrehe quenarrarideni cacauadecca madie arrima nanina bica tani: Pouapa madiuissa tazapa madirra ouaha attidenipa: —Pocca uima uaidira tani −quena-rrarauiuarrine. Pocca amonerre naqui orrarini carriuiuarrine. Uananehema madi-rrarauiuarrine. Nazama uarrirriraza poua bodi uatouissa tana. Uimasiri inana-rreraniuarrine poua cacauade nauato, madide naco nauato tazapa pouaza madirra ouaha attidenipa: —Pouapa bica taui, uima cappiraui −quequenanauiuarrine. Pouaza madirra bacco narronaza pouaza zamatapa da inauiuarrine, pocca ozaza uadauiuarrine naco bodi nanarrorapo nana. Deo Atti maride naco nauato tana. 3Zeze coma tanicca zerride rarrarana. Poua tesse naco inarrizo-rrarana. Rrouauera taza rrone taha madiuiuarrine. Ziniro uemani touini, tozepetarri uemaui toui damera tarrarana. 4Pouapa pocca ozacca madirra cacauade nauato tana. Poua attiza pocca erredenideni naco iboraqquiri nauiuarrine. Pocca erredenidenipa poua noppine cappinaqquiri naza madimanauissa tauiuarrine. 5Naraha pocca ozacca madirra cacauade ssamo tazapa Deocca madirra cacauade nauato taco? Ssamo taui. 6Zesoza rrehe quenarrarideni cacauade torrauiuarrinepa madirra Zesoza rrehe zatipa poua. Nama nazapa poua atti: —Ouana deni orrani −narana. Nama nazapa manaco Deopa inarrizorana. Pina maittaccazama Deoza Tocorime-Tamine attipa: —Ouana deni orrarraro, tiape arrimani tirrani −naporrarissa narrarauiuarrine. 7Nazapa Zesoza rrehe quenarrarideni cacauade torrauiuarrinepa poua tauimari toccanissa tezape Zesoza rrehe quena-rrararrarideni attidenipa: —Rrehe, pouapa madirra bicaui, uima cappiraui −quenauiuarrine. Naraha pocca madie nema nerrerezape rrehe quena-rrararrarideni attidenipa: —A, pouapa Zesoza rrehe quenarrarideni cacauaderaha pocca uima uaidira tani –quenauitoui. Nazama pouarrine pocca uima nema nezape pouapa pina Tocorime-Taminecca maizeheza damera tarrarissa narrari.
Zesoza rrehe quenarrarideni cacauade birri accodedeni toquerrenauiuarrinepa arrama quenauiuarrine
8Rrehe, Zesoza rrehe quenarrarideni cacauade birri accodedeni naco madirra bicaqquiri narrarina ticatterrizabaqquina. Madirra attideni pouadeniza: —Bicaqquiri naui, madimanauissa taui −quequenanazapa pouadeni attiza naco iboraqquiri nauiuarrine. Pouadenipa maizeraqquiri nauiuarrine, attideni bica taniccara uati uati toquenauiuarrine. Zeze coma tanicca zerridede rarrarana. Ziniro uemani touini dameraqquiri narrarana, maizeheza ziniro denima carrimanauiuarrine touini quena-rrarana. 9Pouadeni bodi uissoqquiri naza Deocca parrisseheza parrissa quenauissa tana. Narraro parrissehecca uimape taide ssamoqquiri inaporaha rridapanana Deorrine auato inanarizarraro. 10Naraha madirra ticatterrizabaqqui-rraraccazama pouadeni tinoccoza-baqquiporro. —Nerrecorrarina Zesoza rrehe quenarrarideni cacauade birri accode toquerrenauiuarrine parrireui? −tana. Bicaqquiri nazapa paparra, Zesoza rrehe quenarrarideni cacauade birri accode toquerrenauiuarrine bica tani. 11Narrarossa narraro bedimenideni naqui bicaqquiri naniuarrine. Nezape madirra ouahadeni ponideniza: —Rrehe, bicaqquiri nani, madimananissa tani −quequenanauiuarrine. Uima ponimacca naqui uati uati nanarizemana nerreraniuarrine. Bodinideni uato-mananissa tehe madimanana. Ponideni attini naqui maizeraqquiri nani, bazima inaparriremananissa tanipe bica tani. 12Nazama Zesoza rrehe quenarrarideni cacauade birri accodedeni naco poccadeni amonerre ohorrariri nanina bica tani. Nezape pouadeniza uananehe tauimarini noueraniuarrine. Poccadeni erredenideni, poccadeni ozacca cacauade nauatoqquiri nana. 13Nazapa Zesoza rrehe quenarrarideni cacauade birri accodedeni tarabaia quenauissa tazapa madirra mota attidenipa: —Pouadenirrine bica tani −quenauiuarrine. Nama quenazapa madirrapa pouadeni attideniza iboraqquiri nauiuarrine. Nazama poccadeni tarabaia toccanissa tezape poccadeni rrehenirri Zeso Cristoza todacorani naniuarrine, cappinerehe naqui carrimanauiuarrine.
Deorrine Zeso Cristo tauimari parrissehecca iaza auato tarraro
14Rrehe Timoti, nani tia qquide occabote nani oneraha taidepe ouattira tiaza dozo onaporraro. 15Nazama tiauarri occaniuarrine denima onarrozape occa uimara qqui tineza arra Zesoza rrehe quenarrarideni madimanauissa tauiuarrinecca uima nauato tinaniuarrine. Arri ia Deocca madirra iquerrenarrarope Deo camitta tarrariza ihiqueriqqui narraro. Deo pocca parrissehe iaza inanarrarope rrouizo terreraniuarrine ecauanissa tarraro. Nezape madirra bazima Deocca parrisseheza mari icanabaqquiuissa tarrari. 16Rrehe, pocca parrissehepe bica tani, deni torrani, inarraro. Taidepe iaza auatora taporaha rridapanana iaza auato tarraro. Narrarope Zeso Cristo tauimariparri. Narraroza parrissa inarraro. Pina rriri rriri inarrarossa narraro:
Pouapa assire torrazapa pina madirra iassa naha torrarrari.
Iaza Deo Corime Attipa: —Deo Bedipa Imehi Attiza ibora tarrari. Pouapa Imehiza pocca uima inaparrirenissa tarraro −narrari.
Deocca zozosse tabaqqui memeuarricca naco Deo Bedi qqui toquenaui.
Narrari tauimari madirra bazimaza ecomerarizarraro.
Nazama arrirraro zamaza madimanarrarideni poua tauimariza parrissa quenarrari.
Poua naco Deorrine memeuarri toccamacossanirrari.
