Titus 1

₁Ich, Phaulus, Hërkot sayne tiiner un aphostel fon Yeesus Kristus, xraywe tee priif.

Ich waar raus kesuucht kep un kexikt kep fer se helfe te klaawe xtërkere woo Hërkot sayn folek hot un fer se mache tas se ti worheet khëne lërne woo unser relichioon untericht. ₂Ti hat sayn basis an te hofnung fer tas eewiche leewe se kriin. Hërkot, woo net liye tuut, hot uns tas leewe ferxproch, eep ti welt ketsoo kep waar, ₃un an te richtich tsayt hot eyer tii reweleyert in sayn mensaaj. Tii mensaaj is fer mich ap kep waar, un ich tuun se aan saan torich ti ortnung fon Hërkot, unser Reter.

₄Ich xraywe an tich, Titus, mayne echte soon im klaawe, tee klaawe woo tayn un mayn is.

Tas te knaate un te friite fon Hërkot, unser Fater, un fon Yeesus Kristus, unser Reter, mit tich sich ferhale!

₅Ich hon tich in Kreta kelos tas tuu in ortnung xtele teest ales was noch feelt se mache un ti fiirer fon te Khërich in yeete xtat aan xtele. Eriner mayn ortnunge: ₆Te Khërich fiirer mus en man sin woo nimant was pexultixe khan weche niks; mus noore een fraa hon; sayn khiner mise kriste sin un net pekhant sin als xlecht ore woo net aan heere.

₇Wayl tee woo ti responsapiliteet hot fer Hërkot se xafe, als pixof, mus en man sin woo nimant pexultiche khan weche niks. Tëref net hoochmuutich sin, net mool en peese mënx sin, tëref net kërn fiil wayn trinke, net kewaltich sin, un net kelt keerich sin. ₈Mus te kuute wile hon fer layt uf nëme in sayn haus un mus liipe ales was kuut is. Mus en kexayte mënx sin, kerechtich un tisiplineyert, fer Hërkot sich hiin kewe. ₉Mus fest xteen in te mensaaj woo ti konfians fertiint un woo te Khërich sayn untericht noo keet. Soo khan tee ti anere animeere un aach aan tsayche was tii woo kheeche ti untericht sin ferkheyertes mache.

₁₀Wayl es kept fiil, ekstra tii woo fon te yute sayne klaawe khom sin, woo rewolteyert sin un tuun ti anere hinerkeen mit sayn tumheete. ₁₁Is neetich etwas mache tas tii noo lose se xpreche, wayl ti sin kanse familye am xteere wayl se am unterichte sin was se net tërefe, mit em ximpliche sin fer kelt se fertiine. ₁₂Waar kraat ëne fon tëne, en profëte fon te insel Krëta, woo saat: “Ti pewooner fon Krëta saan ploos liye. Sin wii wilt fii, sin faulënser woo ploos ans ese tënke.” ₁₃Un tee hat recht wan eyer tas saat. Tesweche must tuu ti falxe mayster xtram aan xpreche tas se kesunt im klaawe sin sole ₁₄un uf heere acht se kewe fer ti kexichte woo ti yute uf pringe un fer mënxliche unterichte woo fon layt khome woo ti woerheet ap kesaat hon. ₁₅Ales is phuer fer tii woo phuer sin; awer niks is phuer fer tii woo net sauwer sin un khee klaawe hon, wayl tëne iire khop un sin is trekich. ₁₆Tii saan teere Hërkot khëne, awer was se mache tsaycht tas tas net woer is. Sin fol has, sin repëlix un sin net tefoer fer etwas kuutes se tuun.