Tiaako 4

₁Fon woo khome ti khëmfe un ti xtrayte unich aych? Tii khome fon te xlechte winxe woo imer in aych am khëmfe sin. ₂Teyer wolt fiil tings; awer, wayl teyer tas net khënt hon, sayt teyer sokaar fërtich fer um se pringe fer tii se kewine. Teyer wolt tas mit kewalt hon; awer, wayl teyer tas net kriit, xtrayt un khëmft teyer. Kriit net was teyer wolt wayl teyer tas net fer Hërkot ferlangt. ₃Un, wën teyer ferlang, kriit teyer tas net, wayl ayre motiife xlecht sin. Teyer ferlangt tings fer se penutse fer ayre aychne frayt. ₄Unklaawente layt! Meecht teyer net wise tas froynt fon te welt sin is tas selwiche wii Hërkot sayne faynt sin? Weyer froynt fon te welt sin wil wërt en faynt fon Hërkot kewe. ₅Tënkt net tas es niks petayte sol ti pasaaje fon te Hayliche Xrifte: “Te kayst woo Hërkot in uns ketuun hot is fol kewaltiche winxe.” ₆Awer, Hërkot sayn kuutheet tsaycht tas se noch xtërker is, wayl ti Hayliche Xrifte saan: “Hërkot is keeche ti hoochmuutiche, awer is kuut mit te temiitiche.”

₇Also, tuut Hërkot aan heere un xteet aych keeche te Taywel, un tee tuut fon aych aus rayse. ₈Khomt tichter an Hërkot, un tee wërt tichter an aych khome. Wext ayre hënt, sinter! Macht ayer hërts sauwer, xaynhayliche! ₉Kept traurich, xraayt un prilt! Ferënert ayre lacheray in prile un ayer frooheet in traurichkheet. ₁₀Playpt temiitich foer em Hër, un tee tuut aych in eere heepe.

₁₁Mayn priiter, tuut net xlecht xpreche ëne fon te anere. Weyer xlecht xprecht fon sayne pruuter in Kristus ore tuut tee julkeere is xlecht am xpreche fon te kesets un tii am julkeere. Wayl, wën tuu ti kesets julkeyerst, tan pist tuu xon yemant woo net ti kesets noo keest, awer pist yemant woo se julkeyert. ₁₂Hërkot is te eensichste woo ti kesetse macht un is te eensichste richter. Ploos tee khan rete ore fernichte. Weyer tënskt tuu tas tuu pist, fer ti anere julkeere?

₁₃Yets heyert, teyer woo saat: “Hayt ore moye keen meyer tsu tii ore tii xtat un too playwe mer en yoer kexefter am mache un fiil kelt am fertiine!” ₁₄Teyer wist net wii ayer leewe moye sin khan, wayl teyer sayt wii en newel woo klaych rom keet, woo en tsayt tsum foerxayn khomt un klaych tëm noo ferxwine tuut. ₁₅Was teyer het mise saan is: “Wën Hërkot wil, wëre meyer leewent sin un wëre tis ore tas mache.” ₁₆Awer, teyer sayt hoochmuutich un sayt aych imer am praale. Tee kanse hoochmuut is xaate. ₁₇Also, macht sinte te mënx woo wees tas kuute tuun un macht es net.