1Hërkot hot uns ferxproch tas mer khëne te ruu kriin woo eyer kesaat hat. Also, meyer mise kuut uf pase tas Hërkot net julkeyert tas ëne fon aych feeler kemach hot, un soo net tee ferxprochne ruu kriin. 2Wayl, soo wii tii mënxe keheyert hon, soo hon meyer aach ti kuut naychkheet keheyert. Tii hon ti mensaaj keheyert awer tii hot tëne niks kuutes ketuun wayl, wii se tii keheyert hon, hon se net mit klaawe aan kenom. 3Also, meyer, tii woo klaawe, kriin te ruu woo Hërkot ferxproch hot, wii eyer selepst saat:
“Ich sin pees kep un hon kexwoert:
‘Tii keen nii in tas Ferxprochne Lant,
woo ich tëne te ruu kep het!’”
Tee hot tas kesaat, wën ach sayn aarwat xon fërtich waar tsayt eyer ti welt ketsoo hat. 4Wayl iwer te sipte taach is kexrip in selich teel fon te Hayliche Xrifte: “Am sipte taach hot Hërkot keruut fon te kans aarwat woo eyer kemach hat.” 5Un tee selwiche theema kept noch mool kesaat: “Tii khome nii ins Ferxprochne Lant, woo ich tëne te ruu kep het.” 6Tii woo ti eyerxte waare ti kuut naychkheet se heere kriin hate khee klaawe un, tesweche, hon se net tee ruu kriit. Also, sin anere woo erlaupt sin tee ruu se kriin. 7Ti pewaysung is tas Hërkot en anere taach aan kept, “hayt” kenënt. Eyer hot fon tëm kexproch, fiile yoore tëm noo, torich Dawii, in te Xrifte xon kenënt:
“Wën teyer em Hërkot sayn xtim heyert,
sayt net tik khopich.”
8Wën Yooshua tee ruu fer es folek kep het, het Hërkot net xpeeter hiin kexproch iwer en anere taach. 9Soo playpt noch fer em Hërkot sayn folek en ruu, wii Hërkot keruut hot am sipte taach. 10Wayl, weyer ti ruu kriit woo Hërkot ferxproch hat, wërt ruue fon sayn kanse aarwate wii Hërkot keruut hot fon sayn aarwate. 11Also, meyer mise ales mache fer tee ruu se kriin, un soo khee ëne fon uns playpt oone tas se kriin, wii es paseyert is mit tëne layt, wayl tii sich rewolteyert hon. 12Wayl em Hërkot sayn wort is leewent un mechtich, mee wii en xwaart woo uf te tswaay sayte xnayt. Tas keet pis ans tiifste plats fon te seel un fom kayst, keet pis ans inerxte fon te layt un julkeyert ti wunxe un ti ketanke fon tëne sayn hërts. 13Es kept niks woo mer ferxtekle khan fon Hërkot. In te kans kriatsioon, ales is uf ketekt un uf foer tëm sayn aue, un is mit tëm woo meyer al mise unser rechnunge ap mache.
Kristus, te ewiiche Hooche Priister
14Also, lost uns fest playwe im klaawe woo mer aan saan, wayl meyer hon en mechtiche Hooche Priister, Yeesus, Hërkot sayne Soon, tee woo in te aychne presëns fon Hërkot rin kang is. 15Unser Hooche Priister is net wii tii woo net khëne unser xwachheete ferxteen. Kraat es keeche teel, meyer hon en Hooche Priister woo aach fersuucht kep is soo wii meyer, awer hot khee sinte kemach. 16Tesweche, mise meyer klaawe un ticht an Hërkot sayne troon khome, woo em Hërkot sayne knaate is. Too woole meyer ti paarmhërtsichkheet kriin un te knaate aan trefe, imer wën meyer hilef prayche.
