Yeesus, te Hooche Priister fon te nay alians
1Tas importanteste tings fon ales was meyer am saan sin hat se tuun mit em priister woo meyer hon: tee is te Hooche Priister woo im himel sitst, uf te rechts sayt fom troon fon Hërkot, te Aler Mechtiche. 2Eyer macht sayn aarwat im Haylichste Plats, in te echt Hit woo te Hër uf kextelt hot, un net ti mënxe.
3Yeete hooche priister kept raus kesuucht fer ti kaape un opfere fon fii fer Hërkot presenteere, un tesweche is es neetich tas unser Hooche Priister aach etwas hot fer se opfere. 4Wën eyer uf te eyert weyer, weyer er uf khee aart en priister, wayl es kept priister woo ti opfere presenteere tëm noo Mooses sayn Kesets. 5Ti aarwat woo tii priister mache is in te woerheet noore en khopii un en xate fon was im himel is. Is tas woo paseyert is wan Hërkot mit Mooses kexproch hot. Wan Mooses ti Hit uf xtele wolt, hot Hërkot kesaat: “Kep acht fer ales se mache tëm noo te motel woo ich tich ketsaycht hon uf em përich.” 6Awer yets is Yeesus peruuf kep fer en fiil heecher priister aarwat als tii anere priister sayns. Wayl ti alians woo eyer kriit hot is en peser alians, wayl se sayn basis hot uf te ferxprechung fon peser tings.
7Wayl, wën ti eyerxt alians perfekt kewees weyer, weyer es net neetich en nay alians se mache. 8Awer Hërkot siit tas sayn folek xult hot un saat:
“Ti tsayt is am khome, saat te Hër,
woo ich en nay alians mache
mit em folek fon Israël
un mit em folek fon Yutaa.
9Tii alians is net wii tii
woo ich kemach hat mit tëne iire foerkhomer,
am taach woo ich tii an ti hant kehool hon
un hon se aus em Ejipt lant kefiert.
Tii waare net leaal keplip
uf ti alians woo ich mit tëne kemach hat,
un, tesweche, saat te Hër,
hon ich khee acht tëne mee kep.
10Wan tii tsayt khome tuut, saat te Hër,
mache ich tii alians mit em folek fon Israël.
Ich tuun mayn kesetse in tëne sayne sin
un in tëne sayn hërts tuun ich se rin xraywe.
Ich wëre tëne sayne Hërkot sin, un tii wëre mayn folek sin.
11Nimant wërt prayche sayne pruuter in lërne
net mool sayne ferwante, am saan:
‘Tuu te Hër khëne lërne.’
Wayl al wëre mich khëne,
soo fiil ti keringste layt
kraat soo wii ti importanteste.
12Wayl ich wërt sayn sinte fertsaye
un nii mee an sayn xlechtichkheete traan tënke.”
13Un, wën Hërkot fon te nay alians xprecht, is wayl eyer ti eyerxt xon alt kemach hot. Un was alt am kewe is un auskenutst, tas wërt klaych ferxwine.
