Wii pehantle tii woo klaawe.
1Tuu en eltre man net xteere, awer mach tëm kemaane, soo wii tuu fer tayne papa mache teest. Pehantel ti yingere mëner als priiter, 2un ti alte fraae als motere un ti yunge fraae als xwestre, mit ale phuerheet.
3Heleft ti witfraae woo nimant hon fer tëne se helfe. 4Awer, wën en witfraa khiner ore ëngle hot, sin tii woo te eyerxt mise lërne sayn relichioose flichte in hale, sayn aychne familye am uf pase. Soo tuun se petsaale was se kriit hon fon sayn eltre un kroos eltre, wayl Hërkot hot tas kërn. 5Ti echt witfraa, tii woo nimant hot fer se ufpase, tuut sayn hofnung an Kot un tuut peete, im taach un nachts, sayne hilef am ferlange. 6Awer, ti witfraa woo sich tëm ferkniiche ap kept is toot im leewe. 7Timoteo, xik tas ti witfraae mache sole was ich tëne saan tas nimant tëne xult fon niks kewe khëne. 8Awer, tee woo net uf sayn ferwante uf past, ekstra tii fon sayn aychne familye, hot sayne klaawe ap kesaat un is xlechter wii tii woo khee klaawe hon.
9Tuu uf ti liste fon te witfraae noore tii woo mee wii sechtsich yoer alt is un ploos een mool kehayrat hot. 10Sii mus pekhant sin als en fraa woo imer kuutes ketuun hot, sayn khiner kuut ketsoo hot, layt in kaste kenom hot, keweenliche aarwate ketuun hot fer em Hërkot sayn folek, keholef hot tii woo es neetich hate, xliislich, hot aler sort kuutes ketuun.
11Awer, tuu net ti yingere witfraae uf ti liste; wayl, wën se sayn winxe mache tas se noch mool hayrate wole, tuun se Kristus in xtich lose. 12Un soo tuun tii sich xultner mache in ti eyerxt ferxprechung woo se fer iim kemach hon. 13Un noch, ti keweene sich an niks mache un haus tsu haus keen; un, noch xlimer, lërne ratxich se sin, sich in ales am rin mixe un tings xpreche woo se net tërfe. 14Tesweche, wil ich tas ti yingere witfraae hayrate, sole khiner hon un sayn haus uf pase, tas unser faynte khee uersach hon fer keeche uns se xpreche. 15Wayl etliche witfraae hon sich xon aus kewaycht un sin Satanas noo kang.
16Wën en fraa witfraae in sayn familye hot, mus tii se helfe. Tas se net tee last uf ti khërich tuut, tas ti khërich ti witfraae woo nimant hon woo se heleft uf pase tuut!
17Ti eltre woo en kuut aarwat mache in te khërich fertiine en topelte loon, ekstra tii woo sich aanxtrënge fer te ewankeelium aan saan un ti kristlich untericht. 18Wayl ti Hayliche Xrifte saan: “Pint net em oks sayn maul tsu wën tee te weets am fertreete is.” Un saan noch: “Te aarwater hot ti recht fer sayne loon se kriin.” 19Nëm khee akusatsioon aan keeche ti eltre, sonst wën tas weenichstens fon tswaay tsayer kemach kept. 20Xteyer in puplikum ti woo sinte mache, tas ti anere pang kriin.
21In Hërkot sayn presëns, pay Yeesus Kristus un fon te hayliche ëngle, ferlange ich un insisteere truf: in ales was tuu mache tuust, heyer tii instruktsioone aan, oone nimant prejutikeere ore yemant faworiseere. 22Solst khee ayl hon fer yemant am Hër sayn aarwat tuun. Hal khee teel an te anere sayn sinte. Pehal tich phuer.
23Wayl tuu oft krank kepst am maache, trink net ploos waser, awer als mool aach en pisye wayn.
24Ti sinte fon etliche layt khëne klaar kesiin kewe, sokaar eep se julkeyert kewe. Awer, ti sinte fon anere layt kewe ploos xpeeter kesiin. 25Soo aach ti kuute aktsioone kewe klaar kesiin un sokaar tii woo xwiirich se siin sin khëne net ferxtekelt playwe fer imer.
