1Soo, keen mer foran fer an ti untericht fon kroos kewakste layt khome, un ti eyerxte lektsioone fon Kristus sayn mensaaj tsurik lose. Meyer tuun net noch mool aus leye ti basis fon tee mensaaj, was mënt, ti neetichkheet fer en unnutslich leewe neewe lose un fer an Hërkot klawe. 2Meyer tuun net noch mool aus leyte ti basis fon ti untericht iwer taafunge, iwer ti seremonii fer ti hënt iwer ti layt hale, iwer ti ufxtayung fon te toote un te eewiche julkamënt. 3Yets keen mer foran! Un, wën Hërkot wil, tas is es woo meyer mache.
4Wii khëne ti layt woo sayne klaawe hinerlos hon sich noch mool royere? Ti waare xon im Hërkots licht. Hate xon te kaape fon Hërkot keproopt kehat un sayn teel fom Hayliche Kayst kriit kehat. 5Hate xon kekhënt kehat torich aychne eksperiëns tas Hërkot sayn wort kuut is un hate xon ti macht fon te welt woo khome sol keproopt kehat. 6Awer, tëm noo hon se te klaawe neewe kelos. Is unmeechlich mache tas tii layt sich noch mool royere, wayl sin Hërkot sayne Soon noch mool am pekraytse un iim am ferxpote in puplikum.
7Hërkot seechent ti eyert woo te reen uf nëmt, woo oft uf se falt un nutsliche planse protutseyert fer tii woo too traan xafe. 8Awer ti eyert woo heke un tëner protutseyert tiint fer niks; ti is in kefoer tas Hërkot se ferfluuche tuut un tas se tan ëntlich ferprënt kept.
9Awer, wën mer ach soo xpreche, mayn liipe priiter, sin mer sicher tas teyer ti peste seechne het woo fon te retung khome. 10Hërkot is net unkerecht. Tee ferkest net ti aarwat woo teyer kemach hat net mool te liipe woo teyer iim ketsaycht hat im hilef woo teyer kep het un noch am kewe sayt fer ayre priiter im klaawe. 11Unser tiife wunx is tas yeete ëne fon aych wayter macht mit entusiasmus pis ans ën, tas teyer wërklich kriit was teyer hoft. 12Meyer wole net hon tas teyer faulënser kept, awer tas teyer sayt wii tii woo klaawe un ketult hon, tas soo teyer kriit was Hërkot ferxproch hot.
Sicherheet uf Hërkot sayn ferxprechung
13Hërkot hot ti ferxprechung kemach fer Aapraham un hot kexwoer se in hale. Un, wii nimant heecher is wii eyer selepst, hot Hërkot in sayne aychne naame kexwoert. 14Eyer saat fer Aapraham: “Ich ferxpreche tas ich tich raychlich seechne un kewe tich fiile nookhomer.” 15Aapraham hat ketult un tesweche hot eyer kriit was Hërkot ferxproch hat. 16Wën yemant xwoert, penutst en naame woo kreeser is wii eyer, un ti xwoorung tuut ale tiskusioon xtil xtele. 17Hërkot wolt kans klaar mache fer tii woo kriin teere was eyer ferxproch hat tas eyer nii sayn tesisioon ferënere teet. Tesweche, mit sayn ferxprechung, hot Hërkot ti xwoorung kemach. 18Also, sin tswaay tinger woo net ferënert kewe khëne, un iwich tii khan Hërkot net liye. Un soo meyer, woo sicherheet an tëm fine, fiile uns mit fiil koraaj fer uns fest hale in te hofnung woo uns kep waar. 19Tii hofnung halt unser leewe sicher un xtram, soo wii en ankor te poot sicher halt. Tii hofnung keet torich te foerhank fom thëmpel fom himel un keet in tas himlixe Haylichste Plats. 20Es waar tort woo, fer kuut fer uns, Yeesus rin kang is foer uns. Un eyer is fer imer te Hooche Priister fon te priister ortnung fon Melkisetëk kep.
