1 Timoti 2

₁Timoti, Zesoza rrehe quenarrarideni tezerre Deoza uati tiquenezape arrima tiquenana, onarraro. Taidepe madirra bazimatoui Deoza uati uati titiquena narri. Pouadeni cappiremanauicca carrimanauiuarrine, Deo pouadeni ecauabaqquiuiuarrine, pouadeni acco icanabaqquiuiuarrine naco uati uati tiquenarri. Pouaza uati tiqueneza naqui: —Rrehe Abi Deo, Tirrine bica tani −titiquena narri, onarraro. ₂Zama bazimacca taminedenitoui naqui Deoza uati uati tiquenarri. Arra tamine deni toquerrenarraridenitoui, tamine ouahadenitoui naqui Deoza uati uati tiquenarri. Poccadeni cacauehe bica taniccara inanemanezape icca zamaza uima oppina tanicca noueraniuarrine. Ia naqui mouaraza imadiza Deoza iboraqquiri inezape madirra ouahadeni icca madie bica tani qqui toquenauiuarrine. ₃Deoza uati uati inanipe bica tani. Ia Tonassiuauade Deo uatize taui. ₄Pouapa madirra bazima tocassiuauerauiuarrine touini narrari. Pocca parrissehe tocauatterauiuarrine naco touini narrari. ₅Deopa orrarirrari. Pina pouassa narrari ouaha noueraui. Icca uima Pouaza tobicaniuarrinepe icca uima tonanabicade madirra orraria aniui. Madirra ouaha pina pouassa narrari noueraui. Narraria arra Zeso Cristoparra. ₆Zeso Cristopa zoqqueuiuarrine poua ccaccoraza icca uimasiri manaconi zoqquerrari. Narraro uima madirra bazima mittarizemanauiuarrine Deorrine auato inaneza parrissa torrarraro, arri Deorrine narroraponicca uada bacco teza, onarraro. ₇Narrarope Zeso poua tauimari ouacomera-rizaniuarrine otoui uaua nazapa pouarrine pocca zozosse orrarraro. Zodeo querrena-rrararrarideni poua tauimariza parrissa quenauiuarrine, pocca parrisseheza naco rrehe quenauiuarrine mari ocanarizabaqquiuiuarrine oua zosse tarrari. Parrissehera dozo onarraro, omaize-rrerani.

₈Rrehe, nazama maqquiderredeniza ouatti arrima onani: Madirra Deoza totoqueriqquimana nauiuarri toqueriqquizapa Deoza uati uati totoquena nana, onarraro. Deotouira quenarrari bodideni naco uissoqquiri narrarina pouadeni zepe memeuarri Deoza da tamacossemanana, onarraro. Uadie rrirehe Deoza uati uati totoquena nauiuarrine, madirra ouaha tezerre naco arrauarri atti arrauarri atti quena-rrarazana Deoza uati uati totoquena nana, onarraro. ₉Nazama amonerredeniza naqui ouatti dozo onarraro. Ponidenicca etero oro tozimemananicca uimape arrima narraro: Etero bica tanicca uezemananipe bica tani. Naraha etero uatini ccara taniccape uezemana-rrerana. Etero onihi naqui pina ponideni imani auato tanicca uezemana-rrerana. Ponideni tatini conani naqui icouemana-rrerana. Tomattocca zibehi tanicca oro, uatini ccara tanicca perola naqui mattonideni uanezape nacassera onani. Bicabote touini queneza ponideni bodinipe: —Oua qqui toquenaza: “Amonerre bicani” quenauiuarrine −quenaraha narrarope Deoza bica terrerani. ₁₀Amonerre attinidenipe: —Rrehe, ouape Deocca orrani −quenarrarodeni Deo Pouaza bicaqquiri naniuarrinepe arrima quenana: Uima bicanira inanarizemanezana bica tani. ₁₁Rrehe, amonerredeni Deo Atti mittemananiuarrinepe didi tiqueneza titauaribobo canana. Deo Atti maride attideniza naqui iboraqquiri nana, onarraro. ₁₂Ouatti onihi naqui: Amonerrepe madirra bazima queriqquimanauiza maride torra-rrerana, onarraro. Amonerrepe maqquiderredeniza deni torra-rrerana. Poni! Pina tauaribo caneza Deo Atti mittanissa taniuarrine, onarraro. ₁₃Ouatti nema onarrarope Deopa Adao inauatoporrari. Zotodena Eba inauatorraro. ₁₄Adaopa Tocorime-Taminecca maizeheza torrapo-rrararrari. Ebana pocca maizeheza torraporraro. Ponipe Deo Attiza ibora terrerezape uimasiri inanarraro. ₁₅Nema narraroa amonerredeni erredeniza tocassonemanezape ocasserani ihinauanemana neraha Deopa amonerredeni inassiuauabaqquinitoui. Rrehe, ponideni tocassiuaueraniuarrinepe Deoza rrehe zanapomanana. Madirra bazimaza uatinideni uanaqquiri nana. Uima rrirehe Deoza madimananissa tana. Mouaraza uima bicanira ihinanemana nana. Nema quenezape tocassiuaueranitoui, onarraro.