Filemon 1

₁Ich, Phaulus, im kefangnis weche Yeesus Kristus, mit em pruuter Timoteus, xraywe tee priif fer tich, Fileemon, unser froynt un khameraate in te aarwat, ₂un fer ti khërich woo sich in tayn haus fersamle tuut. Tee priif keet aach fer unser xwester Aafia un fer Arkipo, unser khameraate im khamf. ₃Tas te knaate un te friite fon Hërkot, unser Fater, un fom Hër Yeesus Kristus mit aych sich ferhalt!

₄Mayne liipe Fileemon, imer wën ich peete, tënke ich an tich un tanke fer mayne Hërkot ₅wayl ich hon keheyert xpreche iwer tayne liipe fer tas kanse Hërkots folek un fom klaawe woos tuu host an te Hër Yeesus. ₆Ich pite fer Hërkot tas te klaawe woo tich mit uns fereenicht mache khan tas mer tiifer ferxteen khëne ale seechnunge woo meyer xon kriit hon in unser leewe in Kristus. ₇Mayne liipe pruuter, tayne liipe kept mich kroos frayt un fiil koraaj, wayl tuu tas hërts fom kanse Hërkots folek am animeere pist.

₈Tesweche, als tayne pruuter in Kristus, wees ich tas ich ti recht hon tich ferlange was tuu mache must. ₉Awer te liipe woo ich an tich hon tswinkt mich tich ploos een pitung mache. Un mache tas, wën ich ach Phaulus sin, te representant fon Yeesus Kristus un yets aach im kefangnis weche tëm. ₁₀Also, ich pite tich fer Onëësimus, woo mayne soon is in Kristus, wayl, soo lang wii ich in te katee waar, sin ich tëm sayne kaystliche fater kep. ₁₁Tefoer waar tee unnustlich fer tich un fer mich.

₁₂Ich sin Onëësimus tsurik am xike an tich, un mit tëm keet mayn hërts. ₁₃Ich teet em kërn tswinge hier mit mich playwe, soo lang wii ich in te katee sin weche em ewankeelium, tas tee mich helfe khënt uf tayn plats. ₁₄Awer, ich mache niks oone tas tuu tsuu saast, tas te kefale woo ich tich am ferlange sin net kemach kept als en flicht, awer mit tayne fraye wile.

₁₅Khan sin tas Onëësimus fon tich wech kehool kep waar iwer en tsayt tas tuu en tsurik kriist fer imer. ₁₆Wayl yets is eyer khee sklaawe mee, awer fiil mee wii tas: is en liipe pruuter in Kristus. In te woerheet, fer mich is eyer kans liip. Un fer tich is eyer yets noch mee liip, net ploos als sklaawe, awer aach als en pruuter im Hër.

₁₇Tesweche, wën tuu mich en khameraate in te aarwat rechenst, tuu Onëësimus tsurik uf nëme wii wën tuu mich selepst am uf nëme weyerst. ₁₈Wën tee tich etwas ferluste kep hot ore tich etwas xultich is, tuu tas uf mayn rechnung. ₁₉Hier, mit mayn aychne hant xraywe ich tas: Ich, Phaulus, petsaale ales. Is sicher tas ich tich net erinere mus tas tuu mich tayn aychne leewe xultich pist. ₂₀Also, mayne pruuter, tuu mich tee kefale, weche em Hër. Animeyer mayn hërts, als pruuter in Kristus.

₂₁Tas am xraywe, sin ich sicher tas tuu machst was ich ferlange un wees tas tuu noch fiil mee mache tuust. ₂₂Ich pite aach tas tuu en tsimer prepareyerst fer mich, wayl ich hofe tas Hërkot ayre kepeete aan heere tuut un mich noch mool tsu aych khome lost.

₂₃Epafras, te pruuter woo in te katee is mit mich weche Yeesus Kristus, xikt tich pekriisunge. ₂₄Un Markus, Aristarkus, Temas un Lukas, mayn khameraate in te aarwat, xike aach pekriisunge.

₂₅Tas te knaate fom Hër Yeesus Kristus mit aych sich ferhalt!