1In te presëns fon Kot un Yeesus Kristus, woo ale layt julkeere wërt, ti leewente un aach ti toote, un weche Kristus un sayne Raych, woo am khome sin, ortne ich tich mit xtramheet, tas: 2tuu ti mensaaj preetiche un imer witer aan saan, op es ti richtich tsayt is ore net. Fersuuch, mit ale ketult, ti layt in lërne, animeere, xteere tas tii tas in te khop kriin. 3Wayl khomt ti tsayt woo ti layt khee acht mee kewe fer ti richtich untericht, awer keen sayn aychne wile noo. Un fine fer sich selepst en haufe mayster, woo tëne saan was se heere wole. 4Tii layt lose noo ti woerheet se heere fer acht se kewe uf faaple. 5Awer tuu, say motereyert in ale situatsioone. Phak ti laytunge, mach ti aarwat fon en preeticher fom ewankeelium un tuu tayn flicht kuut in hale als Hërkots tiiner.
6Fer mich is xon ti uertsayt khom fer keopfert se kewe un is xon tsayt fer tas leewe tsurik lose. 7Ich hon es peste ketuun woo ich khont im wetlaaf, sin pis ans ën khom, hon te klaawe pehal. 8Un yets, is uf mich am waarte te kewun prays fon te kerechtichkheet, woo te Hër, te kerechte richter, mich kewe wërt an tëm Taach, un net poos fer mich, awer fer al tii woo waarte, mit liipe, tas er khomt.
Perseenliche wërter
9Khom mich pesuuche soo xnel wii meechlich. 10Wayl Temas hot sich ferliipt mit tee welt, hat mich in xtich kelos un is noo te xtat Tesaloonika kang. Kresens is noo te prowins fon Kalatia kang un Tito noo te rechioon fon Talmatia. 11Ploos Lukas is hier pay mich. Tuu Markus uf suuche un pring em mit tich, wayl tee khan mich an te aarwat helfe. 12Ich hon Tikiko kexikt noo te xtat Ëfesus. 13Wan tuu khome tuust, pring mayne punx woo ich in te xtat Troate, in Karpus sayn haus kelos hon. Pring aach ti picher, ekstra tii fon leter.
14Aleksanter, te xmit, hot mich fiil xaate ketuun; te Hër wërt tëm sayne prays kewe, tëm noo was eyer kemach hot. 15Phas uf mit tëm, wayl tee hot mit kroose kewalt unser mensaaj pekhëmft.
16Am eyerxte mool woo ich mich tefenteyert hon foer te autoriteete, is nimant pay mich keplip, al hon mich in xtich kelos; ich hofe tas Hërkot tas net uf tëne sayn rechnung tuut! 17Awer, te Hër is pay mich keplip, hot mich kraft kep tas ich ti komplët mensaaj aan saan khënt fer al tii woo khee yute sin un hot mich pefrayt tsum toot konteneyert kewe. 18Te Hër wërt mich pefraye fon aler xlechtes un wërt mich in sicherheet tsu sayne himlixe Raych nëme. Fer iim sol ti kloor kep wëre fer imer! Aamen!
Pekriisunge
19Pekriisunge fer Prisila un sayne man Akila un aach fer Onesiiforus sayn familye. 20Erastus is in te xtat Korintus keplip, un ich hon Trofimus in te xtat Miletus kelos wayl tee krank waar. 21Sii tsu tas tuu foer em winter khome khanst. Ti priiter Eupulus, Prutëns, Linus un Klautia un al anere priiter xike pekriisunge.
22Timoteus, tas te Hër mit tayne kayst sich ferhalt!
Seechnung
Tas Hërkot sayne knaate mit aych sich ferhalt!
