Melkisetëk, kheenich un priister
1Tee Melkisetëk waar kheenich fon te xtat Salëm un priister fom Heechste Hërkot. Wan Aapraham tsurik am khome waar fom kriich woo eyer ti kheeniche niter kexlaa hot, is Melkisetëk tëm inkeeche kang un hot em keseechent. 2Aapraham hot tëm ti tseent teel kep fon ales was eyer fon te faynte im kriich wech kenom hat. Te naame Melkisetëk petayt eyerxt “Kheenich fon te Justis”. Un, wayl eyer kheenich fon Salëm waar, petayt sayne naame aach “Kheenich fom Friite”. 3Net mool te fater un net mool ti moter fon Melkisetëk sin pekhant, un net mool en foerkhomer. Un aach niks fon sayn kepoer ore toot is pekhant. Wayl eyer is wii te Soon fon Hërkot, playpt eyer wayter als priister fer imer.
4Kukt mool wii kroos Melkisetëk waar: Aapraham, te patriark, hot tëm ti tseent teel kep fon ales was eyer fon te faynte wech kenom hat im kriich. 5Tëm noo Mooses sayn Kesets, ti priister, woo nookhomer sin fon Lewii, hon ti flicht fer ap hoole fom folek tas tseente teel fon ales. Ti kriin tas fon sayn aychne folek, wën ti ach nookhomer fon Aapraham sin. 6Melkisetëk waar net nookhomer fon Lewii, awer hot ap kehool tas tseente teel fon was Aapraham wech kenom hat im kriich, hot te aychne Aapraham, woo ti ferxprechunge fon Hërkot kriit hat, keseechent. 7Is khee tswayfel tas tee woo seechent mee important is wii tee woo keseechent kept. 8Im fal fon te priister, tas tseente teel kept ap kehool fon mëner woo en taach xtërwe tuun. Awer in Melkisetëk sayne fal, wii ti Hayliche Xrifte saan, tas tseente teel is ap kehool kep fon yemant woo wayter leewent is. 9Also, wan Aapraham tas tseente teel petsaalt hot, hot Lewii, woo tas tseente teel ap hoolt, aach en tseente teel petsaalt. 10Wayl Lewii waar noch net uf ti welt khom, un, soo wii mer saat, waar noch im khërwer fon sayne foerkhomer Aapraham wan tee sich ketrof hot mit Melkisetëk.
11Ti kesets woo tas folek fon Israël kriit hot hat sayn basis im priistertum fon te lewite. Tan, wën ti aarwat fon te lewite priister perfekt kewees weyer, weyer es net neetich tas en aner sort fon priister tsum foerxayn khome teet, noo te priister ortnung fon Melkisetëk un net noo te priister ortnung fon Aaron. 12Wayl, wën mer te priistertum ënert, mus ti kesets aach ferënert kewe. 13Un unser Hër Yeesus, iwich weem tas tings kesaat kept, hot tsu anere xtam keheyert. Un nimant fon tëm xtam hot nii als priister ketiint. 14Is pekhant tas Yeesus, unser Hër, tsum xtam fon Yutaa keheyert hot, un Mooses hot niks kesaat iwich tee xtam Yutaa wan eyer iwer ti priister kexproch hot.
En anere priister wii Melkisetëk
15Un tas ales is kans klaar kep, wayl is en anere priister tsum foerxayn khom, eenlich mit Melkisetëk. 16Eyer waar net priister kemach kep torich ti kesetse ore mënxliche reechle, awer hot sich priister kemach torich ti macht fon en leewe woo khee ën hot. 17Wayl ti Hayliche Xrifte saan:
“Tuu wërst priister sin fer imer,
in te priister ortnung fon Melkisetëk.”
18Soo, is ti friirix reechel anuleyert kep, wayl se xwach un unnutslich waar. 19Wayl ti kesets khont niks perfekt mache. Awer, yets hot Hërkot uns en peser hofnung kep, woo torich meyer ticht an iim khome.
20Un noch, is Hërkot sayn xwoorung. Hërkot hot net kexwoert wan ti anere priister inkesetst kep sin. 21Awer, Yeesus waar mit en xwoorung inkesetst kep, wayl Hërkot saat tëm:
“Te Hër hot kexwoert un treet net tsurik.
Eyer saat: ‘Tuu wërst priister sin fer imer.’”
22Tesweche, tii unerxiit macht aach tas Yeesus ti karantii is fon en peser alians.
23Is noch en unerxiit: ti anere priister waare fiile kewees, wayl se kextorep sin un khonte net sayn aarwat wayter mache. 24Awer Yeesus leept fer imer un sayne priistertum is fer imer. 25Un tesweche khan eyer, hayt un imer, ti mënxe rete woo tsu Hërkot keen torich iim, wayl Yeesus leept fer imer um se ferlange fer ti mënxe.
26Tesweche is Yeesus te Hooche Priister woo meyer prayche. Eyer is perfekt un hot khee sinte ore feeler. Tee is ap keteelt kep fon te sinter un kehoop kep iwer te himel. 27Eyer is net wii ti anere hooche priister. Eyer prauch khee opfere mache yeete taach, eyerxt weche sayn aychne sinte un nochter weche em folek sayn sinte. Eyer hot en opfer kemach, een mool fer al, wan eyer sich selepst keopfert hot. 28Mooses sayn Kesets hot mëner raus kesuucht, woo imperfekt sin fer hooche priister sin. Awer, torich Hërkot sayn ferxprechung mit en xwoorung, en ferxprechung woo noo Mooses sayn Kesets khom is, hot Hërkot te Soon raus kesuucht, un te Soon is perfekt kep fer imer.