Deo Poua Corimecca nauatoue da inarizarrarope onihi onihi narizarraro
1Ouimecotedeni, arri uima onihi ouaza dozo tiquenarraro rridapana tiadeniza ouacomeraniuarrine. Zeso Cristoza tiquerrenarrarodeniza Deo Poua Corimecca nauatoue onihi onihi nehe da inarizarraro. Narraro uima timittemananissa taniuarrine oneza tiadeniza dozo onarraro.
2Ticcadeni uima taidecca nauatoqquiri tiquenani: Zeso Cristocca tiquerrena-rreraccazape siba nauatoni onihi onihi narizarraroza tetetizemana naccade. Narraro siba nauatonipe attini cappireraha touini dameraqquiri tiquenaporrarode. 3Nema narraro rridapanana arrirraro uima timittemananissa taniuarrine touini onarraro. Arra madirra Deo Corimecca dacorehe carrirraripa: —Zesopa uaidira taui −narraraui. Madirra ouaha Deo Corimecca dacorehe cappirazapa: —Zesopa ia Zozossede −nauiuarrine ssamo taui.
4Deo Poua Corimecca nauatoue onihi onihi nehe iaza da inarizarrarope uapi teraha Deo Corimepa orrariui. 5Ia Zozossede Deoza izepe irriniuarrinepe onihi onihi nehe iaza da inarizeraha ia Zozossede Deopa orrariui. Pouazara izepe irrirraro. 6Deo pocca dacorehe onihi onihi nehe iaza da inarizarraro naqui uapi teraha Deopa orrariui. 7Pouapa Zeso Cristoza iquerrenarraro orrari orrari inarraroza Poua Corimecca nauatoue onihi onihi nehe da inarizarraro. Arri iaza torrarizarraroza Zeso Cristoza ihiqueriqqui narraro bazima acco acco icananiuarrine, onarraro.
8Deo Corimecca nauatoue da inarizarraro orrariepe Zeso Cristoza toquerrenarrarideni mota Pouarrine bodideni nauatoqquiri narrari. Deocca uima madirra mittemanauissa tauiuarrine uatide parriremanauissa tarrari.
Nauatoue onihi ouahadeniza da inarizarrarope Pouarrine bodideniza uima auato teza uati uati toquenarrari.
9Nauatoue onihi motadeniza da inarizarrarope rrehenirrirideni denima daco torani narraro.
Nauatoue onihi ouahadeniza da inarizarrarope madirra inanomibaqqui-rizemanarrari.
10Nauatoue onihi motadeniza da inarizarrarope Deocca dacorehema canauatorimana canarrari.
Nauatoue onihi motadeniza da inarizarrarope Deo pouadeniza uati tazapa Poua Atti uati iqquimarize-manarraro.
Nauatoue onihi motadeniza da inarizarrarope Pouarrine bodideniza uima parrissehecca, maizehecca nauatoqquiri narrari. (Pina madirra canauatori canaui qqui toquenaza nauatoqquiri nazapa: —Narrarope Deo Corimerrine rrerani −quena taui. Madirra ouahacca nauatoue qqui toquenaza naco bodideni nauatoqquiri nazapa: —Narrarope Deo Corimecca zossenirria −quena taui.)
Nauatoue onihi motadeniza da inarizarrarope Deo Corimerrine touatti rriza tarraroza uati uati totoquena narrari.
Ouahadeni naco touatti rriza tarraro mittemanaza Deo Corimerrine poccadeni madirra attideniza uati uati ihiqquimemana narrari.
Nauatoue onihi motadeniza da inarizarrarope Deocca dacorehema canauatorimana canarrari.
Nauatoue onihi motadeniza da inarizarrarope Deo pouadeniza uati tazapa Poua Atti uati iqquimarize-manarraro.
11Arrirraro nauatoue bazimape Deo Corime nacassa taza Zeso Cristoza toquerrenarrari motadeniza da da ihinariza narraro. Deo Corimepa orrariraha Pouana madirra bazimaza inanarizarraro.
Zeso Cristoza irrariqquirrarope pina essirecca uimassa narraro
12Nazama essireza uanarizanipe uapi tani. (Pina inocco, eribo, itone, itati narraro.) Bazima essireza orrariqquizape orrarie torrarraro. Arri Cristoza irrariqquirrarocca uima naqui narrarossa narraro. Uapi ineraha Cristo poua assire orrariassa inarraro. 13Nazama arri irrariqquirraro zodeodeni, zodeo rrararrarideni, madirracca zozosse toquerrenarrarideni, madirracca zozosse toquerrena-rrararrarideni ia bazima Zeso Cristoza iquerrenapozape Deo Poua Corime iaza torrarizarrariparra. Deo Corimerrine bazima Cristoza irrariqquirrarope pina Cristo poua assire orrariassa inarraroparri.
14Essirepe poni motta rrerani. Mota uanarizani uapi tarraro. 15Emori attini carrizape arrima nanerre: —Ouape tozepe orrarrerarrarorrine touassirecca orrarrerani −nanitouiraha. Naraha emorina essire touaccade. Essire neboniuarrine ssamo tani. 16Nazama eribo naqui attini carrizape arrima nanerre: —Ouape tonocco orrarrerarrarorrine touassirecca orrarrerani −nanitouiraha. Naraha eribona uima mimitta. Essire neboniuarrine ssamo tani. 17Essire nemanehe inoccora orrarizape touatti imitte-rreranitouiraha. Essire nemanehe eribora orrariza naqui marro tauicca rrissi inarrarauitouiraha. 18Arri essireza bazima uanarizarraroccape Deo madirra inauatopozama Poua nacassa tauiuarri inauanarizaporraro. 19Arri essireza uanarizarrarora orrarizape essirepe noueranitouiraha. 20Arrirraro uimape parrissa: Essireza uanarizarrarope uapi teraha essirepe orrarirraro.
21Nazama inocco attini carrizape izepeza: —Tiape poni. Ouana touassire ouacauarraro −naniuarrine ssamo tani. Arri itati naqui attini carrizape emoriza: —Tiape poni. Totati ouana bica onarraro −naniuarrine ssamo tani. 22Arrima narrarona parrissa: essire mota onihiza: —Rrapari tani −ineraha narraro icarrizape imadinissa tarraro. 23Essire mota onihiza naqui: —Arrimani torranicca −ineraha narrarope ia inabicaniuarrine. Naraha arri essirecca mota onihi qquidepe oppina tani. Narraro ecauanissa taniuarrine etero oro izimeza ia qquide oppinera tani. 24Nazama arri essire mota qquide oppinera tarrarope inarrima-rrerani. Essirecca uimape Deorrinena nema narraro. Arri essire arrimani torrarraro motape Deo Pouana inanabicarraro. 25Rrehe, essire motape ponira ponira nariza-rrerani. Bazima ponideni cacauemanani. Essire mota naqui ponidenira acco acco cana tani. 26Arri essire mota naqui ocasserani auezape essire bazima ocasserani aua tani. Essire mota orrarie inanabicaza naqui essire nemanehe bazima uatize tani.
27Nazama tiadeni bazima Cristoza tirrariqquimanezape: —Cristo poua assire tiquerrenani −inarraro. Arri orrari orrari tarizemanarrarope Cristo assire mota tiquerrenarraro. 28Arra Zeso Cristoza quequeriqqui narraridenicca uima bica taniuarrine zepedeni irrimanauiuarrinepa Deona pouadeniza inanarizarraro.
Taide motadenipa Zeso Cristocca zozosse tabaqqui toquerrenauiuarrine inanabaqquirrari.
Zotode ouahadenipa Deo Atti uauati toqquimade toquerrenauiuarrine inanabaqquirrari.
Zotode ouahadeni naco Deo Atti maride toquerrenauiuarrine inanabaqquirrari.
Ouahadenipa canauatorimana canarizauiuarrine inanabaqqui,
comaqquiri narrarideni inanomibaqqui-manauiuarrine inanabaqqui,
madirra birrideni acco canade toquerrenauiuarrine naco inanabaqqui narrari.
Zeso Cristoza quequeriqquimana narrarideni zossede toquerrenauiuarrine naco inanabaqqui,
touatti onihi rriza tarraroza uati uati totoquena nauiuarrine naco inanabaqqui narrari.
29Naraha bazimapa Zeso Cristocca zozosse tabaqqui toquerrenauiuarrineco? Noueraui. Bazima Deo Atti uauati toqquimade toquerrenauiuarrineco? Noueraui. Bazima Deo Atti maride toquerrena-rraraui. Bazima canauatorimana cana-rraraui. 30Bazima madirra tonanomide nauatoue carrimana-rraraui. Touatti rriza tarraroza uatide bazima parriremana-rraraui. Touatti rriza tarraro uati toqquimade naco bazima nauatoqquiri narraraui. Arri ia bazima Zeso Cristoza iquerrenarrarope Deorrine izepe irriniuarrine Poua Corimecca nauatoue onihi onihi da da ihinariza narraro. 31Tiadenipe Deo Corimecca nauatoue denima bica taniccatoui dameraqquiri tiquenarri, onarraro.
Rridapanape uima denima bica taniccara tiadeni mari ocanabaqquina, onarraro.
