Tiaako 3

₁Mayn priiter, ploos phaar fon aych tërefte mayster fon te Khërich sin, wayl teyer wist tas meyer, tii woo unterichte, kewe xtrënger julkeyert wii ti anere. ₂Meyer al mache imer feeler. Weyer nii en ferkheyertes wort aus xprecht in was er saat, is en kexayte mënx, mit kapasiteet fer sayne kanse khërwer kontroleere. ₃Sokaar an te kayl sayn maul tuun mer en halefter tas se uns aan heere un soo mache mer tas se hiin keen woo meyer wole. ₄Tënkt an en poot: soo kroos wii er is, fon xtarke wint kexupt, kept eyer kelënkt fon en kleene ruter un faart hiin woo te pilot wil. ₅Tas is es was paseyert mit te tsung: toch kleen, praalt se sich fon kroos tings.

Kukt wii en kroose walt aan kextoch kewe khan mit en kleen flam! ₆Ti tsung is en fayer. Tii is en welt fon xlechtichkheet, halt sayn plats an unser khërwer un ferxtraut tas xlechtes in unser kanse khërwer. Mit em fayer woo fon te aychne hel khomt, tuut se unser kans leewe in flame. ₇Te mënx hot ti kapasiteet fer ale kriatuure se tomineere un hat tas wilte fii tomineyert, ti feel, tas fii woo sich uf em potem rom xlept un ti fix. ₈Awer noch nimant hat ti kapasiteet fer ti tsung tomineere. Tii is xlecht, fol mit tootliche kift, un nimant khan se kontroleere. ₉Meyer penutse ti tsung soo fiil fer te Hër un Fater se petanke soo wii fer ti layt ferfluuche, woo ketsoo kep waare eenlich mit Hërkot. ₁₀Fom selwiche munt khome tank wërter raus soo wii ferfluuchung wërter. ₁₁Khan, filaycht, ti selwiche kwel siis waser un piter waser raus fliise? ₁₂Mayn priiter, khan filaycht en fayche paam eel fruchte kewe ore en trauwe xtok fayche kewe? Soo, aach, en salsich waser kwel khan khee siis waser kewe.

₁₃Kept es unich aych yemant woo wisent un kluuch is? Soo, tan, te sol tas pewayse torich sayn leewe un sayn kuute aktsioone, ales kemach mit humilteet un wisheet. ₁₄Awer, wën in ayer hërts ti nayt, piterlichkheet un ekoysmus eksisteyert, tan tuut net liye keeche ti woerheet, sich am praale tas teyer wisent sayt. ₁₅Tii sort wisheet khomt net fom himel; tiii is fon tee welt, is fon unser mënxlich natuer un is taywlich. ₁₆Wayl, woo nayt is un ekoysmus, is aach xtrayt un ale sorte xlecht tings. ₁₇Ti wisheet woo fom himel khomt is, foer ales, phuer; un is aach friitlich, kuut un froyntlich. Tii is fol paarmhërtsichkheet, protutseyert en ërnt fon kuute aktsioone, tuut net ti anere pehantle weche sayne aus siin un is fray fon ferxtelung. ₁₈Wayl ti kuutheet is ti ërnt woo protutseyert kep is mit te soome woo tii woo fer te friite xafe keplanst hon.