1 Corintodeniza 11

₁Nazama tiadenipe pina arri occa madiessa tinanemanana. Ouape Cristocca madiessa onananiuarrine damera onarraro. Narrarossa tiquenarri, onarraro.

₂Rrehe ouimecotedeni, ouaza tetideni rrimemana-rrerezape occa marinarra tecauemana-zanaporrarorrine tiadeniza ouatizerraro. Tirrinedeni bica tani, onarraro. ₃Nazama arrirraro uima naqui nauatoqquiri tiquenarri, onarraro: Arra Cristopa maqquiderredenicca tamine. Maqquiderredenipa poccadeni amonerrecca tamine. Deopa Cristocca tamine. ₄Nazama maqquiderredenipa Deoza uati toquenauiuarrine, pouadeni bodiza Deo Atti auatoza uati iqquime-mananiuarrine naqui tatideni teppe nazapa bica terrerani. Tatideni teppe nazapa Cristo arramani inanemanarrari. ₅Amonerredeni naqui arri titiqueriqqui naniza Deoza uati toquenaniuarrine, ponideni bodiniza Deo Atti auatoza uati iqquime-mananiuarrine naqui tatinideni teppe nerrerezape bica terrerani. Ponidenicca maqqui arramani inanabaqquimanarrari. Deoza quequeriqquimana nauiza tatinideni tepperani uati uati toquenezape pina tatinideni conani ccado canehe uire tarrarossa narraro. ₆Amonerre poni tatini teppede nacassera tezape tatini conani ccado ticanemanehe uire tarri. Naraha amonerre attinipe: —Otati conani ccado canehe uire tanipe oppina tani −nezape poni tatini teppe nezana bica tani, onarraro. ₇Naraha maqquiderrepa poua tati teppe narrarana. Deorrine maqquiderrepa pina Pouassa inanarrari, zossenirri carrirrariparra. Deocca deni torrehepe maqquiderreza auato tarraro. Naraha amonerrezape ponicca maqquicca deni torrehe auato tarraro. ₈Deo maqquiderre inauatoporraripa amonerreza inauato-rraraui. Amonerrena maqquiderreza inauatorraro. ₉Deo maqquiderre inauatoporraripa amonerre birrini accode torrauiuarrine rraraui. Amonerrena maqquiderre birri accode torraniuarrine inauatorraro. ₁₀Nema narraroa amonerredenipe tatinideni teppe teppe quequenanarraroparri. Narraro totati teppe teppecca uimape Deocca zozosse tabaqqui memeuarricca naco nauatoqquiri naui. Amonerredeni tatinideni teppe nezape: —Icca maqquipa ia cacauade −quenani auato inanemanarraro. ₁₁Naraha ia Zeso Cristoza iquerrenarraro maqquiderre nouerazapa amonerre noueranitouiraha. Amonerre nouerezape maqquiderre nouerauitouiraha. ₁₂Arri amonerre maqquiderreza nauatoporrarope parrissa. Naraha arrirraro uima naqui parrissa: Maqquiderre zotodedeniccapa amonerredeniza tossonemanarronarraria arrirraroparri. Arrirraro zamacca bazimapa Deo Pouana taidezama inauatorizaporrari.

₁₃Rrari, tiadenipe nerrecoma tiquenani? Amonerre tatini tepperani Deoza uati uati tezape bica taqui? Tibodideni uatomanarri. ₁₄Naraha iape ibodiza nauatoqquiri inarraro: Maqquiderre tati cone arabo tazapa —A, rriza taui −ihinanarraro. ₁₅Naraha amonerre tatini conani arabo tezape —A, tatini conani bica tani −ihinanarraro. Nazama arri amonerre tatinideni conani arabo tezape Deorrine nema quenarraro. Narrarope pina ponideni tatini teteppessa narraro. ₁₆Naraha madirra orraria, pamaha uitide narraro uimaza rrehe narrarazapa paparraua. Pouara nauato tana. Deoza quequeriqquimana nauiuarricca bazima ia naqui narraro uimaza rrehe inarraro.

₁₇Rridapanape ticcadeni uima onihi tiadeniza dozo onarraro. Narraro uima omittezape ouatize-rrerani. —Rrehe, tirrinedeni bica tani −onerrerani. Narraro ticcadeni uimape arrima nani: Arri Deoza titiqueriqquimana narrarope bica taniuarrineraha tirrinedenina touaidirarraro. ₁₈Taidecca ticcadeni uimape arrima narraro: Ouaza uati uati quenaui omittarrarope arri tiqueriqquimanezape tiadenira tiadenira tatarizemana narraro. Narraro uima motape parrissa nitide, onarraro. ₁₉Rrehe, nazama tiadeni mota tiadenira titiqueriqquimaneri narizani bica terrereraha nema tiquenezape Deo nacassa tauicca tinanemanehe timadimanani bazimaza auato tanitoui. ₂₀Nazama arri tiadenira tiadenira titiqueriqquimana naniza titirripemana narraro rripaqquiepe pina ia Zozossede Zeso Cristocca rripaqquiessa nerrerani. ₂₁Rripaqquietoui ticcadeni zamatapa teteccarronemana naraha nerrecotouira tiadenipe ticcadeni zamatapa titirripemanapo narraro? Timecotedeni mota zamatapa accoqquiri nazapa titessedeni mota pepemimana narrari. Zeze naqui timecotedeni mota pouadeni idimanazapa noccodeni rranoqquiri nanarra narrariparra. ₂₂Arri rripehetoui zenirri toui tiquenezape ticcadeni ozauarrina rripanirri tiadeni idimana, zenirri tiadeni idimana nanerre narri. Tiadenipe pina Deoza quequeriqquimana narrarideni arramani tinanabaqquimanarrarissa tiquenarraro. Cappiremanarrarideni naco tirrinedeni cacappinemana narrari. Nezape tiadeniza nerrecoma onapazerre? Tiadeniza: —Rrehe, bica tani −onaniuarrinequi? Nema onerreranitoui!

_23-24Ouimecotedeni, ia Zozossede Deo pocca rripaqquiecca uima timittemananissa taniuarrine tiadeniza uati omanipomarraro. Arri tiadeni mari ocanabaqquirrarope ia Zozossede Zeso pocca mamari tabaqqui mari icanabaqquiporrari ouattarrarode. Arra ia Zozossede Zeso Zoda poua eccorauicca zomeza rripade toquerrenaza pao idi nazapa Deoza uati tarrari: —Rrehe Abi Deo, ticca danirri iaza bica taui −napozana pao icanarobeza pocca mamari tabaqquiza uati tarrari: —Arrirrarope ouime. Titouideni oua ouaccoreza ozoqqueniuarrine. Niza oua noue orrireza naqui ouaza tetideni rrimemana nerreraniuarrine nema titizanapomana nana, onarraro −narrari Zeso. ₂₅Naza arrarideni rricazapa ze narizemanauiuarrine zeze bodi carriui equidi naza pouadeniza uati tapomarrari: —Arrarrari zezecca uimape Deo madirra tezerre rrehe canireuiuarrinecca uima zati torraniuarrine. Niza oua ozoqqueza ouemene toqquezape narraro rrehe canirenirri zati parrissa torranitoui. Arri ouemene toccarrarope tiadeniza uima bicani torraniuarrine. Nazama arra zeze tiadeniza da ocanarraripa niza oua noue orrireza tiadenira naqui ze ze titizanapomana nana, nani otoui tetideni rrimemana nerreraniuarrine −narrari Zeso. ₂₆Nazama arra ia Zozossede Zeso Cristo zoqqueuicca uima eti rrime-rreraniuarrinepe pao apa apa ihinanarrari, zeze naco ze ze ihinanarrariparra. Nema inanezape poua zoqqueuicca uima auato inanazanaporraroa poua ccaniui bacco inaniuarrine, onarraro.

₂₇Nazama ia Zozossede zoqqueuicca uima eti rrima-rreraniuarrinecca pao pouama irripazapa Zeso imeza uimasiri inanarraro. Zeze naco pouama ze inazapa Zeso emeneza uimasiri inanarraro. ₂₈Nema inerreraniuarrinepe ia Zozossede Deo pocca rripaqquieza irripa-rreraccazama ze inerreraccazama taide ibodiza icca uima nattome inapozana bica tarraro. ₂₉Nazama ia Zozossede Deo pocca rripaqquieza naqui poua poua ime ccaccorarraricca uimaza eti uatopoza irripezape bica tani. Narraro uima ibodi uato-rreraza apa inarrari, ze inarrari nazapa Deo ia narrizo taui. ₃₀Arra titessedeni motapa pouama rripemanarrari, ze quenarrari narrarorrinea comaqquiri narra, ocasseraqquiri narra, zozoqqueri narra quenarrariparra. ₃₁Naraha iape irripa-rreraccazama taide ibodiza icca uima nattome inapozana bica tarraro. Nazama uima icarrizape Deo icattemaniuarrine Pouaza ecomerapoza irripazana bica tani. Nema inanezape ia Zozossede Deo pocca narrizoue iaza noueraniuarrine. ₃₂Naraha icca uima bica terrereza ia Zozossede Deo ia narrizorraripa icauatteraniuarrine. Niza zotode Deocca narrizoue bacco teza naqui zori icanireniuarrine. Arrirraro zamacca madirra Zeso Cristoza rrehe quena-rrararraridenipa narrizoue rriquerreraniuarri toquerrenauitoui. Naraha iape pouadeniza icarrima-rreranitoui.

₃₃Rrehe ouimecotedeni, uima onihi naqui. Arri ia Zozossede Deo pocca rripaqquieza tirripemananiuarrine tiqueriqquizape: —Ouaha orripapona −tiquenerrerarri. Timecotedenitoui timadimanaccana, nani bazima parri tirripemanarini naniuarrine, onarraro. ₃₄Nazama madirra pemizapa pocca ozauarri rripapona, onarraro. Tirrinedeni ia Zozossede Deo pocca rripaqquie bica tezape Deo tiadeni tonarrizobaqqui-rrarauitoui.

Nazama niza naniuarri tiadeni qquide oqquezana titezerredeni uima onihi ocattemanitoui, onarraro.