2Timoteus 3

₁Tënk traan: in te letste taache wërt es xlime tsayte kewe. ₂Wayl fiil wëre ekoystix sin, kelt keerich, xtols, inkepilt, untankpaar, ferxëne, tuun sayn eltre net aan heere un wëre khee rexpekt hon iwer ti relichioon. ₃Wëre khee liipe hon iwer ti anere un kewe hart, liye uf pringe, khee kapasiteet fer sich kontroleere, kewaltich un faynte fon was kuut is. ₄Wëre hinerlistich, frech xnisich un uf kexwol mit hoochmuut. Wëre mee liipe was tëne frayt kept als Hërkot; ₅wëre aus siin tas se unser relichioon noo keen, awer sayn aktsioone tuun tëm sayn echt macht ap saan. Playp wech fon tëne layt! ₆Phaar fon tëne khome in ti hayser rin un kriin xwache fraae tomineyert, woo fol sinte sin un lose sich fon aler sorte winxe xlepe. ₇Sin fraae woo imer am fersuuche sin lërne, awer khome nii an ti woerheet se khëne. ₈Soo wii Janes un Jampres sich keeche Mooses kextelt hon, soo aach sin tii mëner kheeche ti woerheet. Ti hon te ferxtant ferloer un sin feel kang im klaawe. ₉Tii keen awer net wayt, wayl aler layt wëre siin wii tum ti sin. Waar tas was paseyert waar mit Janes un Jampres.

₁₀Awer tuu keest mayn untewrichte noo, ti aart wii ich hantle un te opjektiif woo ich in mayn leewe hon. Un keest aach mayne klaawe noo, mayne ketult, mayne liipe, mayn konstans, ₁₁mayn persekutsioone un mayn layte. Tuu weest ales was mich paseyert is in te xtet fon Antiokia, fon Ikoonio un Listra. Was xrekliche persekusioone hon ich mit kemach! Awer te Hër hot mich pefrayt fon tëne al. ₁₂Al tii woo tas kristliche leewe leewe wole wëre persekusioone mit mache. ₁₃Awer, tëne xlechte un falxe layt keet tas imer xlechter, am hinerkeen un hinerkang am kewe. ₁₄Awer tuu, playp fest in te woerheete woos tuu kelërnt host un woo traan tuu keklaapt host mit tayn kans hërts. Tuu weest weyer tayn mayster waare im kristliche klaawe. ₁₅Un, tsayt khint uf, khënst tuu ti Hayliche Xrifte, tii woo tich ti wisheet kewe khëne woo tsu te retung fiert, torich em klaawe an Yeesus Kristus. ₁₆Wayl ti kanse Hayliche Xrifte sin fon Hërkot inspireyert un is nutslich fer ti woerheet in lërne, konteneere was ferkheyert is, ti feeler korijiire un ti richtich aart fer se leewe unterichte. ₁₇Un mit te Hayliche Xrifte is em Hërkot sayne tiiner komplët prepareyert un fërtich fer ale sorte kuute aktsioone se tuun.