1 Corintodeniza 13

₁Touatti onihi bazima uatide nauato oneza Deocca zozosse tabaqqui memeuarricca attideni uatide naqui nauato onezape occa uima Deoza bica taniuarrineraha madirraza ouati uanera tezape occa uima Deoza bica terrerani. Ouattipe ponima torranitoui. Pina beobeo touaidiraza mouini rriza tehe imittarrarossa narraro. ₂Arri Zeso Cristo tauimari ouacomera-rizarraro naqui nemanehe nauato onezape, otezerremacca uima uapima nauato, touattehe bazima nauato onezape occa uima Deoza bica taniuarrineraha madirraza ouati uanera tezape ponima nauatoue ocarrirraro. Occa uima Deoza bica terrerani. Occa rrehenirri Deoza dacoreza ssono parrimaraniuarri toccaniuarrine naqui uati oneza toccaniuarrine oparrirezape occa rrehenirri bica taniuarrineraha madirraza ouati uanera tezape occa uima Deoza bica terrerani. ₃Arri ozepetarri bazima ocarrirrarocca naqui touati nauanaqquiri narrarideniza da onehe rriquezape occa uima Deoza bica taniuarrineraha madirraza ouati uanera tezape occa uima Deoza bica terrerani. Zeso Cristo tauimariza damera onarrarorrine madirra oua inanazoqque-mananiuarrine ouassire ouaccoreza naqui occa uima Deoza bica taniuarrineraha madirraza ouati uanera tezape occa uima Deoza bica terrerani.

₄Nazama touati uanehepe arrima narrarona parri: Uima iaza ssonariza edirrereza mouaraza inauanarraro. Madirra touattattera taza naco uadie rrirehe mari icanarrari, mari icanapomarrari, mari icananipomarrari narrari. Bazimaza bicaqquiri inarraro. Amonerre acconi, tozepetarri acconi, tarabaia acconi naqui itessedeniza edi-rrerarraro. Ia ettiza ia deni inana-rrerarraro. Irrine bica tezape: —Oua motta nauato onani orrari onana −inerrerarraro. ₅Touati uanehe icarrizape touatti uaidira tanicca, rrizehe uaidira tanicca uatira inarraro. Accoqquiri inerreraniuarrine: —Oua mottacca −inerrerarraro. Touati uanehe icarrizape uadi inerrerarraro. Madirra iaza uima inanemaneza naqui poccadeni uima ibodi uauatomacca nerrerarraro. ₆Uima parrirenissa terreraniccaza, uima uaidira taniccaza etize-rrerarraro. Uima parrisseheccazana ehetize narraro. ₇Touati uanehe icarrizape itesserrine bica terrereraha nema nehe pouaza eti uana tarraro. —Itessepa bica taui, maizera taui, madiuissa taui −inarraro. Pouarrine bica terrerani qqui ineza naqui: —Niza pocca madie tobicanitoui −inarraro. Pouarrine ocasserani eza naqui mouaraza inauananiuarrine iparrireni.

₈Touati uanehepe nema zanaponitoui. Niza arri Deorrine madirraza auato teza uati uati totoquena narraripa nebomanauitoui. Arra madirra touatti rriza tarraroza uati uati totoquena narrari naco rricanitoui. Deo Corimerrine touattehe carrimanaraha narraro naqui amossi nanitoui. ₉Deo Corimerrine nauatoue onihi onihi narizarraro motara icarrirraro. Nauato inanissa terrerani. Deo Atti uauati toqquimadedeni naco itezerremacca uima nemanehe nauatoqquiri narraraui. Deorrine mota pouadeniza auato tarrarora uati uati ihiqquimemana narraro. ₁₀Narraro nauatoue icarriporraro bazimape niza Deorrine parrireuissa tauicca ccarronazapa rricarizanitoui.

₁₁Nazama erredeni orraponipe erredenicca uimara uati uati ohonanaccade. Obodi naqui erredeni bodi uatorrarissa onaccade. Erredeni irraponicca uimara ohocatterriza naccade. Naraha onapiza obirri ccarezape erredeni orraponicca uimape onattiuarri onanarizehe rricarrarode. Arrirraro namiza imadiccazape Deocca uima nemanehe icauatteranissa terreraccani pina erredeni irraponicca uimassa inarraro. ₁₂Rridapanape Deocca uima nemanehe imittanissa terreraccani. Pina ssonobaza icorime qqui inarrarossa narraro. Zizi tezape ssonobaza icorime qqui ineraha qqui inanissa terrerani. Naraha niza zotodena Deocca uima nemanehe qqui inanissa tanitoui. Cristo poua pano, assirema qqui inauitoui. Rridapanape Deocca uima motara nauato onarraro. Oparrirenissa terrerani. Niza zotodena pocca uima bazima nauato onanissa tanitoui. Pina Poua ouaza nocco rrizera tarrarissa nanitoui.

₁₃Uima bicani rricaquera taniccape 3 narraro. Orrariepe icca rrehenirri. Deoza parrissa izanaponitoui. Uima onihipe itezerremacca uima bicani touini imadi-zanaponitoui. Uima onihi naqui touati uanehe nema zanaponitoui. Arri uima 3 narrarope bicaqquiri naraha touati uanehena denima bica tarraro.