Titus 3

₁Saa aan fer ti priiter tas se ti ortnunge fon tëne woo rechiire un fon te autoriteete rexpekteere sole, tas se aan heere sole un fërtich playwe sole fer ales was kuut is mache. ₂Saa aan tas nimant xlecht fon te anere xpreche sol, awer sole kalm un friitlich sin un al mit tsaatlichkheet pehantle. ₃Wayl frier hate meyer selepst khee ferxtant un waare repelix un xlecht. Meyer waare sklaawe fon te pasioone un ale sorte ferkniichunge un hon tas leewe aus kep in xlechtichkheete un nayt. Ti anere hon uns kehast, un meyer hate has iwer tii. ₄Awer, wan Hërkot, unser Reter, sayn kuutheet un sayne liipe iwer al ketsaycht hot, ₅hot eyer uns keret wayl hot uns petauert, un net wayl meyer etwas kuutes ketuun hate. Eyer hot uns keret torich em Hayliche Kayst, woo uns kewex hot, un soo kemach tas mer noch mool kepoer keepte un uns en nay leewe am kewe. ₆Hërkot hot mit kuutheet sayne Hayliche Kayst iwich uns kexut, torich Yeesus Kristus, unser Reter. ₇Un hot tas kemach tas, torich tëm sayne knaate, meyer fon Hërkot aan kenom kewe un tas eewiche leewe woo meyer hofe kriin khëne. ₈Tii preeticht is ti woerheet.

Ich wil hon tas tuu, Titus, mit konfians iwer tii phunkte xpreche solst, tas tii woo an Hërkot klaawe sich intereseere tuun fer sayn tsayt penutse fer kuutes se tuun. Tas is kuut un nutslich fer ale mënxe.

₉Awer, playp wech fon sin loose tiskusioone, ti lange liste fon foerkhomer, ti xtraytichkheete un tepate iwich te yute sayn kesets. Tas tings is nutsloos un oone weyert. ₁₀Wën yemant teelunge prowokeyert unich te priiter im klaawe, ruuf tëm persoon ti acht aan een ore tswaay mool; awer tëm noo solst tuu niks mee se tuun hon mit tëm. ₁₁Wayl tuu weest tas soo en persoon te ewankeelium komplët neewe kelos hot un tëm sayn sinte pewayse tas te ferkheyert is.

₁₂Wan ich tich te pruuter Artemas xike ore te pruuter Tykikus, mach was meechlich is fer tich mit mich trefe khome in te xtat Nikopolis, wayl ich hon resolweyert tort playwe iwer te winter. ₁₃Helef te atfokaat Seenas un aach Apolo in ales was tuu khanst tas tii khëne hon was se prayche fer ti rees. ₁₄Tas unser layt lërne sayn tsayt penutse kuutes am tuun un ti anere am helfe in nootfal, tas soo es leewe fon unser layt nutslich sin khan!

₁₅Al tii woo pay mich sin xike tich en xeene kruus. Kep aach en pekriisung fer unser froynte im klaawe.

Tas Hërkots knaate mit aych al sich ferhalt!