Heroes fom klaawe
1Te klaawe is ti sicherheet tas meyer tas tings woo meyer hofe kriin wëre un ti pewaysung tas es tings kept woo mer net siin khan. 2Es waar torich em klaawe woo ti layt fon friirixe tsayte fon Hërkot aproweyert kep waare.
3Is torich em klaawe woo mer ferxteen tas te Uniwërs torich Hërkot sayn wort ketsoo kep waar un tas tas tings woo mer siin khëne is kemach kep fon tëm woo mer net siin khan.
4Es waar torich em klaawe woo Apël en pesere opfer fer Hërkot aankepot hot wii Kaym. Torich em klaawe hot eyer Hërkot sayn aproweerung kriit fer sayn opfere. Torich sayne klaawe, tuut Apël imer noch xpreche, noo sayne toot.
5Waar torich em klaawe woo Enok fom toot kexpaart kep waar. Eyer is tsu Hërkot kenom kep, un nimant hot em kefun wayl Hërkot selepst iim mit kenom hat. Ti Hayliche Xrifte saan tas eyer xon tefoer Hërkot kefal hat. 6Oone klaawe khan nimant Hërkot kefale, wayl weyer tsu iim keet mus klaawe tas eyer eksisteyert un tas eyer peloont tii woo fersuuche iim peser khëne lërne.
7Waar torich em klaawe woo Noah Hërkot sayn ortnunge keheyert hot iwer es tings woo paseere teet un khonte net kesiin kewe. Noah hot Hërkot aan keheyert un hot ti ark kepaut woo eyer un sayn familye keret kep sin. Soo hot Noah ti welt konteneyert un Hërkot hot em aproweyert torich em klaawe.
8Waar torich em klaawe woo Aapraham, wii Hërkot iim keruuf hot, aan keheyert hot un aus kang is fer en aner lant woo Hërkot tëm ferxproch hat se kewe. Eyer hot sayn aychne lant hinerlos, oone se wise woo eyer am hiin keen waar. 9Torich em klaawe hot eyer als auslëner uf em lant kewoont woo Hërkot tëm ferxproch hat. Hot in parake kewoont mit Iisak un Yaakop, woo aach ti selwich ferxprechung kriit hon fon Hërkot. 10Wayl Aapraham hot kewaart uf ti xtat woo Hërkot kepleent un uf kepaut hat, ti xtat woo funtamënte hat woo net fernicht kewe khëne.
11Waar torich em klaawe woo Aaprahm noch fater kep is in sayn alte yoore un ti aychne Sara xon khee khiner mee kriin khënt. Eyer hot keklaapt tas Hërkot sayn ferxprechung in hale teet. 12Soo, fon eene eensichste man, woo xon neekst toot waar, sin soo fiil nookhomer uf ti welt khom wii ti xtërne am himel, soo en hauwiche numer wii ti sant khërner fom xtrant fom meer.
13Tii al sin kextorep fol klaawe. Hon net kriit was Hërkot ferxproch hat, awer hon se fon waytem kesiin un hon sich tesweche kefrayt. Un hon teklareyert tas se auslëner un refujierte uf tee welt weere. 14Un tii woo tas saan tsayche kans klaar tas se en haymat fer sich selepst am suuche sin. 15Tii hon net wayter ketënkt fer tsurik se keen pis woo se heyer khom waare. Wën se wolte, hate se ti oportuniteet kehat fer tsurik se keen. 16Awer, im keeche teel, waare en peser haymat am suuche, te himlixe haymat. Un Hërkot xeemt sich net in tëne sayne Hërkot kenënt kewe, wayl eyer selepst hot en xtat fer tii prepareyert.
17Waar torich em klaawe tas Aapraham, wii Hërkot iim in proop xtele wolt, sayne soon Iisak in opfer aan kepot hot. Hërkot hat fiil nookhomer ferxproch kehat fer Aapraham, awer toch soo waar tee fërtich fer sayne eensichste soon aan piite in opfer. 18Hërkot hat iim kesaat kehat: “Torich Iisak wërst tuu nookhomer hon.” 19Aapraham hot erkhënt tas Hërkot ti macht het fer Iisak witer peleepe, un, khan soo kesaat kewe, Aapraham hot sayne soon Iisak tsurik kriit fom toot.
20Waar torich em klaawe tas Iisak seechnunge ferxproch hat fer Yaakop un fer Esauu.
21Waar torich em klaawe tas Yaakop, foer sayne toot, Yoosef sayn khiner keseechent hot. Eyer hot sich an sayne xtok kextaypt un hot Hërkt atoreyert.
22Waar torich em klaawe tas Yoosef, wan eyer am xtërwe waar, kexproch hot iwer te auskang fon te israelite fom Ejipt un hot ortnunge kep iwer was kemach kewe mist mit sayne khërwer.
23Waar torich em klaawe woo Mooses sayn eltre, wan eyer uf ti welt khom is, iim ferxtekelt hon iwer tray moonate. Tii hon kesiin tas es puupche xeen waar un hate khee pang fer em kheenich sayn ortnung net noo keen.
24Waar torich em klaawe tas Mooses, wan xon kroos kewakst, net mee soon fon te tochter fom Faraoo kenënt kewe wolt. 25Eyer hot liiwer mit em Hërkot sayn folek layte mit kemach anxtat, iwer en khorts tsayt, in sinte leewe. 26Eyer mënt tas es fiil peser weyer ferachtung mit mache weche em Kristus anxtat ale raychtume fom Ejipt hon. Tee hat ti aue uf ti futur peloonung.
27Waar torich em klaawe tas Mooses aus em Ejipt kang is, oone pang fom kheenich sayn wuut, un is wayter fest keplip, wii wën eyer te inwisiiwle Hërkot siin khënt. 28Torich em klaawe hot Mooses ti kewoonheet fer ti Oostre se fayre aankefang un hot kexikt ti tiire fon te israelite sayn hayser mit pluut xtrayche tas te ëngel fom Toot net tëne sayn elste khiner umpringe teet.
29Waar torich em klaawe tas ti israelite te Roote Meer iwer kang sin wii wëns trokne lant weyer. Un wan ti ejipte fersuucht hon iwer keen, hot tas meer se iwerxwum.
30Waar torich em klaawe tas ti maure fon Jerikoo kefal sin, noo siwe taache marx trum rom fon te israelite. 31Waar torich em klaawe woo Raape, ti huer, net kextorep is mit tëne woo Hërkot net aan keheyert hate, wayl sii ti israelite xpioone kuut uf kenom hat.
32Was khan ich noch mee saan? Ti tsayt is weenich fer se xpreche fon Jideon, fon Parak, fon Samsam, fon Jeftë, fon Dawii, fon Samuël un fon te profëte. 33Torich em klaawe hon se kekhëmft keeche kanse natsioone un hon kewun. Hon kemach was richtich waar un hon fon Hërkot kriit was eyer tëne ferxproch hat. Hon es maul fon leewe tsuu kehal, 34hon xreklich fayer aus kemach un hon sich keret fom toot torich ti xwaart. Waare xwach, awer hon sich xtarek kemach. Waare mechtich im kriich un hon auslëner militeere ap kewun. 35Torich em klaawe hon fraae sayn toote tsurtik kriit, woo witer peleept kep sin.
Anere sin tsum toot kekweelt kep. Tii hon ap kesaat fer in frayheet ketuun kewe fer in en peser leewe peleept kewe. 36Phaar sin ferhau kep un pelayticht kep; anere sin mit khete aan kepun kep un in ti katee kexmis kep. 37Anere sin mit xteen toot kexmis kep; anere torich ti mite keseecht kep; un anere, toot kemach kep torich ti xwaart. Sin fon een plats tsum aneres kang mit xoof un kaprit haut keklayt; waare aarem, keyacht kep un xlecht pehantelt kep. 38Sin too rom kang wii refujierte torich tesërte un përiche, in hoole un lecher in te eyert am leewe. Ti welt waar es net weyert tas soo mënxe too leewe teere!
39Wayl tii hon keklaapt, sin ti kanse layt fon Hërkot aproweyert kep, awer hon net kriit was eyer ferxproch hat. 40Wayl Hërkot hot en noch pesere plaan prepareyert kehat fer uns, tas, ploos mit uns, tii ferxprechunge perfekt kemach keepte.
