1Timoteus 4

₁Te Kotes Kayst saat kans klaar tas, an te letste tsayte, tuun etliche te klaawe in xtich lose. Wëre acht kewe fer liichner kayste un unterichte woo fon temoone khome. ₂Tii unterichte kewe ferteelt torich xaynhayliche mënxe un liichner, mënxe woo sayn kewise xon toot is, wii wën se ferprënt kep weyer mit hays ayse. ₃Tii mënxe unterichte tas es ferkheyert is hayrate un etliche naarungs mitle ese. Awer, Hërkot hot tii naarungs mitle ketsoo tas tii woo klaawe un ti woerheet khëne tii ese noo en tank kepeet mache. ₄Ales was Hërkot ketsoo hat is kuut, un, soo, niks tëref ap kesaat kewe. Tas ales aan kenom kept mit en tank kepeet ₅wayl torich Hërkot sayn wort un es kepeet wërt ales kehaylicht!

₆Wën tuu tii instrutsioone kewe tuust fer ti priiter im klaawe, pist tuu en kuute tiiner fon Yeesus Kristus, sich kaystlich am neere mit te unterichte fom klaawe un mit te echte unterichte woo tuu am noo keen pist. ₇Awer, solst niks se tuun hon mit te tume pakaane faaple. Fer foran se khome im kristliche leewe, mach imer kaystliche iipunge. ₈Wayl ti fiisike iipunge hon etliche keprauch, awer ti kaystlich iipung hot weyert fer ales, wayl sayne resultaat is tas leewe, fer yets un fer te futur. ₉Tas is en waares wort un mus keklaapt un aan kenom kewe mit em kans hërts. ₁₀Is tesweche woo meyer khëmfe un fiil xafe, wayl mer tuun unser hofnung am leewente Hërkot, woo te Reter fon ale layt is, ekstra fon tëne woo klaawe.

₁₁Tuu tas kuut aan saan un lërn tëne tas tings. ₁₂Los nimant tich unich ti fiis hoole ploos wayl tuu yung pist. Awer, fer tii woo klaawe, say en payxpiil mit tayn reet, mit tayn tuun, im liipe, im klaawe un in phuerheet. ₁₃Soo lang wii tuu waarte tuust tas ich aan khome, tetikeyer tich fer ti Hayliche Xrifte foer leese fer tas folek, fer te ewankeelium aan saan un ti kristlich untericht. ₁₄Tuu net te kaape woos tuu host neewe lose, woo Hërkot tich kep hot wii ti profëte fon te Khërich kexproch hon, un te krupe fon eltre tich ti hënt iwer te khop kehal hon fer tich se tetikeere fer Hërkot sayn aarwat.

₁₅Praktiseyer tas tings un tetikeyer tich hiin tas tayne foran xrit kesiin kewe khan fon ale layt. ₁₆Pas tich selepst uf un uf was tuu unterichte tuust. Mach tas soo wayter, wayl soo tuust tuu tich selepst rete wii tii woo tich aan heere.