Yeesus Kristus, Hërkot sayn perfekt rewelatsioon
1In te ferkangne tsayt, torich ti profëte, hot Hërkot oft kexproch uf fiile aarte fer unser foerkhomer, 2awer in te letste tsayte hot eyer fer uns kexproch torich sayne Soon. Es waar tee woo Hërkot raus kesuucht hot fer ales se ërpe un torich tëm hot Hërkot te Uniwërs ketsoo. 3Te Soon klënsnt mit em klans fon Hërkot sayn kloor un is perfekt ekaal mit em aychne Kot. Tee halt te Uniwërs mit sayn mechtich wort. Un, wii eyer ti mënxe fon sayn sinte pefrayt hat, hot eyer sich im himel uf ti rechts sayt fom Almechtiche Hërkot kesetst.
Te Soon un ti ëngle
4Soo hot Hërkot kemach tas te Soon in en heecher xtel weyer wii ti ëngle un hot tëm en naame kep woo heecher is wii te ëngle sayne naame. 5Wayl Hërkot hot nii fer khee fon sayn ëngle kesaat:
“Tuu pist mayne Soon; hayt sin ich tayne Fater kep.”
Un saat aach net iwich khee ëngel:
“Ich kewe tëm sayne Fater, un tee wërt mayne Soon.”
6Awer, wan Hërkot sayne eyerxte Soon tsu ti welt kexikt hot, saat eyer:
“Tas ale Hërkots ëngle iim atoreere.”
7Iwich ti ëngle, saat Hërkot:
“Hërkot macht tas sayn ëngle sich in wint transformeere,
un sayn tiiner, in fayer flame.”
8Awer iwich te Soon saat eyer:
“Tayne Raych, oh Hërkot, halt fer ti eewichkheet.
Tuu wërst tayn folek kowerneere mit justis.
9Tuu liipst was kuut is un tuust hase was xlecht is.
Es waar tesweche woo Hërkot, tayne Hërkot, tich raus kesuucht hot
un hot tich ti frayt kep fer en eere se kriin fiil kreeser wii tayn khameraate.”
10Un ti Xrifte saan aach:
“Tuu, Hër, host am aanfang ti eyert ketsoo
un, mit tayn aychne hënt, host tuu te himel kemach.
11Ti eyert un te himel keen rom,
awer tuu wërst fer imer leewe.
Tii kewe alt wii tsaych;
12tuu wërst se falte wii mer en yake falte tuut,
un wëre ketrokt wii mer tsaych um tsiye tuut.
Awer tuut pist imer te selwiche,
un tayn leewe hot khee ën.”
13Hërkot hot nii kesaat fer khee fon sayn ëngle:
“Sets tich uf mayn rechts sayt,
pis ich tayn faynte als pootium unich tayn fiis tuun.”
14Tan, was sin ti ëngle? Tii al sin kayste woo Hërkot tiine, woo eyer xike tuut fer se helfe tii woo ti retung kriin tuun.
