Hepreyer 13

₁Tuut ëne em anere wayter liipe als priiter in Kristus. ₂Tuut imer kuut uf nëme tii woo pis an ayer haus khome; wayl etliche woo kastfroyntlich waare hon ëngle uf kenom, oone se wise. ₃Tënkt an ti kefangne, soo wii teyer mit tëne in te katee weyert.

₄Ti hochtsayt sol rexpekteyert kewe fon ale layt, un tas ti ferhayrate mëner un ti ferhayrate fraae leaal sin sole ëne fer te anere. Hërkot wërt julkeere tii woo eepruch aan xtele un imoraal sin.

₅Lost aych net tomineere fom liipe tsum kelt un sayt tsufriite mit was teyer het, wayl Hërkot saat: “Nii mools wëre ich aych oone hilef lose un nii aych in xtich lose.” ₆Soo, mise meyer korajoos sin un fersichere:

₇Tënkt an ayre eyerxte kaystliche fiirer, woo Hërkot sayn mensaaj aan kesaat hon fer aych. Tënkt wii tii keleept hon un kextorep sin un tuut te klaawe woo se hate noo mache. ₈Yeesus Kristus is te selwiche kester, hayt un imer. ₉Lost aych net kefiert kewe fon frëmte un ale sorte unterichte woo aych fom richtiche weech wech fiire. Is kuut kaystlich xtarek sin torich Hërkot sayne knaate un net torich reechle iwer es mitel aan heere. Wayl tii woo tii reechle noo keen sin net keholef kep fon tëne.

₁₀Ti priister woo im thëmpel tiine hon net ti recht ti opfere ese woo uf unsere altar aan keopfert kewe. ₁₁Te hooche priister traat tas pluut fon te tiire pis in tas Haylichste Plats fer aan se piite als opfer weche te sinte. Awer ti khërwer fon te tiire kewe ferprënt aus em akampamënt. ₁₂Tesweche is Yeesus aach aus te xtat Yeruusalëm kextorep fer, mit sayn aychne pluut, tas folek fon sayn sinte purifikeere. ₁₃Also, los uns ticht pay Yeesus keen, aus em akampamënt, un ti selwich xant mit mache. ₁₄Wayl uf tee welt hon meyer khee xtat woo fer imer hale tuut; im keeche teel, meyer suuche ti xtat woo tëm noo khome sol. ₁₅Tesweche, torich Yeesus Kristus, tuun mer imer loope fer Hërkot opfere. Tee loop is te opfer woo meyer presenteere, te opfer woo presenteyert kept fon lipe woo sayne klaawe an iim aan saan. ₁₆Ferkest net kuutes se tuun un ëne te anere se helfe, wayl tas sin ti opfere woo Hërkot kefale.

₁₇Heyert ayre fiirer aan un keet tëne iire ortnunge noo, wayl ti pase imer uf uf ayre kaystliche neetichkheete wayl se wise tas se aprechnung fon tëm tings mache mise mit Hërkot. Wën teyer aan heere tuut, mache tii sayn aarwat mit frayt; awer, wën teyer net aan heere tuut, tuun se mit traurichkheet xafe, un tas tuut aych in niks helfe.

₁₈Tuut wayter peete fer uns. Meyer sin sicher tas unser kewise sauwer is, wayl mer imer mache wole was richtich is. ₁₉Un ich ferlange aych, in kans special aart, tas teyer peete tuut tas Hërkot mich tsurik an aych xike tuut soo xnel wii meechlich.

_20-21Hërkot hot unser Hër Yeesus peleept, woo, weche sayne toot am krayts, te Kroose Xeefer fom trop is. Un is torich Yeesus sayn pluut woo ti ewich alians ferpint kept. Tas te Hërkot fom friite aych ales kuutes kewe tuut woo teyer praycht fer tëm sayne wile tuun. Un tas eyer, torich Yeesus Kristus, in uns mache lost ales was iim kefale tuut. Un tas fer Kristus ale kloor kep wërt fer imer. Aamen!

₂₂Mayn priiter, ich ferlange tas teyer mit ketult tii uf muutung wërter aan heere tuut, wayl te priif woo ich kexrip hon net aarich lang is. ₂₃Ich wil tas teyer se wise kriit tas unser pruuter Timoteo xon aus te katee khom is. Wën eyer klaych khome tuut, tuun ich en mit nëme wën ich aych pesuuche khome.

₂₄Pekriisunge an ale fiirer fon ayer khërich un fer tas kanse Hërkots folek. Ti priiter fon Italia tuun aach pekriisunge fer aych xike.

₂₅Tas Hërkot sayne knaate mit aych sich ferhalt!