Ti kroos retung
1Tesweche mise meyer mee acht kewe an ti woerheete woo meyer keheyert hon, fer uns net fon tëne auswayche. 2Is khee tswayfel tas ti mensaaj woo kep waar torich ti ëngle echt is; un tii woo net noo kang sin un woo se net aan keheyert hon, hon te xtroof kriit woo se fertiint hate. 3Soo, wii khëne mer uns rete fom xtroof wën mer khee acht kewe an soo en kroos retung? Eyerxt, te aychne Hër Yeesus hot tii retung aan kesaat; un, tëm noo, tii woo tas aan keheyert hon, hon uns pewayst tas se echt is. 4Un torich sinaale fon macht, wunerlichkheete un fiile sorte wunere, hot Hërkot tëne sayne tsayer tsuu kesaat. Un, tëm noo mit sayne wile, hot eyer ti kaape fom Hayliche Kayst aach ferteelt.
Yeesus Kristus, te Reter
5Also, Hërkot hot net fer ëngle ti macht kep fer ti nay welt kowerneere woo khome sol, ti welt fon tëm meyer am xpreche sin. 6Im keeche teel, in en thekst fon te Hayliche Xrifte fersichert yemant:
“Was is en mënx, oh Hërkot,
tas tuu an tëm tënke tuust?
Was is te soon fom man
tas tuu tich um tëm khimerst?
7Tuu host em fer en khorts tsayt hin ketuun
in en erniitricht positsioon wii ti ëngle,
tuu host tëm ti kloor un ti eere fon en kheenich kep
8un host aler tings unich sayn rechiirung ketuun.”
Wën mer saat tas Hërkot “aler tings unich sayn rechiirung ketuun” hot, tas mënt tas niks traus keplip is. Awer, meyer siin noch net tas eyer hayt aler tings kowerneere tuut. 9Awer meyer siin Yeesus, woo Hërkot fer en khorts tsayt in en positsioon uner ti ëngle ketuun hot, tas, torich Hërkot sayne knaate, eyer xtërwe teet fer aler mënxe. Yets siin meyer iim kekroont mit kloor un eere weche em toot woo eyer mit kemach hot. 10Wayl Hërkot, woo aler tings tsiit un unerxtitst, kemach hot was richtich waar un hot Yeesus perfekt kemach torich sayne layte. Hërkot hot tas kemach tas fiile, was mënt, sayn khiner, teel nëme khënte in Yeesus sayn kloor. Wayl is Yeesus weyer se fiire tuut fer ti retung.
11Yeesus tuut ti layt purifikeere fon sayn sinte; un al, eyer un aach tii woo purifikeyert sin, hon te selwiche Fater. Is tesweche woo Yeesus sich net xeeme tuut tëne priiter nëne. 12Wii eyer saat:
Oh Hërkot, ich xpreche iwer tich fer mayn priiter
un tuun tich loope im folek sayn fersamlung.
13Eyer saat aach: “Ich hon konfians an tee.” Un saat noch: “Hier sin ich mit te khiner woo Hërkot mich kep hot.”
14Ti khiner, wii eyer se nëne tuut, sin layt fon flayx un pluut. Un torich sich selepst hot Yeesus sich ekaal kemach mit tëne, teel am hale in tëne sayn mënxlich natuer. Tee hot tas kemach tas, torich sayne toot, eyer khënt te Taywel fernichte, woo kraft hat iwer te toot. 15Un ach fer pefraye tii woo sklaawe waare iwer es kanse leewe weche em pang fom toot. 16Is sicher tas tee net ti ëngle helfe khom is. Anxtat, wii ti Xrifte saan: “Eyer heleft Aapraham sayn nookhomer.” 17Tas mënt tas es neetich waar tas Yeesus in ales ekal sich mache must wii sayn priiter fer tëne sayne Hooche Prister sin, kuut un leaal in sayn aarwat fer Hërkot, tas ti sinte fom folek fertsayert keepte. 18Un yets khan Yeesus helfe tii woo fersuucht kewe, wayl eyer selepst waar fersuucht kep un hot layte mit kemach.
