Hepreyer 5

₁Yeete hooche priister kept raus kesuucht unich te mëner un kept kenënt fer Hërkot se tiine fer tas folek se pehelfe, ti opfere un kaape am presenteere fer Hërkot fer tëne iire sinte. ₂Wii eyer selepst sayn xwachheete hot, khan tee ketult hon mit te iknorante un mit tëne woo feeler mache. ₃Un, wayl eyer selepst xwach is, mus er opfere mache net ploos fer em folek sayn sinte, awer aach fer sayn aychne sinte. ₄Nimant tuut ti eere fer hooche priister sin fer sich selepst aus suuche. Is ploos torich Hërkot sayne wile woo en man keruuf kept fer hooche priister sin, wii es mit Aaron paseyert is.

₅Soo hot Kristus aach net fer sich selwer ti eere kenom fer Hooche Priister sin; es waar Hërkot weyer iim ti eere kep hot, woo tsu iim saat:

₇Iwer sayn leewe hier uf te eyert, hot Kristus, in hat xtim un mit treene, fiile kepeete kemach fer Hërkot, woo iim rete khont fom toot. Un sayn kepeete sin aan keheyert kep, wayl eyer tetikeyert waar fer Hërkot. ₈Eyer waarr Hërkot sayne Soon, un toch must eyer lërne torich ti layte woo eyer mit kemach hot, sayne Fater aan heere. ₉Un, tëm noo Hërkot iim perfekter kemach hot, is eyer ti kwel fon te eewich retung kep fer al tii woo iim aan heere. ₁₀Un Hërkot hot iim Hooche Priister kenënt, in te priister ortnung fon Melkisetëk.

₁₁Meyer hon fiil se saan iwer tee phunkt; awer wayl teyer lang tauert fer es tings se ferxteen, is es net laycht tas ausleye. ₁₂Noo soo lang tsayt, solt teyer xon mayster sin, awer mist noch yemant hon woo aych noch ti eyerxte lektsioone in lërne tuut fon Hërkot sayn unterichte. Anxtat fest naarung, praycht teyer noch milich. ₁₃Un weyer milich prauch is noch en khint un hot khee eksperiëns fer se wise was richtich ore ferkheyert is. ₁₄Awer tas ese fer auskewakste layt is khee pray, wayl tii wise, torich ti praksis, te unerxiit tswixe was kuut ore was xlecht is.