1 Corintodeniza 14

₁Touati uanehe ticarrimananiuarrine dameraqquiri tiquenarri. Deo Corimecca nauatoue onihi onihitoui naqui dameraqquiri tiquenarri. Pocca nauatoue orrariepe denima bica tarraro. Narrarope arri Deo Corimerrine madirra bodiza Poua Atti auatoza uati iqquimarraro nauatouena —Ouaza torrana −titiquena narri. ₂Arra madirra Deorrine touatti rriza tarraroza uati uati tarraripa Deo Pouazara uatide torrarrari. Iape poua atti imitte-rrerarraro. Deo Corimerrine uima bicani uati uati taraha iaza auatora tani. ₃Naraha madirra ouahapa Deo Atti poua bodiza auatorrarocca uati iqquimezape poua imecotedenicca rrehenirri todacorani narraro, madirra ihinauatizebaqqui narrari, madirra uatideni ihinassonabaqqui narrariparra. ₄Nazama arra touatti rriza tarraroza uati uati totoquena narraridenipa pouadeni motta Deoza poccadeni rrehenirri todacorani narraro. Naraha madirra Deo Atti uati iqquimarize-manazana Deoza quequeriqquimana narraridenicca rrehenirri todacorani narraro.

₅Tiadeni bazima touatti rriza tarraroza uati uati tiquenanipe ouaza bica tani. Naraha Deo Atti uati tiqquimarize-mananina ouaza denima bica tarraro. Narrarona uima deni torranicca. Touatti rriza tarraroza uatidepe arrimani. Naraha timecote touatti rriza tarraroza uati uati taza poua atti uati toqquimade anizapa bica tani. Naui arra Deoza quequeriqquimana narraridenicca rrehenirri todacoraniuarrine. ₆Ouimecotedeni, niza tiadeniuarri oqqueza touatti rriza tarraroza tiadeniza uati uati onezape tiadeni acco cananiuarrinequi? Acco canima-rrerani. Ponimassa nanitoui. Naraha Deo ouaza auato inanarrarocca uati oneza pocca nauatoue tiadeniza uati onezape narrarona tiadeni acco canimanitoui. Poua Atti uati oqquimaza, marinarra bicani tiadeni mari ocanabaqquiza naqui tiadeni acco canimanitoui.

₇Nazama totori naqui camittehe cappireraha mouinipe arrie totorra narraro. Arra madirra tire tire quenarra, tori tori quenarra naza naco mouini rriza tezape arrie mouini imittanissa terrerani. ₈Isso teppeppe naco rrazirecca rrorro moui mittemanazapa bazima rraziretoui domo toccauiuarrineraha rrorro moui rriza tazapa domo tocca-rrarauitoui. ₉Ticcadeni uima naqui narrarossa narraro. Tettideni rriza tarraroza uati uati tiquenezape nerrecoma naza tettideni mittemanauiuarrine? Tettideni mouinipe ponima rrorrodeza totocca narraro. ₁₀Arra madirra zama onihicca, zama onihicca naco bazima attideni carrimanarizarrari. Touatti bazima anirizarrarope ponima rrerani. Pouadeni atti camitterara cacana narrari. ₁₁Naraha madirra ouaza uati uati taza poua atti omitte-rrerezape poua bodipa ouaza: —Arrarraripa zama onihicca madirra −nauitoui. Oua naqui pouaza: —Zama onihicca madirra −onanitoui.

₁₂Nezape timecotedeni tezerre Deo Corimecca nauatoue onihi onihi narizarraro touini tiquenezape Zeso Cristoza quequeriqquimana narrarideni rrehenirrirideni todacorani naniuarrineccara —Ocarrina −titiquena narri, onarraro. Nema nanicca uemani ticarrimananiuarrine dameraqquiri tiquenarri.

₁₃Nazama madirra touatti rriza tarraroza uati uati taraha poua atti tomittani-rrarazapa Deoza uati tana, nani pocca uatinarra poua bodiza auato tazana poua imecotedeniza uati iqquimaniuarrine. ₁₄Oua naqui touatti rriza tarraroza Deoza uatide orrezape ocorimema uati uati oneraha omittani-rrerani. ₁₅Narraro uimape nerrecoma onanani bica tarraro? onarraro. Naraha bica taniuarrinepe Deoza uatide orrezape ocorimema Pouaza uati uati onaniuarrine, omittarraroccama Pouaza uati uati onaniuarrine. Deoza rriri rriri oneza naqui ocorimema Pouaza rriri rriri onaniuarrine, omittarraroccama Pouaza rriri rriri onaniuarrine. ₁₆Tiadeni naqui ticorimedenima touatti rriza tarraroza Deoza tetizemaneza: —Rrehe Abi Deo, Tirrine bica tani −tiqueneraha arra timecotedeni touatti rriza tarraro mittemana-rrararraridenipa tiadenizama Deoza: —Rrehe, bica tani −quenauiuarrine ssamo tani. ₁₇Arri touatti rriza tarraroza Deoza uati uati tiquenani bica teraha narrarozape timecotedenicca rrehenirri todacora-rreranitoui, onarraro. ₁₈Nazama tiadeni motape touatti rriza tarraro ticarrimaneraha tiadenipe arrimani uati tiquenarraro. Ouana denima touatti rriza tarraroza uati uati onarraro. Narrarorrine Deoza: —Rrehe, peperri, bica tani −ohonanarraro. ₁₉Arra Deoza quequeriqquimana nauiuarri touatti rriza tarraro 10 mil nehe uati uati onani oparrireraha ouimecotedeni mittemana-rrarauitoui. Naraha arri touatti mittemanauissa tauicca 5 nehera uati onaniuarrinena denima bica tarraro, onarraro.

₂₀Ouimecotedeni, narraro uimaza tibodideni uatomanezape pina erredeni bodi uatorrarissa tiquenerrerarri. Uaidirehe ssamoqquiri tiquenana, pina erredeni tossonezati uaidirehe ssamo tarrarissa tiquenaniuarrine bica teraha uima nattomede tiquerrenezape pina madirra rradaui bodi nauato tarrarissa tiquenarri, onarraro. ₂₁Deo Atti dozo nanizape:

₂₂Nazama narraro uimaza iattarrarope touatti rriza tarraroza uatidepe Deoza rrehe quena-rrararrarideniza pocca uima auato taniuarrine. Narraro uimape rrehe quenarrarideniza rrerani. Naraha Deo Atti uati toqquimadepe Deoza rrehe quenarrarideniza pocca uima auato taniuarrine. Narraro uimape rrehe quena-rrararrarideniza rrerani. ₂₃Deoza titiqueriqqui naniza bazima touatti rriza tarraroza uati uati tiquenezape madirra ouaha pina touatti rriza tarraro mittapo-rrararrari uitide Deoza rrehe narrararrari uitide nama narrari Deo Atti mittade qquezimaza tettideni mittazapa: —A, arrarrarideni madirrapa bodideni tossamorizarrari −nauitoui. ₂₄Naraha arri titiqueriqqui naniuarri bazima Deo Atti uati toqquimade tiquerrenezape madirra ouaha pina touatti rriza tarraro mittapo-rrararrari uitide Deoza rrehe narrararrari uitide nama narrari Deo Atti mittade qquezimaza tettideni mittazapa: —A, ouape uimasiri ocarrini −nauitoui. Nazapa poua bodicca uima nattomede torrauiuarrine. ₂₅Nama nazapa poua bodicca uima ecomarrarocca pouaza auatomanitoui. Naui Deoza uatizeza poua pitoza uitta naza: —Deopa bica taui, deni torraui −nauiuarrine. Deopa tiadeniza parrissa aniui pouaza auato tauitoui.

₂₆Ouimecotedeni, arri uati uati onarrarope arrima narraro: Titiqueriqqui nauicca madirra arrie nauatode nauato tazapa rriri rriri nauiuarrine. Ouahapa Deo Atti mari mari nauiuarrine. Ouahapa Deorrine pouaza auatomezape ecomeraniuarrine. Ouahapa touatti rriza tarraroza uati uati nauiuarrine. Ouahapa Deo Corimerrine touatti rriza tarraro mittazapa uati iqquimaniuarrine. Narraro uima bazimape timecotedeni bazima rrehenirrirideni todacorani zanaponiuarrine, onarraro. ₂₇Arri touatti rriza tarraroza uatidepe madirra pamaha, 3 quenauitide uati toquenauina bica tani. Denimape poni. Tiadeni naqui bazima uati uatipe poni. Pina arrima tiquenarri: Madirra orraria uati taha rricaza manaco ouaha uati, rricaza ouaha uati, titiquena narri. Touatti rriza tarraroza uati uati toquenaza naco madirra ouaha narraro touatti Deo Corimerrine mittazapa tettideniza uati iqquimani bica tani, onarraro. ₂₈Naraha madirra touatti rriza tarraro uati toqquimade nouerazapa titiqueriqqui naniza touatti rriza tarraroza uati tiquena terrerarri. Tiadeni motta tibodidenizara uati uati tiquenarri. Deoza naqui tibodidenizara uati uati tiquenarri, onarraro.

₂₉Arri titiqueriqqui naniuarri naqui Deo Atti uati toqquimade toquerrenazapa madirra pamaha, 3 quenaha naco uatide toquerrenauiuarrine bica taui. Nazapa tauaribomanarraridenipa uati uati toquenaui mittemanaza pouadeni bodiza attideni nattome quenana. Pina: —Deo Attissa narraroqui? –quenauiuarrine. ₃₀Nazama madirra orraria Deo Atti uati toqquimade torraraha nauiza uittarirrari bodiza Deorrine uima pouaza auatomezape uati taccauiuarrine taideccapa zama rrama naccana. ₃₁Nema tiqueneza Deo Atti uati toqquimade orrari orrari tiquenezape bica tani. Naui Deo Atti tocauatterazapa bazima catizerara canauiuarrine. ₃₂Deo Atti uati toqquimadedenipa pouadeniza Deorrine auatomarrarocca mouaraza pouadeni bodiza ecauemananiuarrine parriremanarrari. Nama quenauiuarrinepa pouadeni tesse uatide torraccazapa tocadidire naccauiuarrine. ₃₃Deopa touatti carrimama canaza pina mouanirrissa narrarocca nacassera tarrari. Poua Atti mouaraza imittaniuarrinena nacassa tarrari. Deopa rronehe rrinede. Pouaza quequeriqquiriza narrarideni bazimapa nama quenauiuarrine.

₃₄Deoza iqueriqquiniza amonerre naqui atti quena-rrereza tocadidire naccaniuarrine. Pina Deocca zossenirri dozo naniza anirrarossa quenaniuarrine: —Amonerredenipe maqquiderredeniza deni toquerrena-rrerana −nade. ₃₅Deo Atti mamaridecca marinarra mittemananissa terrerezape niza ponidenicca ozauarrina ponidenicca maqquiza uati toquenezana mittemananiuarrine. Titiqueriqqui nanizape amonerredeni atti atti quenani bica terrerani.

₃₆—Iazana Deo Atti auatomaporrarode −tiquenarraroqui? —Iazana Deo Atti torrani orrari narraro −tiquenarraroqui? Nema nerrerani. ₃₇Madirrapa: —Deo Atti uauati toqquimade orrani, Deo Corimerrine nauato onani −nazapa parrissa Deo Corimerrine nauato tazapa poua bodiza occa uima auato tanitoui. Ia Zozossede pocca zossenirri ouaza auato inanezape tiadeniza dozo onarraro. ₃₈Naraha ia Zozossede Deo pocca zossenirri dozo onarraroza madirra parrissa narrarazapa paparraua. Nezape poua atti naqui timittemana terrerarri, onarraro.

₃₉Nazama ouimecotedeni, Deo Atti uati toqquimade tiquerrenaniuarrine touini dameraqquiri tiquenarri. Titesse touatti rriza tarraroza uati uati taza naco tecossemana terrerarri. ₄₀Naraha titiqueriqqui nanicca uima bazima tirrinedeni mouaraza toccanissa tana, onarraro.