Ekaal pehantlung fer ale layt
1Mayn priiter, teyer woo an unser kloorixe Hër Yeesus Kristus klaawe tuut tëreft nii yemant anerxter pehantle weche sayn aparëns. 2Tsum payxpiil, in ayer fersamlung khomt en man rin mit koltne ringe un kuut tsaych, un khomt yemant anere, aarem un mit alt tsaych aan. 3Wën teyer peser pehantelt tee woo peser keklayt is un saat: “Tas is es peste plats; setst tich too hiin”, awer saat fer te aarme: “Playp xteen” ore “Sets tich too uf te potem, ticht an mayn fiis.” 4In tëm fal sayt teyer unerxiit am mache unich aych selwer un uf xlechte motiife ayer basis am mache fer te anere sayne weyert julkeere.
5Heyert, mayn liipe priiter! Hërkot hot ti aarme fon tee welt aus kesuucht fer raych im klaawe se sin un fer te Raych se hon woo eyer ferxproch hot fer tii woo em liipe tuun. 6Awer, teyer tuut khee acht kewe fer ti aarme. Sin tas net, filaycht, ti rayche woo aych eksploreere un tuun aych tsum kericht xlepe fer julkeyert se kewe? 7Sin tii woo xlecht xpreche fom kuute naame woo Hërkot aych kep hot.
8Wën teyer ti kesets fom Raych noo keet, sayt teyer am mache was kemach kewe mus, wayl in te Hayliche Xrifte is kexrip: “Liipt ti anere wii tuu tich selepst liipe tuust.” 9Awer, wën teyer ti layt pehantle tuut tëm noo tëne sayn aparëns, sayt teyer sinte am mache, un ti kesets konteneyert aych als xultich. 10Wayl weyer eene eensichste kepoote fon te kesets preche tuut is xultich foer ale kepoote. 11Wayl te selwiche woo saat: “Mach khee eepruch” saat aach: “Tuu net umpringe”. Wën tuu ach khee eepruch ketuun host, pist tuu xult fer ti kesets preche wën tuu umpringe tuust. 12Xprecht un leept als mënxe woo julkeyert kewe in te kesets woo uns ti frayheet kept. 13Wan Hërkot uns kulkeere tuut, wërt eyer khee paarmhërtsichkheet hon mit te layt woo khee paarmhërtsichkheet hon mit te anere. Awer, ti layt woo paarmhërtsich sin mit te anere kewe net konteneyert am Taach fom Letste Julkamënt.
Klaawe un aktsioon
14Mayn priiter, was nutst yemant saan tas er klaawe hot wën tas net khomt mit aktsioone tepay? Meecht tee klaawe iim rete khëne? 15Tsum payxpiil, es kept priiter un xwestere woo tsaych prayche un hon niks fer se ese. 16Wën teyer tëne net kept was se prayche fer se leewe, hats khee weyert saan: “Tas Hërkot aych seechne tuut! Tuut yake aan un tuut kuut ese.” 17Also, te klaawe is soo: wën tee net khomt mit aktsioone tepay, is es toot tings.
18Awer, yemant khan saan: “Tuu hast klaawe un ich hon aktsioone.” Un ich antworte: “Tan tsaych mich wii tas meechlich is klaawe hon oone tas tee khomt mit aktsioone tepay. Ich tsayche tich mayne klaawe torich mayn aktsioone.” 19Klaapst tuu tas es ploos eene Hërkot kept? Kuut! Ti taywle klaawe tas aach un tsitre fon pang. 20Tuu tume mënx! Ich tuun tich pewayse tas te klaawe oone aktsioone niks weyert is. 21Wii is unser foerkhomer Aapraham aan kenom kep fon Hërkot? Waar torich was eyer kemach hat wan eyer sayne soon Iisak keopfert hot uf em altar. 22Siiste wii tëm sayne klaawe un sayn aktsioone mitsamer kexaft hon. Torich sayn aktsioone, is sayne klaawe komplët kep. 23Soo is paseyert was ti Hayliche Xrifte saan: “Aapraham hot an Hërkot keklaapt, un tesweche hot Hërkot iim aan kenom”. Un Aapraham is “Hërkot sayne froynt” kenënt kep. 24Soo, siit teyer tas en persoon aan kenom kept fon Hërkot torich sayn aktsioone un net ploos torich em klaawe.
25Tas selwiche is paseyert mit te huer Raabe, wan se ti israelite xpioone in sayn haus uf kenom hot un hot se keholef aus te xtat keen torich en anere weech. Hërkot hot se aan kenom weche was sii kemach hot.
26Also, soo wii te khërwer oone te kayst toot is, soo aaach te klaawe oone aktsioone is toot.
