Tiaako 1

₁Ich, Tiaako, Hërkot un Yeesus Kristus sayne tiiner, xike pekriisunge fer tas kanse Hërkots folek ferxtraut iwer ti kans welt.

₂Mayn priiter, sayt froo wan teyer aler sorte xwiirichkheete mit mache mist. ₃Wayl teyer wist tas, wan ayre klaawe fon tëne proope kewine tuut, tuut es persewerans protutseere. ₄Tas tii persewerans perfekt sin sol, tas teyer khorekt un kuut sayt, fer in niks feeler se tuun. ₅Awer, wën fer yemant ti wisheet feele tuut, ferlang tas fer Hërkot, un tee kept tas, wayl eyer jeneroos is un kept mit kuutheet fer ale layt. ₆Awer, ferlangt mit klaawe un tuut net tswayfle uf khee aart, wayl weyer tswayfelt is wii ti wele fom meer, woo te wint fon een sayt tsu te aner nëmt. ₇Weyer soo is prauch net tënke tas er etwas kriit fom Hër, ₈wayl eyer net fest is un nii wees was er mache sol.

₉Te pruuter woo aarem is mus froo kewe wan Hërkot macht tas sayn leewe sich ferpesere tuut; ₁₀un weyer raych is mus tas selwiche xpiire wan Hërkot macht tas sayn leewe xlechter kept. Wayl weyer raych is ferxwint wii ti wilt pluum fom khamp. ₁₁Wan ti sun xtarek xayne tuut, un sayn hits ti pluum ferprëne tuut, tan falt ti pluum ap, un sayn xeenheet wërt fernicht. Kraat soo, weyer raych is wërt fernicht tswixe sayn kexefter.

₁₂Kliklich is tee woo in te xwiirichkheete wayter leaal playpt! Wayl, noo te proweerunge, kriit tee als prays tas leewe woo Hërkot ferxprecht fer tii woo iim liipe. ₁₃Wan yemant keproopt kept, sol net saan: “Tii proop khomt fon Hërkot.” Wayl Hërkot khan net keproopt kewe fom xlechtes un eyer selepst tuut nimant in proop xtele. ₁₄Awer ti layt kewe in proop kextelt wën se sayn aychne xlechte winxe noo keen un sich hinerkeen lose. ₁₅Tan mache tii winxe tas te sint kepoer kept, un te sint, wan xon kroos kewakst, protutseyert te toot.

₁₆Tuut aych net fertuun, mayn liipe priiter. ₁₇Ales kuutes woo meyer kriit hon un ales was perfekt is khomt fom himel, khomt fon Hërkot, tee woo ti lichter fom himel ketsoo hot. Tee ënert sich net, un ferënert net sayn positsioon, was ti tunkelheet pringe teet. ₁₈Torich sayn aychne wile hot eyer kemach tas meyer uf ti welt kheemte, torich em wort fon woerheet, tas meyer tas eyerxte plats unich tëm sayn kanse kriatuure pesetse teere.

₁₉Tënkt too traan, mayn liipe priiter: yeete ëne sol fërtich sin fer se heere, awer sol lang taure fer se xpreche un wuutich kewe. ₂₀Wayl ti mënxlich wuut protutseyert net was Hërkot aan nëme tuut. ₂₁Also, lost neewe ale imoraal un xlecht kewoonheet. Tuut ti mensaaj woo Hërkot in ayer hërts planse tuut aan nëme mit humilteet, tii woo aych rete khan.

₂₂Tuut aych net fertuun; sayt net ploos aan heerer fom Kotes Wort, awer tuut se in praksis. ₂₃Wayl tee woo ti mensaaj heyert un tuut se net in praksis is wii en mënx woo sich in te xpiichel kukt un siit wii eyer is. ₂₄Tuut sich kuut aan kuuke, tan keet eyer fort un tuut klaych ferkese wii eyer aus siit. ₂₅Te ewankeelium is ti perfekt kesets woo frayheet kept fer ti layt. Wën yemant ti kesets kuut unersuucht un tuut se net ferkese, awer tuut se in praksis, tuut Hërkot seechne ales was tee person mache tuut.

₂₆Is yemant am tënke eyer weyer relijioos? Wën eyer net ti tsung kontroleere khan, is sayn relichioon niks weyert un eyer is sich selepst am hinerkeen. ₂₇Fer Hërkot, te Fater, is ti richtich un phuer relichioon tii: ti khiner oone eltre un ti witfraae helfe in sayn layte un sich net flekich mache mit em xlecht tings fon tee welt.