Aanruuf fer ti rayche
1Yets, rayche, heyert! Prilt un xraayt weche te eelent woo teyer mit mache mist! 2Ayer raychtume sin faul, un ayer fayn tsaych sin ti mote am frese. 3Ayer kolt un ayre silwer sin ketekt fon rost, un tee rost wërt tsayer sin keeche aych un, wii fayer, tuut ayre khërwer frese. In tëne letste tsayte het teyer raychtum uf haufe kesetst 4un het net te loon petsaalt fon te layt woo in ayre khamp xafe tuun. Heyert tëne sayn reklamatsioone! Te xraay fon tëne woo an te ërnt xafe is an ti oore fon Kot, te Almechtiche Hër, aan khom. 5Teyer het en leewe fon lux un ferkniichung keleept hier uf te eyert un sayt fet wii fii woo fërtich is fer in ti xlachteray. 6Teyer het ti unxultiche konteneyert un toot kemach, un tii khëne niks tuun keeche aych.
Ferxiitne konseele
7Tesweche, priiter, mist ketult hon pis te Hër khomt. Kukt wii te pauer waarte tuut mit ketult tas sayn lant iim rayche ërnte kept. Eyer waart mit ketult te reen fon te hërpst un fon te friilings tsayt. 8Teyer mist aach ketult hon. Tuut net ayer muut ferliire, wayl te Hër khomt klaych.
9Priiter, tuut aych net peklaache ëne fon te anere fer net julkeyert se kewe fon Hërkot. Te Richter is ticht, fërtich fer se khome. 10Tënkt an ti profëte woo im Hër sayne naame kexproch hon un hoolt se als payxpiil fon ketult in te momënte fon layte. 11Un meyer tënke tas se kliklich waare wayl se ti layte kephakt hon mit ketult. Teyer het keheyert iwich Yoop sayn ketult un wist wii am ën Hërkot iim keseechent hot. Wayl te Hër fol kuutheet un paarmhërtsichkheet is.
12Iwer ales, mayn priiter, wën teyer etwas ferxprecht, tuut net im himels naame xwoore, net mool in te eyerts naame, net mool fer etwas aneres. Saat noore “yoo”, wën es yoo sin sol, un “nee” wën es nee sin sol, tas Hërkot aych net konteneere tuut.
13Wën yemant fon aych am layte is, peet. Wën yemant froo is, sing tank liite. 14Wën yemant fon aych krank is, sol ti eltre fon te khërich ruufe, tas se en kepeet mache un eel uf te khop fom kranke tuun im Hër sayne naame. 15Tas kepeet, mit klaawe kemach, tuut te kranke rete. Te Hër wërt tëm kesuntheet kewe un tuut ti sinte woo tee ketuun hot fertsaye. 16Also, tuut ayre sinte paychte ëne fer te anere un macht kepeete ëne fer te anere, tas teyer kuriert kept. Tas kepeet fon yemant woo Hërkot aan heere tuut hot fiil kraft. 17Te profët Eliias waar en mënx wii meyer. Eyer hot kepeet mit kraft tas es net reene solt, un iwer tray un halep yoer hot es net kereent uf te eyert. 18Tëm noo hot eyer noch mool kepeet, un tan hot es kereent, un ti eyert hot sayn ërnt kep.
19Mayn priiter, wën yemant fon aych sich fon te woerheet auswayche tuut, un en anere iim mache tuut tsurik khome fer te kuute weech, 20erinert aych: weyer en sinter tsurik khome macht fon sayne xlechte weech tuut tee sinter rete fom toot un macht tas tfiil sinte fertsayert kewe.
