Hepreyer 9

₁Ti eyerxt alians hat kesetse iwer ti aanpeetung un hat aach en thëmpel woo ti mënxe kepaut hate, woo mer Hërkot aan kepeet hot. ₂Waar en Hit uf kextelt kep, in tswaay teele keteelt. In te foer teel, “Haylich Plats” kenënt, waare te kantelaaper un te tix mit te proot fer Hërkot keopfert keplip. ₃Hinich em tswete foerhank is tas teel keplip woo “Haylichste Plats” kenënt kep waar. ₄Too waar te koltne altar hiin ketuun kep woo te wayrauch keprënt kep waar, un aach ti ark fon te alians, woo kans mit kolt iwertsoo waar. In te ark waar te koltne kruuch mit tëm manaa trin, te xtok fon Aaron, fon woo khayme auskexlaan waare, un ti tswaay xteen thaafle mit te kepoote truf kexrip. ₅Uf te ark, ti Kotlich Presëns am simpoliseere, waare ti kerupins mit te ufne flite iwer tas plats woo ti sinte fertsayert kep waare. Yets is awer net te momënt fer tas tings in tetayls ausleye.

₆Noo tas ales prepareyert kep waar, keen ti priister yeete taach rin in tas foer teel fon te Hit, woo tas Hayliche Plats is, fer sayn relichioose flichte se tuun. ₇Awer ploos de hooche priister keet in tas hinerxte teel, woo tas Haylichste Plats is, un tas noore een mool es yoer. Tee opfert fer Hërkot pluut fon fii, fer sich selepst un fer ti sinte woo tas folek kemach hot oone wise tas se sinte am mache waare. ₈Torich tas ales, tuut te Hayliche Kayst uns lërne, in en kans klaar aart, tas te inkang fer tas Haylichste Plats noch net uf kemach kep is soo lang wii tas foner teel, woo tas Hayliche Plats is, is wayter penutst. ₉Tas is en simpool fer hayt. Petayt tas ti opfer un kaape fon fii fer Hërkot mache net perfekt tas hërts fon te mënxe woo iim atoreere. ₁₀Tas sin opfere un kaape woo noore se tuun hon mit ese, mit ketrënk un mit ferxiitne relichioose seremoniie. Sin reechle fon auser woo noore weyert hon pis Hërkot aler tings renoweere tuut.

₁₁Awer Kristus is khom als Hooche Priister fom kuut tings woo xon too is. Ti Hit woo eyer tiint is peser un mee perfekt un is net uf kepaut kep fon mënxe, tas mënt, is net fon tee welt. ₁₂Wii Kristus khom is un is rin kang, een mool fer ale, uf em Haylichste Plats, hot eyer net mit kenom tas pluut fon pek ore hëmese fer aan se piite als opfer. Im keeche teel, eyer hot sayn aychne pluut keopfert un hot ti eewich retung fer uns fertiint. ₁₃Tas pluut fon pek un fon xtiire un te ex fom ferprënte rint kewe ferxtraut iwer ti unrayniche layt, un tii kewe rayn auswënich. ₁₄Wën tas soo is, petënkt aych mool tan wii fiil kreeser is ti macht fon Kristus sayn pluut! Torich em eewiche Kayst hot eyer sich selepst aan kepot fer Hërkot als opfer oone feeler. Un sayn pluut tuut uns inwënich sauwer mache, unser xulte am wech hoole; soo khëne mer te leewente Hërkot tiine, wayl meyer khee seremooniie mache woo niks weyert sin.

₁₅Also, is Kristus weyer en nay alians kemach kriit, tas tii woo Hërkot keruuf hot khëne ti eewiche seechne kriin woo Hërkot ferxproch hat. Tas khan kemach kewe wayl en toot paseyert is woo ti layt pefrayt hot fon te sinte woo se kemach hate soo lang wii ti eyerxt alians noch am kilte waar.

₁₆Woo en testamënt is, is neetich pewayse tas te persoon woo tee kemach hot xon kextorep is. ₁₇Wayl te testamënt kilt niks soo lang wii leewent is tee woo en kemach hot; noore noo tëm sayne toot kriit tee testamënt weyert. ₁₈Is tesweche woo ti eyerxt alians efekt kriit hot mit te penutsung fon fii pluut. ₁₉Te eyerxt hot Mooses ale kepoote aan kesaat tëm noo se in te kesets kexrip sin. Tëm noo hot eyer tas pluut fon hëmese un pek kehool, mit waser fermixt un iwer es kesets puch kexpritst un iwer es kanse folek, fer was eyer root kefërept wol un ysop penutst hot. ₂₀Tan saat er: “Tas is tas pluut fon ti alians woo Hërkot kexikt hot teyer solt noo keen.” ₂₁Kraat soo hot Mooses pluut kexpritst iwer ti Hit un iwer tas tings woo penutst kewe im Kotes tiinst. ₂₂In te woerheet, tëm noo ti kesets, neekst ales kept purifikeyert mit pluut. Un, wën khee pluut ferxut kept, kept es khee fertsayung fon te sinte.

₂₃Tas tings, woo kopii waare fon te himlix realiteet, muste soo purifikeyert kewe; awer fer tas himlixe tings selepst sin pesere opfere neetich. ₂₄Kristus is net rin kang in en Haylich Plats fon mënxe kemach, woo tii khopii is fom echte Plats. Eyer is in te aychne himel kang, woo er yets in Hërkot sayn presëns is fer uns se pehelfe. ₂₅Te Hooche Priister keet rin, yeetes yoer, in tas Haylichste Plats, un nëmt mit sich tas pluut fon en xtik fii. Awer Kristus is net rin kang fer sich imer witer opfere. ₂₆Wën tas soo weyer, mist eyer fiil mool te toot mit mache tsayt tas ti welt ketsoo kep waar. Anxtat tas, is eyer yets an te ën fon te tsayte khom, fer ti sinte wech mache torich sayne aychne opfer. ₂₇Yeete persoon mus ploos een mool xtërwe un tëm noo julkeyert kewe fon Hërkot. ₂₈Soo aach Kristus is noore een mool keopfert kep fer ti sinte fon fiile mënxe wech mache. Tëm noo khomt eyer en tswet mool tsum foerxayn, net fer ti sinte wech mache, awer fer ti mënxe rete woo uf iim am waarte sin.