1Tii woo sklaawe sin sole sayne aychner mit rexpekt pehantle, tas nimant xlecht keeche Hërkot sayne naame xpreche tuut un fon unser unterichte. 2Un ti sklaawe woo en kristliche aychner hon tërfe net te rexpekt ferleere fon tëm wayl tee sayne pruuter im klaawe is. Im keeche teel, mise noch peser xafe, wayl te aychner, woo sayn aarwat kriit, is en krist un peliipte pruuter.
Ti falxe unterichte un ti echt raychtum
Untericht un saa foer tas tings: 3Wën yemant en anerxter untericht in lërne tuut un saat net tsuu mit te waare wërter fon unser Hër Yeesus Kristus un mit te unterichte fon unser relichioon, 4is tee persoon fol mit hoochmuut un wees niks. Tiskuteere un xtrayte iwich wërter is wii en krankheet an tëne mënxe. Un, fon too khome nayt, xtrayt, xëneray un peese mistraue 5un tiskusioone oone ën, wii ti layt woo te ferxtant ferloer hon un khee woerheet mee hon, keweent sin se mache. Tii layt tënke tas relichioon en mitel is fer raych se kewe. 6Is klaar tas ti relichioon en kwel is fon fiil raychtum, awer ploos fer te persoon woo tsufriite is mit was eyer hot. 7Was hon meyer uf ti welt keprung? Niks! 8Also, wën mer ese un tsaych hon, sole mer froo sin mit tëm. 9Awer, ti woo raych kewe wole, fale in sinte, wën se in fersuuchunge fale, un playwe fest in te fal fon fiile tume winxe, woo net kuut tuun un mache ti layt uner keen im unklik un fernichtung. 10Wayl te liipe tsum kelt is en kwel fon aler sorte xlechtes. Un phaar layt, wayl se soo kërn fiil kelt hon wole, hon sich auskewaycht fom klaawe un hon sayn leewe fol laytung kemach.
En leewe fer Hërkot tetikeyert
11Awer tuu, man fon Hërkot, tuu aus rayse fon tas ales. Leep en khorektes leewe, fer Hërkot tetikeyert, mit klaawe, mit liipe, persewerant un mit rexpekt fer ti anere. 12Khëmf te kuute khamf fom klaawe un kewinst tas eewiche leewe. Wayl es waar fer tas leewe woo Hërkot tich keruuf hot wan tuu te xeene tsayche fon klaawe kep host foer fiile tsayer. 13Yets, foer Hërkot, woo es leewe kept fer ale kriatuure, un foer Yeesus Kristus, woo sayne xeene tsayer kept hot foer Ponsio Pilatus, ortne ich tich tas: 14Hal tayn misioon in mit leaaliteet, tas nimant tich fon niks pexultiche khan, un playp soo wayter pis an te taach woo unser Hër Yeesus Kristus tsum foerxayn khome tuut. 15Wan ti richtich tsayt khome tuut, macht Hërkot tas tas paseere tuut, te selwiche Hërkot woo te keseechente un eensichste Kheenich is, te Kheenich fon te kheeniche un te Hër fon te hëre, 16te eensichste woo unxtërwlich is. Eyer leept im licht, un nimant khan too ticht ans licht hiin khome. Nimant hot em nii kesiin, un wërt em net siin khëne. Tsu iim keheere ti eer un ti eewich macht. Aamen!
17Fer tii woo raychtum hon uf tee welt, kep ti ortnung tas se net xtols sole sin un sole net sayn hofnung uf tii raychtum tuun, wayl ti kewe khee een sicherheet. Tas se sayn hofnung an Hërkot tuun sole, woo uns ale tings raychlich kept, fer unser ferkniichung. 18Xik tas se kuutes tuun, tas se raych in kuute akte sin sole, tas se jeneroos sin sole un fërtich fer se teele mit te anere ales was se hon. 19Soo tuun se fer sich en xats samle woo en fest basis fer te futur is. Un soo wëre es leewe kriin, tas echte leewe.
20Timoteus, pas kuut uf was tich ap kep waar fer se wache. Los neewe tas kexpreech woo fer Hërkot net kefale tuut un ti tume tiskusioone iwich was phaar layt, in falx aart, “khëntnis” nëne. 21Phaar layt, am fersichere tas se tee “khëntnis” hate, hon te weech fom klaawe hinerlos.
Seechnung
Tas Hërkots knaate mit aych sich ferhalt!
