Hërkot, unser Fater
1Soo hon meyer tas kroose folek fon tsayer um uns rom. Also, meyer mise neewe lose ales was uns te weech xweyer macht un ti sinte woo sich an uns krayfe un mise wayter laafe, oone te muut ferleere, te wet laaf woo fer uns foer kep is. 2Meyer hale unser aue xtaar an Yeesus, wayl is torich iim woo unser klaawe aanfange tuut, un is te woo unser klaawe perfekt macht. Eyer hot net kelos tas es krayts iim tsurik treete kemach hot. Im keeche teel, weche te frayt woo iim ferxproch kep waar, hot eyer sich niks traus kemach mit te erniitrichung fer am krayts se xtërwe, un yets sitst eyer uf te rechts sayt fom Hërkot sayne troon.
3Tënkt an tëm sayn layte un wii eyer mit ketult te has fon te sinter aus kehal hot. Soo, aach teyer, tuut net te muut ferleere, tuut net uf kewe. 4Wayl im khamf keeche ti sinte must teyer noch net pis tsum toot khëmfe. 5Meecht teyer xon ti koraaj wërter ferkes hon woo Hërkot aych kesaat hot wii wën teyer tëm sayn khiner weyert? Wayl eyer saat:
“Kep acht, mayne soon, wën te Hër tich xtroofe tuut,
un tuu net ti muut ferleere wën eyer tich ti acht aan ruufe tuut.
6Wayl te Hër korijiert weyer eyer liipt
un xtrooft weyer eyer aan nëme tuut als soon.”
7Halt ti layte aus mit ketult wii wën tas en xtroof weyer woo en fater kep hot, wayl ayre layte tsaycht tas Hërkot aych am pehantle is als sayn khiner. Meecht eene soon eksisteere woo nii korijiert kep is fon sayne fater? 8Wën teyer net korijiert kept wii es paseyert mit ale khiner fon Hërkot, tan sayt teyer net sayn echte khiner, awer ilejitime khiner. 9Im fal fon unser mënxliche eltre, tii hon uns korijiert, un meyer hon se rexpekteyert. Tan soo fiil mee mise meyer unsere himlixe Fater aan heere un soo tuun meyer leewe. 10Unser mënxliche eltre tuun uns korijiire iwer en khorts tsayt, wayl se mënte tas es soo richtich weyer; awer Hërkot korijiert uns fer kuut fer uns selwer, tas mer teel nëme in sayn haylichkheet. 11Wën mer korijiert kewe, in tëm momënt siit tas uns motiif fer traurichkheet aus un net fon frayt. Awer, xpeeter hiin, tii woo korijiert kep sin, kriin als loon en khorekt leewe un mit friite.
Aan ruuf un konseele
12Also, heept ayre miite hënt un xtërkert ayre xwache kniye. 13Keet torich flache weeche tas te weye fuus net laam keen mus, awer keheelt kept.
14Suucht te friite mit ale layt un xtrëngt aych aan fer en leewe tetikeyert fer te Hër leewe, wayl oone tas tuut nimant em siin. 15Past uf tas nimant Hërkot sayne knaate neewe lose tuut. Past uf tas nimant wii en piter plans kept woo wakst un fer fiile anere xaate tuut mit sayne kift. 16Un past aach uf tas nimant imoraal wërt ore te rexpekt ferleere tuut mit em hayliche tings, wii Esauu, woo, weche en theler ese, sayn rechte als elste soon ferkhaaft hot. 17Wii teyer wist, tëm noo wolt eyer ti seechnung fon sayne fater kriin. Awer is ap kextoost kep wayl eyer hot khee weech kefun fer se ferënere was eyer kemach hat, wën eyer ach tas sokaar mit treene mache wolt.
18Teyer waart net wii tas israelite folek. Teyer sayt net ticht khom fon etwas woo mer traan thupe khan, wii te Sinay përich mit sayn fernichts fayer, ti tunkelheet un xwarts nacht, te xtorem, 19tas ploose fon en trompët ore te klank fon en xtim. Wan ti israelite ti xtim keheyert hon, hon se ferlangt tas se niks mee saan solt, 20wayl se net ti ortnung aus hale khonte woo saat: “Sokaar en xtik fii, wën tee an te përich thupe tuut, mus toot kemach kewe mit xteen.” 21Was tii am siin waare waar soo xreklich tas Mooses saat: “Ich sin am tsitre fon pang!”
22Im keeche teel, teyer sayt an te Sioon përich khom un an ti xtat fom leewente Hërkot, tsu te himlix Yeruusalëm mit sayn tausente ëngle. 23Teyer sayt uf ti froo fersamlung khom fon Hërkot sayn elste seen, tas mënt, fon tëne woo sayne naame inkexrip hon im himel. Teyer sayt pis an Hërkot khom, woo te richter fon al is, un sayt aach aan khom pay ti kayste fon tëne woo khorekt sin un woo perfekt kemach kep sin. 24Teyer sayt pis an Yeesus khom, woo ti nay alians kemach hot un woo tas pluut kexpritst hot woo xprecht fon fiil peser tings wii Apël sayn pluut.
25Soo, past uf un tuut net ap saan se heere tee woo xpreche tuut. Tii woo ap kesaat hon te persoon aan heere woo ti himlix mensaaj ap kewe khom is uf te eyert hate khee ausweech. Tesweche, fiil weenicher meyer wëre ausweech hon wën mer ap saan tee woo fon tort fom himel fer uns xpreche tuut. 26In tee tsayt hot Hërkot sayn xtim kemach tas ti eyert kexutert hot, awer yets hot eyer tas ferxproch: “Noch een mool mache ich tas net ploos ti eyert xutre tuut, awer aach te himel.” 27Ti wërter “noch een mool” wayse kuut tas es tings woo ketsoo kep waar kexutert kep wëre un ferënert kewe, tas tii woo net kexutert khëne kewe playwe wii se sin.
28Tesweche, wole mer tankpaar sin, wayl meyer hon xon en Raych kriit woo net kexutert kewe khan. Meyer wole tankpaar sin un Hërkot atoreere soo tas es iim kefale tuut, mit rexpekt un xay. 29Wayl, in te woerheet, unser Hërkot is en fernichts fayer.
