Cristo nauatonirraricca uima
1Ouimecotedeni, tetideni rrima-rreraniuarrine tiadeniza uati omanirraro. Zeso Cristo tauimari icassiuaueraniuarrinecca tiadeniza ouaccoraporrarode. Narraro uimaza rrehe tiquenezape tinebomana nerrerarraroa arrirraroparri. 2Arri icassiuaueraniuarrinecca uimaza damamera tinezape ticassiuarrerarraroparri. Naraha damamera tinerrerezape ponima rrehe tarizemanarraro.
3Arri Zeso Cristo tauimari ouattaporrarocca tiadeni mari ocanabaqquirrarope denima bica tanicca. Narrarope arrima narraro: Cristopa icca uimasiri manaconi zoqquerrari, pina Deo Atti dozo iquenaporrarossa narraro. 4Cristo uatiaza ppa izemanaraha uada 3 nazapa nauatonirraride. Narraro naqui Deo Atti dozo iquenaporraroza nema naporraro. 5Nauatonizapa Pedorozaha auatoniporrari. Naui zotodepa poua uatimadedeni 12 quenarrarideniza auatonipomarrari. 6Naui zotode naco pouaza rrehe quenarrari 500 quenarrari, naraha denima uitiderra, narrarideni bazima queriqquimanauiza auatonipomarrari. Narrarideni motapa arrirraro uima teppe dozode orreza madimanauiparra naccaui. Naraha mota pamadema nahapa rricarizapoui. 7Naui zotode Tiacoza naco auatonipomarrari. Naui zotode naco pocca zozosse tabaqqui bazimaza auatonipomarrari.
8Naui zotode rricariuiccapa ouaza auatonirraride. Ouape pina erredeni poua tossonauicca uada bacco tarraraccaraha tossonaporrarissa onarraro. Ouape Zeso Cristoza rrehe onapo-rrereraha ouaza auatozana pocca orrarrarode. 9Nazama Zeso Cristocca zozosse tabaqqui taideccapa bicaqquiri naraha ouape arrimani orrarrarode. Taidepe Zeso Cristoza toquerrenarrarideni Deo Attiza totoqueriqqui narrarideni ohonarrizobaqqui naccade. Zeso Cristocca zozosse tabaqqui orraniuarrine bica onerrereraha Zeso pouarrinena pocca zozosse orrarrarode. 10Naraha Deopa ouaza bica tarrari. Occa narrizoue peperri inanarrarode. Oua catizezapa pocca zozosse orrarraro. Pocca biquehe naqui ponima ouaza torra-rrerani. Narrarorrinena Pouaza ozepe irrinissa tarraro. Nazama motadenipa arramani zepedeni irrimanarrari. Naraha ouana denima ozepe irrirraro. Arri ozepe irrirrarope orrine rrerani. Deo oua acco canaza ozepe irririzarraro. 11Naraha: —Nerrecorrarina denima zepe irrirrari? −inerrerana. Arri tiadeni mari ocanabaqquirraroa arra Zeso Cristocca zozosse tabaqquideni naco occa marinarrassa narraro tiadeniza mari mari quenarrariparra. Narraroa arri tiadenipe narraroza parrissa tiquenarraroparri.
Rricarraridenipa Deo inauatonibaqquiuitoui
12Naraha icca marinarrape: —Cristopa zoqqueraha Deorrine nauatonirrari −ihinanezape nerrecotoui tiadeni motaha: —Rricarraridenipa nauatonimana-rrarauitoui −titiquena narraro? 13Rridacca nauatonie nouerezape Cristo naco nauatoni-rraranarra. 14Cristo nauatoni-rrarazapa icca marinarra ponima torranitouiraha. Ticcadeni rrehenirri naqui ponima torranitouiraha. 15Parrissa nauatonie nouerezape icca marinarra arri: —Deorrine Cristo nauatonirrari −ihinanarrarope Deoza maizehe inananerre. Parrissa nauatonie nouerezape Cristo nauatoni-rraranarra. 16Arri tettideni: —Rridacca rricarraridenipa nauatonimana-rrarauitoui −titiquena nezape Cristo naco nauatoni-rraranarra. 17Parrissa Cristo nauatoni-rrarazapa ticcadeni rrehenirripe ponima torranerre. Ticcadeni uimasiri naqui tiadeniza nema zanaponerre. 18Rridacca narraro uima parrissa torrezape arra Zeso Cristoza rrehe quenarrari rricaporraridenipa parra amossiuarrariui nanarra. 19Cristo iaza uima bicani inananiuarrine touini imadirraro. Naraha arrirraro namizara uima bicani iaza torrani orrari nezape pina touati nauanaqquiri narraridenissa ineraha iape denima touati nauanaqquiri inanerre.
20Naraha Cristopa parrissa nauatonirrari. Pouapa pina uizarracca zamatapa taidecca bite quenaporrarissa narrari. Cristo taide nauatoniporrarirrine madirra bazima naco zotode nauatonirize-manauitoui. 21Nazama madirra orrariacca uimarrine arrirraro namiza zoqquehe madirraza torrarraro. Madirra orrariacca uimarrine naqui madirra zoqquemanarrarideniza nauatonie torrarraro. 22Adao potemaui iquerrenarrarorrine ihizoqque narraroparri. Cristoza iquerrenarraro naqui izoqqueraha pouarrine imadipomanitoui. 23Naraha iape zotode iquerrenarraro. Cristona taide nauatoniporrari. Niza Cristo ccanipomazapa ia bazima pocca iquerrenarraro inauatonirizanitoui. 24-26Nani zotodepe arrirraro zama rricanicca uima torranitoui. Nazapa cacauehe carrimana, dacorehe carrimana, nauatoue carrimana narrarideni uapima Cristorrine rricarizauitoui. Cristo deni torrazapa poccadeni dacorehe naqui inarricanitoui. Nazapa pouana memeuarricca, namiuarricca bazima zossede torrauitoui. Bazima ecauabaqqui-zanaporraria pocca uadidedeni bazima arramani inanabaqquiuitoui. Poua uauadi rricauicca inarricazapa madirra denima zoqquemana-rrarauitoui. Narrarope zoqquehe rricarraro. Nazapa Cristo pocca Abi Deoza pocca cacauehe da inanitoui. 27Deorrine Cristo deni torrazapa bazima arramani toquerrenarrari. Pina poua amori bacconiuarri toquerrenarrarissa quenarrari. Naraha narraro uima timittemanezape: —Deo naco Cristoza arramani torrarrarico? −tiquenanitiderra. Noueraui. Pouarrinena bazima Cristoza toquerrenarrari. 28Deopa uapima Poua Bedi Cristoza iboraqquiri inanabaqquizapa Cristo naco Imehi Deoza ibora tauitoui. Rrehe, Deorrinepa bazima Cristoza toquerrenarrari. Nazapa Deoza bazima iboraqquiri narrari. Pouana zosse zosse naui orrari narrari.
29Nauatoniecca uima denima uati onana. Arra timecotedeni motapa poccadeni madirra passo dopaniza niniqui rriraha rricarrari onideniza passo dopaniza niniqui carrimanaraha nerrecotoui nama quenarrari? Parrissa rridacca madirra nauatonimana-rrarazapa passo dopaniza niniqui rriraha rricarrarideni naco nauatonimana-rraranarra. Nazapa pouadeni oniza passo dopaniza niniqui carrimanarraripa ponima.
30Ia naqui nerrecotoui oppineheza imadirizarraro? Rridacca nauatonie nouerezape ponima oppinani erizanerre. 31Ouimecotedeni, parrissa uati onarraro. Ouape uada uarrirriraza oppinehe onihi onihi onauanarizarrarorrine ozoqquebote narizarraro. Narrarope parrissa, pina parrissa tiadeni ia Zozossede Zeso Cristoza tiquerreneza ouatizerrarossa narraro. 32Arri Epesoza omadiza naqui ozoqqueniuarrine madirra otoui inacomarizemanarraro, pina zomarri uadi tarrarissa quenaui. Pouadeniza Deo Atti maride damera oneraha poccadeni uadie onauanani manaconi nerrecora ocarrirraro? Rricarrarideni parrissa nauatonimana-rrarazapa ponima maride ocasserani ouarizanerre. Nezape arra madirra ouaha attideni: —Rrari, irripana! Ze inana! Izamassa onihi irriquezape nemarade −quequenanarraridenissa inana.
33Parri, madirra attideni nama nama quequenanarraridenipa tiadeni tocamaizabaqqui-manarana. Arri uima titimittemana narrarope: —Madirra madieri bica tarrararrari titesse torrazapa ticca madie bicani amossi nanitoui −quequenanarrari. 34Tibodideni uatome-mananissa tarri. Ticcadeni uimasiri naqui tinebomanarri. Deoza ssamoqquiri narrarideni tiadeniza animanaui. Narraridenirrine ticomehimana-rreraqui? onarraro.
Essire inauatoninicca uimape arrima narraro
35Tiadeni motape arrima tiquenanitide: —Rricarrarideni nauatonimanauiuarrinepa nerrecoma quenapazarra? Assiredeni naco nerrecoma narrarora carrimanapazarra? −tiquenanitiderra. 36Paparra, tiadenipe ssamoqquiri tiquenarrarorane? Rrari, zamatapa nocco tauimariza tiadeni mari ocanabaqquina. Zamatapa nocco ppa tozarraripa naui namiza rraziraha moro tarrarina assire zati torrarrari. 37Tapatoui inezape ede ppa ppa inarrararrari. Noccona dappo dappo inarrari, moro tauiuarrine. Zamatapa ouaha nocco carririzarrari naco narrarissa narizarrari. 38Nocco assirepa pouara pouara narizarrari, pina Deo Poua nacassa tarrarissa inanarrari. Zamatapa moro tarrari naco Deorrine assire ouaha ouaha carririzarrari. 39Namiza madimanarrari assiredeni naco bazima narrarissa nariza-rraraui. Madirrapa assire ouaha. Bani assire ouaha. Bani eppe carriui assire ouaha. Aba naco assire ouaha narizemanarrari. 40Memeuarricca naco uapima assiredeni carririzemanaui. Arra namiuarricca naco bazima assiredeni carririzemanaui. Arra memeuarriccapa biquenedeni ouaha. Arra namiuarricca naco biquenedeni ouaha narizemanarrari. 41Marri ssiuerrenepa pina abazico ssiuerrenessa narraraui. Abazico ssiuerrene naco amouadeni ssiuerrenedenissa narraraui. Amoua ssiuerrenedeni naco ouaha ouaha narizarrari.
42Nazama ia naqui nema inanitoui. Izoqqueza inauatonizape essire onihi zatira icarrinitoui. Izoqqueza essire ppa izemanarrarope touaidirara tanicca. Naraha inauatonizape essire touaidirarera taniccana torrarraro. 43Etieza essire ppa tozani rrazizape touarrari nazi tehe torra tani. Naraha inauatonizape bicanira torranitoui. Arrirraro namiza imadirrarocca essirepe dacore-rrerani. Naraha inauatonizape essire dacoranitoui. 44Arri essire ppa ppa tozarrarope arrirraro namiza imadirrarocca. Naraha essire nauatonirrarope Deouarri imadiniuarrinecca. Deo madirra assire namiza madiuiuarrine inauatozapa memeza madiuiuarrinecca naco inauatorrari.
45Deo Atti dozo nanizape arrima narraro: —Taidecca madirra Adaopa namiza madiuiuarrine Deorrine camitta tarrari −nani nade Deo Atti dozo naniza. Naraha arra Cristo pouaza: Adao rricariuicca ihinanarraro pouana memeuarri madiuiuarrine parrirerrari. Pouapa camittehe rriquerreranicca da inarraro. 46Essire taideccape memeuarri imadiniuarrinecca rrerani. Essire taideccape namiza imadirrarocca. Zotodeccana memeuarri imadiniuarrinecca. 47Taidecca madirrapa nami nauatorrari, namiza madirrari. Zotodecca madirra memeuarriccapa Cristo. 48Arrirraro namiza essire imadirrarope pina Deorrine namiza madirra inauatoporrarissa inarraro. Niza memeuarripe essire pina memeuarri madirrari Cristossa inanitoui. 49Rridapanape pina madirra nami nauatorrarissa inarraro. Niza zotodena pina Cristo memeuarri madirrarissa inanitoui.
50Ouimecotedeni, tiadeniza uati onana: Arri namiza imadiza ime, emene icarrirrarope Deocca cacaueheuarri torra-rreranitoui. Poua madiuiuarripe touaidirarera tani. Essire touaidirara taniccape naniza madiniuarrine ssamo tani. 51Naraha arrirraro uima tiadeniza uati onaniuarrinepe madirra mittemanapo-rrarauicca. Auatora taporaha rridapana tiadeniza uati onarraro. Madirra ia motape izoqque-rreranitoui. Naraha rricaporrari assiredeni, ia mota izoqque-rrerarraro essire bazima cacarriqquimera-rizanitoui. 52Arrima nanitoui: Essirepe amazati cacarriqquimeranitoui, pina inocco pari pari narrarossa nanitoui. Niza rrorro rricauicca rrori rrori nazapa arri namiza imadirrarocca uima rricanitoui. Nazapa rricaporrarideni nauatonimanauitoui, rricapoma-rrarauiuarrine. Nazapa nauatonimanarrari assiredeni, camittaqquiri inaccarraro essire bazima cacarriqquimeranitoui. 53Arrirraro namicca essire touaidirara taniccape touaidirarera taniccara torranitoui. Essire uatiaha taniccape uatiehera taniccara torranitoui. 54Arri essire touaidirara tanicca rrica, uatiaha tanicca rrica nezape touaidirarera tanicca, uatiehera tanicca torrezape Deo Atti dozo naporraro parrirenissa tanitoui: —Zoqquehepe Deocca dacoreherrine rricarraro, amossi narraro −nani nade. 55Deo Atti dozo nani onihiza naqui: —Nirra Zoqquehe nerrecouarri ticca dacorehe? Nirra Zoqquehe nerrecouarri ticomene? −nani nade Deo Atti dozo naniza. 56Arri zoqquehe comanipe uimasiri. Narrarorrine madirra parri izoqquerinicca narrizoueza toquerrenarrariparra. Deocca zossenirri taideccape madirra uimasiri inanemanani pouadeniza auato inanarraro. 57Nazama ia Zozossede Zeso Cristo pocca dacoreherrine icca uimasiri inanamossiza izoqquezape iaza narrizoue noueranitoui. Nema nezape Deoza etizeza: —Rrehe, peperri. Tirrine bica tani −ihinanarraro.
58Rrehe ouimecotedeni, tiadeniza ouati uana tani. Uima nema nezape dacoco tirrireza nema tizanapomanarri. Ia Zozossede Deo pocca zossenirriza tizepedeni irrimanezape denima, denima tidameremanani narri. Arrirraro uimape nauatoqquiri tiquenani: Ia Zozossede Deoza tizepedeni irrirrarope ponima rrerani. Pouarrine tiadeniza uima bicani torranitoui.
