Titus 2

₁Awer tuu, Titus, lërn fer ti layt tëm noo was ti echt untericht saat. ₂Lërn ti eltre layt fer motereyert se sin, ërnst, kexayt un fest im klaawe, im liipe un persewerans. ₃Kraat soo, saa aach fer ti eltere fraae se leewe wii fraae woo fer Hërkot tetikeyert sin leewe sole. Tas se net ratxich sin sole un net tsu fiil kërn wayn trinke! Tas se lërne was kuut is, ₄tas ti yingere fraae lërne sayne man un sayn khiner se liipe, ₅un prutënt sin, phuer, kuute haus fraae un sayne man aan heere, tas nimant xlecht xpreche tuut fon Hërkot sayn mensaaj.

₆Saa aach fer ti yunge mëner tas se prutënt sin sole. ₇Tuu selepst must sin, in ales, en payxpiil im kuutes tuun. Saa ti woerheet un say ërnst wën tuu am unterichte pist. ₈Penuts ti richtiche wërter, tas nimant tich kritisiire khan un tas ti faynte sich xeeme wayl se niks xlechtes hon fer se saan iwer uns.

₉Tas ti sklaawe sayn aychner aan heere sole tas tii tsu friite wëre! Tas se net xlecht antworte sole ₁₀un net sayn aycher pexteele sole! Im keeche teel, tas se tsayche tas se imer kuut un leaal sin in ales was se mache. Soo, weche tëm tings woo se ketuun hon, kept kuut kexproch fon te untericht iwer Hërkot, unser Reter.

₁₁Wayl Hërkot hot sayne knaate reweleyert fer ti retung se kewe fer yeete ëne. ₁₂Tee knaate lërnt uns te unklaupe un ti weltliche pasioone neewe lose un fer se leewe uf tee welt en umsichtich leewe, khorekt un hiin kep fer Hërkot, ₁₃soo lang wii meyer am waarte playwe te hërliche taach woo ti kloor fon unsere kroose Hërkot un Reter Yeesus Kristus tsum foerxayn khomt. ₁₄Waar tee selepst woo sich keopfert hot fer uns, fer uns pefraye fon ale xlechtichkheet un uns sauwer mache, am mache tas meyer en folek sin khënte woo ploos tsu iim keheere teere un woo sich hiin kept fer se mache was kuut is.

₁₅Lërn tas tings un penuts tayn autoriteet fer tayn heerer animeere un aach fer se xteere. Un tas nimant tich ferxtumpeere sol.