Paoro, Timoti tezerre nirra quenarrari
1Nirra, ouimecotedeni? Ouape Paoro. Tiadeniza dozo onarraro. Deo nacassa taza Zeso Cristocca zozosse orrarraro. Ouimecote Timoti tezerre tiadeniza: —Nirra, bicaqquiri tiquenaqui? −inarraro. Arrirraro uimape nani zama arobeni Acaiacca oza panani Corintouarricca Deo Attiza titiqueriqquimana narrarodeniza dozo inarraro. Narraro ticcadeni zama arobeniza Zeso Cristoza rrehe quenarrari madirizemanarrarideniza naqui dozo inarraro. 2Icca Abi Deo, Poua Bedi ia Zozossede Zeso Cristo tezerre poccadeni biquehe rriquerreranicca tiadeniza inanemana-zanapona, inarraro. Poccadeni rronehe naqui tibodideniza torrazanapona, inarraro.
Deopa ia acco tocanabaqqui taui
3Ia Zozossede Zeso Cristocca Abi Deoza etizena. Pouapa icca Abi iaza uati cauanari canaui. Uarrirriraza ia acco acco totocanabaqqui narrari. 4Ocasserehe onihi, onihi iaza ssonarizape Deo ibodi acco canarrari. Nezape imecotedeni ocasserani auemanaza naco acco icanabaqquiuiuarrine iparrireni. Pina Deo ia acco tocanabaqquirrarissa narraro imecotedeni acco icanabaqquirrari. 5Zeso Cristopa ocasserehe uapi tehe inauanarraro. Nezape ia naqui pina Cristo poua ocasserani auarrarissa inarraro. Ocasserehe inauanani uapi teraha Zeso Cristocca iquerrenarrarorrine Deocca acco canehe iaza rriquerrerani. 6Arri ia ocasserehe inauanarrarope ponima rrerani. Tibodideni acco icanabaqquiniuarrine, tossiuauehe ticarrimananiuarrine ocasserehe ihinauana narrarode. Deo ibodi acco canazapa ia naqui tibodideni acco icanabaqquirraro. Nema nezape ocasserehe pina iaza ssonarirrarossa narraro tiadeniza ssonarizape mouaraza tinauanemananiuarrine tiparriremananitoui. 7Nazama ocasserehe tinauanemanarraro pina ocasserehe inauanarrarossa nezape Deo tiadeni acco tocanabaqquiuitoui. Pina ia acco tocanabaqquirrarissa nauitoui. Narraro parrissa torraniuarrine nauatoto inarraro.
8Imecotedeni, zama Asiauarri rrauirreza ocasserani imeni inauanarrarocca uima nauatoqquiri tiquenaniuarrine tiadeniza dozo onarraro. Narrizoue oppinabote iaza ssonarizape ipamarronabote nade. Iaza tocasserani nezape: —Niza arrirraro narrizoue rriquezape imadipomanitoui −inerrerade. 9Ibodiza: —Parrissa ipamarronanitoui −inade. Naraha ipamarronaniuarrine Deo ecossezape imadiccarraro. Nezape narraro oppineherrine iaza auato tarraro: Madirra iape ia inassiuauaniuarrine iparrire-rrerani. Deona nauato taui orrari narrari. Pouapa uatiarrarideni nauatonide. 10Pouapa zoqquehe oppinaboteza ia zori tonanabaqquirrari. Pouaza parrissa inezape niza zotode parri izoqquerinicca narrizoueza naco ia zori tonanabaqquiuitoui. Nezape etti: —Rrehe, ia zori tonanabaqqui-zanapouitoui −ihinanarraro. 11Tiadeni naqui ia acco ticanabaqquimananiuarrine Deoza uati uati tiquenarri. Deoza uatide uapi tezape Pouaza uatizemanaui naco uapi tauitoui. Deopa uima bicani iaza inananicca uima imecotedeni mittemanazapa Pouaza: —Peperri, tirrine bica tani −quenauitoui.
Paoropa Corintouarri toccani-rrararraricca uima
12Ouimecotedeni, tiadeniza imadizape imadinissa tade. Narraroza etizerraro. Uima icappirehe imadirraro. Etti naqui maizehe rrirehe uati uati inarraro. Madirra bazimaza naqui bicaqquiri ineza nema inarizarraro. Naraha icca madie bica tarrarope ibodi nauato tarrarorrine rrerani. Deo iaza uati uana taza ia acco tocanabaqquirrarirrinena imadinissa tarraroparri. 13-14Occa uima teppe tiadeniza dozo onarrarope uima narro tanicca dozo dozo onerrerani. Uima narrora taniccaza dozo dozo onarraro. Arri occa uima teppe timittemananissa taniuarrine nacassa oneraha rridapana motara timittemanarraro. Niza zotodena timittemananissa tanitoui. Niza ia Zozossede Zeso Cristo ccanipomauicca uada bacco teza tiadenipe iaza tetizemananitoui. Pina rridapana ia tiadeniza etizerrarossa tiquenanitoui.
15Iaza tetizemananiuarrine nauato onezape taide tiadeni qquide occapona, onade. Nema oneza tiadeni qquide occani pamezape uima bicani naqui tiadeniza onanani pamaniuarrine. 16Obodi uatozape arrima onade: Zama Masedoniauarri oqquezape nani tiadeniza onarroccana. Zotodena Masedoniauarri occa, omadi, occanipomezape tiadeniza onarropomaccaniuarrine, onarrarode. Zotode occa bobodeuarrine oua acco ticanemanezape zama Zodeauarri occaniniuarrine, onade. 17Naraha tiadeni qquide occapoma-rrereza zamarrima onezape ouaza: —A Paoropa bodi uatouissa tarrararrarico? −tiquenerrerarri. Ouape parrissa tiadeni qquide touini onezape occana, onade. Arra madirra ouahapa: —Rrehe, arrima onanana −naraha uada onihizape: —Poni, nema onerrerana −naui carri taui. Tettideni ouaza: —Paoropa nama narrarico? −tiquenerana. 18Naraha ouape nema onerrerani. Deopa occa uima nauato tarrari: Ouape maizera onani. Pina Deo maizera tarrarissa onarraro. Ouape rrehe onanitide, poni onanitide onerrerani. 19Arri oua, Silvano, Timoti ineza Deo Bedi Zeso Cristo tauimari tiadeni mari icanabaqquiza ettipe: —Zeso Cristocca uimape parrissa nitide, parrissa rreranitide −inerrerade. —Poua tauimari nemanehepe parrissa −inarraro. —Pouapa poua attissa inanarizarraro −ihinanarrarode. 20Rrehe, Zeso Cristo pouapa Imehi Deo uati taporrarissa inanarraro. Nema nezape Zeso Cristoza iquerrenarrarorrine Abi Deoza etizeza ettipe: —Parrissa nema nana −ihinanarraro. 21Nazama Deo Pouarrinena Zeso Cristoza iqueriqquiniuarrine icca rrehenirri, ticcadeni naqui todacorani narraro. Pouapa ia tocatterrizabaqquirrari. 22Nezape Poua pocca iquerrenani auato taniuarrinepe pocca nanarranoza ia narranorizarrarissa narraro. Narraria arra Poua Corime ibodiza inanarrari parra. Poua Corime icarrizape niza zotode Poua uati taporraricca icarriniuarrine nauatoqquiri inarraro.
23Ouimecotedeni, omaiza-rrerani. Deopa obodi nauato tarrari. Tiadeniza parrissehera uati onerrerezape Deo oua narrizoui bica tani, onarraro. Arri tiadeni qquide Corintouarri occapoma-rrerarrarope tiadeniza ouati uana teza. Ouatti orri ticanemananiuarrine nacassera onarrarode. 24Tiadeniza naqui: —Arrima tiquenarri −inaniuarrine touini inerrerani. Zeso Cristoza rrehe tiquenanissa tani nauatoqquiri inarraro. Tetizemananiuarrinena tiadeni acco canade touini inarraro.
