Pekriisung
1Ich, Phaulus, aphostel fon Yeesus Kristus torich Hërkot sayne wile, woo kexikt kep sin fer aan saan ti ferxprechung fon leewe woo meyer hon wayl meyer fereenicht sin mit Yeesus Kristus, 2xraywe fer tich, Timoteus, mayne liipe soon im klaawe.
Tas te knaate, ti paarmhërtsichkheet un te friite fon Hërkot, te Fater, un fon Yeesus Kristus, unser Hër, mit tich sich ferhalt!
Tank kepeet um konseele
3Yeetes mool woo ich an aych tënke in mayn kepeete, im taach un nachts, tuun ich Hërkot petanke, weyer ich tiine mit sauwere kewise, soo wii mayn foerkhomer aach ketiint hon. 4Ich erinere mich an tayne treene un winxe tich noch mool se siin kriin tas ich mich hërtslich fraye khan. 5Ich erinere mich an tayne echte klaawe, tee selwiche klaawe woo tayn kroos moter Looite un Eunise, tayn mama, hate.
6Tesweche wil ich hon tas tuu traan tënke tuust fer Hërkot sayne kaape leewent hale, woos tuu kriit host wan ich ti hënt iwer tayne khop kehal hon. 7Wayl te Kayst woo Hërkot uns kep hot macht uns khee pang hon; im keeche teel, te Kayst filt uns mit kraft un liipe un macht uns wisent.
8Also, xeem tich net fer tayne tsayer kewe fer unser Hër, un xeem tich aach net fon mich, woo in te katee sin wayl ich tëm sayne tiiner sin. Im keeche teel, mit te kraft woo fon Hërkot khomt, playp fërtich fer mit mich layte weche em liipe tsum ewankeelium. 9Hërkot hot uns keret un hot uns keruuf fer sayn folek se sin. Tas waar net weche was meyer ketuun hon, awer wayl tas sayne plaan waar un weche sayne knaate. Eyer hot uns tee knaate kep torich Yeesus Kristus, eep ti welt ketsoo kep waar. 10Awer yets is se fer uns reweleyert kep torich te kloorixe erxayn fon Yeesus Kristus, unser Reter. Tee hot em toot sayn macht wech kenom un, torich em ewankeelium, tas leewe woo fer imer halt reweleyert.
11Hërkot hot mich raus kesuucht als aphostel un mayster fer te ewankeelium aan saan. 12Is tesweche woo ich tii layte mit mache. Awer ich xeeme mich net, wayl ich wees an weem ich ti kans tsayt keklaapt hon un sin sicher tas eyer kroos macht hot fer uf heepe, pis an tëm taach, tas was eyer fer mich ap kep hot. 13Hool ti echte unterichte woo ich tich kep hon als motel un playp fest im klaawe un im liipe woo mer hon wayl meyer fereenicht sin mit Yeesus Kristus. 14Torich em Hayliche Kayst sayn macht, woo in uns trin leept, heep tee rayche xats uf woo tich ap kep waar.
15Tuu weest xon tas ale priiter in te prowins fon Aasia, sokaar Fiijelus un Hermoojenes, mich in xtich kelos hon. 16Tas te Hër kuut sin sol mit Onesiiforus sayn familye, wayl fiil mools hot tee mich animeyert un hot sich net fon mich kexeemt wayl ich in te katee sin! 17Im keeche teel, klaych woo er in Room aan khom is, hot eyer mich kesuucht pis er mich kefun hot. 18Tas te Hër tëm ti sicherheet kept tas an tëm taach eyer sayn paarmhërtsichkheet kriit! Un tuu weest peser wii ich wii fiil tee mich keholef hot in Ëfesus.
