1Ti kesets woo Mooses kep hot is net en komplëte un leaale motel fom echt tings; is noore xate fon te kuute tinger woo tsum khome sin. Ti selwiche opfere kewe imer aan kepot, yoer noo yoer. Also, wii khan ti kesets, torich tii opfere, ti layt woo ticht an Hërkot khome perfekter mache? 2Wën ti layt woo Hërkot atoreere purifikeyert kep weere fon sayn sinte, teere se sich net mee xultich fiile fon khee sinte, un ale opfere khënte uf heere. 3Anxtat tas, tiine tii opfere, woo yoer noo yoer kemach kewe, noore tas ti layt an sayn sinte traan tënke. 4Wayl tas pluut fon xtiire un pek khan net, uf khee aart, nimant sayn sinte wech hoole.
5Tesweche hot Kristus kesaat, wii eyer in tii welt khom is:
“Tuu, oh Hërkot, wilst khee tiire un khee kaape keopfert kriin,
awer host en khërwer fer mich prepareyert.
6Ti tiire opfere woo kans ferprënt kewe uf em altar tuun tich net kefale,
net mool kaape woo keopfert kewe fer ti sinte wech hoole.
7Tan saat ich:
— Ich sin hier, oh Hërkot;
ich khome tayne wile mache,
soo wii kexrip is iwer mich
im Kesets Puch.”
8Te eyerxt saat eyer: “Tuu wilst khee opfer un khee aanpiitung fon tiire, un kefale tich net ti opfere fon tiire woo kans ferprënt kewe uf em altar un khee opfere woo aankepot kewe fer sinte wech hoole.” Tee hot tas kesaat, wën toch ale opfere aankepot kewe tëm noo ti kesets. 9Tëm noo saat eyer: “Ich sin hier, oh Hërkot, fer tayne wile se mache.” Soo hot Hërkot xlus kemach mit ale friirixe opfere un hot Kristus sayne opfer uf es plats ketuun. 10Un, wayl Yeesus kemach hot was Hërkot wolt, sin meyer purifikeyert fon te sinte torich ti opfer woo eyer kemach hot, een mool fer ale, fon sayne aychne khërwer.
11Ale yute priister halt sayn relichioose flichte yeete taach in un tuut ti selwiche opfere oft mool aan piite, awer tii khëne nii ti sinte wech mache. 12Awer Kristus hot ploos eene opfer kemach fer ti sinte wech mache, en opfer woo fer imer kilt, un tëm noo hot eyer sich uf Hërkot sayn rechts sayt kesetst. 13Too is Yeesus am waarte pis Hërkot sayn faynte als pootium unich sayn fiis tuut. 14Soo, mit eene eensichste opfer, hot eyer fer imer perfekt kemach tii woo purifikeyert kewe fon te sinte.
15Un te Hayliche Kayst kept uns aach sayne tsayer iwer tas. Eyerxt saat er:
16“Wën tii tsayt khomt, saat te Hër,
mache ich tii alians mit em folek fon Israël:
Ich tuun mayn kesetse in tëne sayn hërts
un in tëne sayne kewise xraywe ich se.”
17Tëm noo saat eyer:
“Ich tënke net mee an tëne sayn sinte
un net an tëne sayn xlechtichkheete.”
18Soo, wën ti sinte fertsayert sin, prauch khee opfer mee kemach kewe fer ti wech se mache.
Los uns ticht an Hërkot khome
19Tesweche, priiter, weche Yeesus sayne toot am krayts hon meyer komplët frayheet fer in tas Haylichste Plats rin keen.
20Torich te foerhank, was mënt, torich sayne aychne khërwer, hot eyer uns en naye un leewente weech uf kemach. 21Meyer hon en Hooche Priister fer em Hërkot sayn haus fiire. 22Also, los uns ticht an Hërkot khome mit en phuer hërts un en xtrame klaawe, mit en kewise woo sauwer kemach kep waar fon unser xulte un mit en khërwer kewex in phuer waser. 23Meyer mise ti hofnung fom klaawe woo meyer aan saan xtram fest hale, wayl meyer khëne klaawe tas Hërkot sayn ferxprechunge in hale tuut. 24Meyer mise ëne te anere animeere fer mee liipe hon un mache was kuut is. 25Phaar sin ti fersamlunge in xtich am lose, awer meyer tërfe tas net mache. Im keeche teel, meyer mise ëne ti anere uf muntere un yets noch mee wan mer siit tas te taach am khome is.
26Wayl, wën meyer fer kërn sinte mache tuun, noo meyer ti woerheet khëne kelërnt hon, tan is xon khee opfer mee woo unser sinte wech mache khan. 27Im keeche teel, playpt ploos noch te pang fon was paseere khan: pang fom julkamënt un fom kewaltiche fayer woo fernichte tuut tii woo keeche Hërkot sin. 28Weyer Mooses sayn kesets net aan heere tuut kept tsum toot konteneyert oone se taure, wën eyer xultner julkeyert kept wën weenichstens tswaay persoone aan keheyert kewe als tsayer. 29Tan, was meecht paseere mit tëne woo Kotes Soon ap xtoose? Was meecht paseere mit tëne woo tas pluut fon Hërkot sayn alians, woo se purifikeyert hot, etwas oone weyert rechne? Un was paseyert mit wëm te Kayst fon Hërkots knaate pelayticht? Tii woo tas mache kriin en fiil xlimere xtroof! 30Wayl meyer wise weyer kesaat hat: “Ich tuun tas tsurik ferlange, ich mache ti aprechnung mit tëne.” Un weyer aach saat: “Te Hër wërt sayn folek julkeere.” 31Was en xreklich tings is im leewente Hërkot sayn hënt fale!
32Tënkt an was in te ferkangne tsayt paseyert is: In tëne taache, tëm noo wii Hërkot sayn licht aych ilumineyert hot, het teyer fiil tings mit kemach, awer sayt net ap kewun kep im khamf. 33Phaar sin ferxënt kep un xlecht pehantelt kep in puplikum, un in anere fel waart teyer fërtich fer teel se nëme im layte fon tëne woo soo pehantelt kep sin. 34Teyer het teel kenom im layte fon te kefangne. Un, wan ales was teyer hat aych wech kehool kep waar, het teyer tas aus kehal mit frayt wayl wust tas teyer etwas fiil peseres hat, woo fer imer hale tuut. 35Also, ferliert net ti koraaj, wayl ti pringt en kroose prays. 36Teyer mist ketult hon fer Hërkot sayne wile tuun un kriin was eyer ferxprecht. 37Wayl, wii ti Hayliche xrifte saan:
“En pisye mee tsayt, wërklich en pisye,
un khomt tee woo khome sol;
tee tuut net lang taure.
38Un al tii woo ich aan nëme
wëre an mich klaawe un wëre leewe.
Awer, wën en mënx tsurik keet,
kewe ich net froo mit tëm.”
39Meyer sin khee layt woo tsurik keen un sich ferleere tuun. Im keeche teel, meyer hon klaawe un sin keret.
