Xtram un leaal in Hërkot sayn aarwat
1Un tuu, mayne soon, say xtarek torich em knaate woo unser is wayl meyer fereenicht sin mit Yeesus Kristus. 2Hool ti unterichte woo tuu fon mich keheyert host foer fiile tsayer un kep se ap fer leaale mënxe, woo anere in lërne khëne.
3Als leaale soltaat fon Yeesus Kristus, hal teel in mayn layte. 4Wayl te soltaat, wën tee am tiine is, wil sayne komantant kefale un, tesweche, tuut er sich net in kexefte fon te siwil leewe mixe. 5Te atlët woo teel halt in en wet laaf, kewint net te prays wën er net ti reechle noo keet. 6Un te pauer woo xweyer xaft mus te eyerxte sin woo sayn teel kriit an te ërnt. 7Tënk an was ich tich am saan sin, wayl te Hër wërt mache tas tuu tas ferxteen tuust.
8Eriner tich an Yeesus Kristus, woo peleept kep is, un nookhomer fon Dawii is, tëm noo te ewankeelium woo ich aan saan. 9Un is tesweche woo ich layte mit mache un sin sokaar mit khete aan kepun, wii wën ich en kriminel weyer. Awer Hërkot sayn mensaaj is net inkexpërt, 10un tesweche tuun ich ales mit ketult aus hale weche em liipe tsum Hërkot sayn aus kesuucht folek. Ich mache tas, tas tii ti retung kriin khëne woo in Yeesus Kristus is un pringt ti eewich kloor. 11Tas is en echt preeticht:
“Wën meyer xon mit Kristus kextorep sin,
tan wëre mer aach mit tëm leewe.
12Wën meyer wayter mit ketult ti layte aus hale,
wëre mer aach mit Kristus rechiire.
Wën meyer iim ap saan, tuut eyer uns aach ap saan.
13Wën meyer net leaal sin, playpt Kristus wayter leaal,
wayl eyer khan net falx fer sich selepst sin.”
En aproweyerte aarwater
14Mach tii woo tuu orienteyerst traan tënke un tuu xtram ortne, in Hërkot sayn presëns, tas se net xtrayte sole weche wërter. Xtrayte is net kuut, wayl tas tuut ploos xaate fer tii woo tepay sin. 15Mach ales was meechlich is fer Hërkot sayn komplët aproweerung fertiine, als en aarwater woo sich net xeemt fon sayn aarwat, awer tuut ti woerheet fom ewankeelium richtich unterichte. 16Playp wech fom kexpreech keeche ti kristliche unterichte, wayl ti mache tas ti layt noch wayter fon Kot playwe. 17Tas tings woo ti falxe mayster unterichte ferprayt sich wii kreps. Tswaay fon tëne mayster sin Himeneu un Filetus, 18woo te weech fon te woerheet neewe kelos hon. 19Awer te feste funtamënt woo Hërkot kesetst hot khan net aan kexutert kewe, un uf tëm funtamënt sin tii wërter kexrip kep: “Te Hër khënt ti layt woo tsu iim keheere.” Un aach: “Yeete persoon woo saat teet tsum Hër keheere mus ti sinte tsurik lose.”
20In en kroos haus kept es net ploos xisle fon kolt un silwer, awer aach fon hols un let. Phaar sin fer spesiaale keleechenheete, un anere, fer yeete taach. 21Weyer sich sauwer macht fon sayn kanse feeler, tii woo ich xon kexproch hon, wërt penutst fer spesiaale keprauche, wayl er is tetikeyert un nutslich fer sayne Mayster un is fërtich fer se mache ales was kuut is. 22Un tuu, Timoteus, rays aus fon te pasioone fon te yuuchent un fersuuch en richtich leewe se leewe, mit klaawe, liipe un friite, pay tëne woo mit en sauwer hërts em Hër sayne hilef ferlange. 23Playp wech fon tume tiskusioone oone weyert, wayl tuu weest tas es am ën imer xtrayt kept. 24Em Hër sayne tiiner tëref net too rom tsënke, awer mus froyntlich um keen mit ale layt. Mus en kuute un ketultiche mayster sin, 25woo mit tsaatlichkheet korijiire tuut tii woo keeche iim sin. Wayl khan sin tas Hërkot tëne en keleechenheet kept fer in sich se fale un ti woerheet khëne lërne. 26Un soo wëre tii tsurik khome an sayne perfekte ferxtant un khome aus te fal fom Taywel, woo se kefang hot fer se mache was eyer wil.
