Yeesus un Mooses
1Mayn priiter im klaawe, teyer woo aach fon Hërkot keruuf kept waare, kukt uf Yeesus, woo Hërkot kexikt hot fer te Hooche Priister sin fom klaawe woo meyer profeseere. 2Wayl tee leaal waar fer Hërkot, woo iim raus kesuucht hat fer tii aarwat, soo wii Mooses leaal waar in sayn aarwat im kans Hërkot sayn haus. 3Soo wii te persoon woo en haus paut mee important is wii tas haus, soo aach is Yeesus mee important wii Mooses. 4Yemant mus en haus uf paue, awer Hërkot is te pauer fon ales was eksisteyert. 5Un Mooses waar en leaale tiiner in sayn aarwat an Hërkot sayn haus un hot fom tings kexproch woo Hërkot xpeeter hiin xpreche teet. 6Awer Kristus is leaal als Soon, woo em Hërkot sayn haus fiire tuut. Un meyer wëre sayn haus sin wën meyer unser koraaj pehale un unser xtolseerung an was meyer hofe.
Ti ruu fer Hërkot sayn folek
7Tesweche, wii te Hayliche Kayst saat:
“Wën teyer hayt Hërkot sayn xtim heere tuut,
8sayt net tik khopich wii ayre foerkhomer waare
wan se sich rewolteyert hon keeche iim,
am taach woo se em in proop kextelt hon im tesërt.
9Too hon ayre foerkhomer mich kefortert un hon mich in proop kextelt,
wën se ach kesiin hate was ich kemach hat iwer lange fërtsich yoore.
10Tesweche hon ich mich keayert mit tëne layt un saat:
‘Tas sin layt woo en xlecht hërts hon
un wole net mayn kepoote aan heere.’
11Ich sin pees kep un hon tii xwoorung kemach:
‘Ti keen nii ins Ferxprochne Lant rin, woo ich tëne ruu kep het!’”
12Mayn priiter, past uf tas khee ëne fon aych soo en xlecht un unklaawent hërts wërt hon, woo wech fom leewente Hërkot nëmt. 13Im keeche teel, soo lang woo te “hayt” fon was ti Hayliche Xrifte xpreche sich fer uns aan wëne tuut, animeyert ëne te anere, tas nimant fon aych sich hinerkeen lost fon te sinte, net sayn hërts hart kewe lost. 14Wayl meyer wëre khamerate sin fon Kristus wën mer wayter xtram playwe pis ans ën im klaawe woo mer hon tsayt am aanfang.
15Tas is was ti Hayliche Xrifte saan:
“Wën teyer hayt Hërkot sayn xtim heere tuut,
sayt net tik khopich wii ayre foerkhomer waare
wan se sich rewolteyert hon keeche iim.”
16Weyer waars woo Hërkot sayn xtim keheyert hot un hot sich keeche iim rewolteyert? Waare al tii woo Mooses aus em Ejipt kefiert hot. 17Mit weem waars woo Hërkot sich keayert hot iwer fërtsich yoore? Waar mit tëne woo sinte kemach hon un toot kefal sin im tesërt. 18Un fon weem waar es tas Hërkot am xpreche waar wii eyer tii xwoorung kemach hot: “Tii keen nii rin in tas Ferxprochne Lant, woo ich tëne ruu kep het?” Tee waar am xpreche fon te layt woo sich rewolteyert hate. 19Also, meyer siin tas tii net khonte ins Ferxprochne Lant rin khome wayl se khee klaawe hate.
