Da naqquinarra imecotedeniza
1Rridapanape imecotedeni Deoza rrehe quenarrari acco ticanabaqqui-manauiuarrine da naqquinarra tauimarini tiadeniza uati onana. Pina arra zama Carasiauarri Deoza quequeriqquimana narrarideniza uati onarizaporrarossa tinanemananiuarrine bica tani. 2Narraroa arri semana torrapomanicca uada taidecca domico uarrirriraza da da taqquimananiuarrine titicarrimana narraro arobeni motape tetecauarizemana narri, ticcadeni danirri touapiniuarrine. Ticcadeni tarabaia manaconi bazira tezape arobeni bazira tehe tecauemanarri. Ticcadeni tarabaia manaconi motarezape arobeni motarehe tecauemanarri. Ticcadeni ziniro da taqquimanapozape narrorapoza nani bacco oneza odiniuarrine. Nezape da naqquide tinarromane-rreraniuarrine. 3Titiqueriqqui nanicca imecotedeni naco ticatterriza-baqquimanana, nani bacco onezape oza panani Zerozareuarri zosse onabaqquiuiuarrine. Ticcadeni da naqquinarra Zerozareuarri iaqquemananiuarrine uima teppe naqui pouadeniza da oneza iaqquemananiuarrine. Narraro uima teppeza Zerozarecca imecotedeni nauatoqquiri nauiuarrine. 4Oua naqui naniuarri occanitide, oqquerreranitide. Tiadenina parri. —Rrehe ticcaniuarrine bica tani −tiquenezape occanitoui. Pouadeni naco ouaza rraui torrauitoui.
Paoro pocca bobode narroraporrari
5Niza occa bobode oqquezape zama Masedoniauarria occarizaponitoui. Masedoniaza qqui onarizehe rriquezape nani Corintouarri bacco onanitoui. 6Naniuarri bacco onezape tiadeniza bazira tehe omadiccanitide. Denima omadiccana onezape zazarrade onarricanitide. Zazarrade onarriquezape zama onihiuarri occaniuarrine obirri acco ticanemanana, onarraro. 7Pina tiadeni qqui, oqqueqquima naniuarrinepe nacassera onani. Tiadeniza omadi naccaniuarrinena touini onani. Ia Zozossede nacassa tazapa nema onanitoui. 8Naraha arri oza panani Epesoza omadiccani, zodeodenicca errete Pentecosti onarricaccaniuarrine. 9Arriza ia Zozossede Deo pocca zossenirri ozepe irriniuarrine touabanissa tarraro. Uima bicani torraniuarrine nauato onani: Madirra Deoza toquerrenana canauitoui. Arrauarricca madirra mota uapi taha ouaza nacasseraqquiri naraha motana nacassaqquiri narrari.
10Nazama Timoti nauiuarri bacco tazapa pouaza tetideni uanaqquiri nana, naui uatizeuiuarrine. Pouapa ia Zozossede Deo pocca zossenirriza zepe irrirrari pina ouassa narrari. 11Timecotedeni mota naco pouaza: —Ponima ticcarronarraro −quena-rrarana. Pina acco ticanemanana, ouaza bacco narronauissa tauiuarrine. Ouape arriza ouimecotedeni tezerre pouatoui imadiccani.
12Aporo naco imecotedeni tezerre tiadeni qquide naui toccauiuarrine uatide damera oneraha toccade nacassera taui, narrora-rraraccaza. Niza narrorazana tiadeni qquide toccauitoui.
Paorocca uima rricanicca
13Tetideni uatoza rraui tirrarizanissa tarri. Zeso Cristocca uimaza damamera tineza pocca uimazara rrehe tizanapomanarri. Cappineraqquiri tiqueneza Deocca dacorehema dacoco tirrirarri. 14Ticcadeni touati uanehema, uatizehema tizepedeni ihirririzemana narri.
15Ouimecotedeni, Estepanacca uima nauatoqquiri tiquenani. Ticcadeni zama Acaiauarri Zeso Cristo tauimari icassiuaueraniuarrinecca mari ocanabaqquipozape Estepanana pocca madirrama Zeso Cristoza rrehe quenaporraride. Zotodena madirra ouahadeni Zeso Cristoza toquerrenarizarraride. Estepanapa pocca madirrama imecotedeni Zeso Cristoza rrehe quenarrari birrideni accode dameraqquiri narraride. 16Nazama tiadenipe Estepanadeni attideniza, arra imecotedeni pina Estepanassa quenarrari attideniza naqui iboraqquiri tiquenana, onarraro. Arra imecotedeni acco icanabaqqui-manarrarideni, arra Deo Atti mamaridedeni, narrarideni bazima attideniza naqui iboraqquiri tiquenana.
17Tiadenipe uarrirri tinarrarorrine oua acco ticanemananiuarrine ssamo tani. Naraha Estepana, Portonato, Acaico quenarrarideni ouauarri bacco quenazapa ouatizerraro. 18Pouadenipa Deo Attiza obodi acco icanemanarrarorrine ouatizerrarode. Tiadeni naqui tiadeni tonauatize-baqquimanarrari. Pouadeniza bicaqquiri tiquenarri. Madirra ouahadeni pina narraridenissa quenarrarideniza naqui tetetizemana narri. —Pouadenipa bicaqquiri naui −titiquena nana.
Deoza quequeriqquimana narrarideni nirra narizemanarrari
19Nazama arra zama Asiauarricca Deoza quequeriqquimana nauiuarricca bazimapa tiadeniza nirra quenarrari. Aquira pocca amonerre Prisira tazarrani, poccadeni ozaza quequeriqquimana narrarideni naco ia Zozossede Deo onima nirra quenarrari. 20Imecotedeni bazima naco nirra quenarrari. Tiadeni naqui titesse rrehe quenarrarideni tezerre bacco ticanirezape nirra tiquenaza dama, ticauarracossemana titiquena narri, onarraro.
21Arri oua Paoro naqui tiadeniza nirra onarraro. Arrirraro uima rricaniccape oua ozepeza dozo onarraro.
22Ia Zozossede Zeso Cristoza nacasseraqquiri narraridenipa paparra, Deo inarrizobaqquina. Nirra, ia Zozossede Deo ticcanirri! onarraro. 23Rrehe, ia Zozossede Zeso Cristopa tiadeniza pocca biquehe rriquerreranicca inanana, onarraro. 24Zeso Cristocca touati uanehema tiadeni bazimaza ouati uana tani. Parrissa nema nana. Peperri.
