Ferklaychung mit te hochtsayt
1Mayn priiter, teyer al khënt kans kuut ferxteen was ich saan tuun. Teyer khënt ti kesetse un wist tas tii ploos macht hon iwer en persoon woo leewent is. 2Tsum payxpiil, ti fraa woo ferhayrat is hat en ferpintung torich ti kesets mit sayne man soo lang wii tee leewent is; wën tee xtërwe tuut is se fray fon te kesets woo se ferpint mit sayne man. 3Soo tas, wën sii leewe tuut mit en anere man soo lang wii sayne man leewent is, wërt se eepricher kenënt. Awer, wën te man xtërept, is se lekal fray un macht khee eepruch wën se mit en anere man hayrate tuut. 4Tas selwiche paseyert mit aych, mayn priiter. Teyer sayt kextorep fer ti kesets torich Kristus sayne khërwer. Un yets keheyert teyer tsu iim, woo peleept kep is tas meyer en nutsliches leewe im Kotes tiinst leewe khëne. 5Also, wan meyer keleept hon tëm noo unser mënxlich natuer, sin ti xlechte wile wach kemach kep in unser kanse khërwer torich ti kesets un hon uns tsum toot kefiert. 6Awer, yets sin meyer fray fon te kesets wayl meyer kextorep sin fer tas woo uns kefang kehal hat. Tesweche sin meyer fray fer Hërkot se tiine net wii in te friirix aart, ti kexrip kesets am aan heere, awer in te nay aart, em Hërkot sayne Kayst am aan heere.
Ti kesets un te sint
7Was khëne meyer tan saan? Tas ti aychent kesets sint is? Kans sicher net! Awer es waar ti kesets woo mich wise kemach hot was sint is. Wayl ich wist net was pekeerichkheet is wën tas kesets mich tas net kesaat het: “Pekeer net.” 8Awer, te sint hot sich fon tee kesets penutst fer in mich ale sorte pekeer wach mache. Wayl, wën es net ti kesets kept, is te sint en kaput tings. 9Es waar en tsayt woo ich net ti kesets kekhënt hon un waar leewent. Awer, wii ich te kepoote khëne kelërnt hon, hot te sint aankefang se leewe, 10un ich sin kextorep. Un te aychne kepoote woo het mise mich es leewe pringe, hot mich te toot keprung. 11Wayl te sint, ti keleechenheet am penutse woo te kepoote kep hat, hot mich hinerkang un, torich em kepoote, mich toot kemach.
12Soo khomt ti kesets fon Hërkot; un te kepoote khomt aach fon Hërkot, saat was richtich un kuut is. 13Meecht, tan, was kuut is mich tsum toot kefiert hon? Kans sicher net! Es waar te sint woo tas kemach hot. Wayl te sint, am penutse was kuut is, hot mich te toot keprung tas es kans klaar kewe teet tas was te sin wërklich is. Un soo, torich em kepoote, hot te sint sich noch xreklicher ketsaycht.
Te konflikt in uns
14Meyer wise tas ti kesets kaystlich is; awer ich sin mënxlich un xwach un sin ferkhaaf kep fer te sint fer sayne sklaawe se sin. 15Ich ferxteen net was ich mache, wayl ich mache net was ich kërn mache teet. Kraat es keeche teel, mache kraat tas woo ich hase. 16Wën ich mache was ich net wil, tas pewayst tas ich erkhëne tas ti kesets saat was richtich is. 17Un tas tsaycht tas, in te woerheet, es xon net ich sin woo tas macht, awer te sint woo in mich trin leewe tuut. 18Wayl ich wees tas was kuut is net in mich trin leept, tas mënt, in mayn mënxlich natuer. Wayl, wën ich ach in mich trin te wile hon fer tas kuutes se tuun, ich kriin tas net kemach. 19Ich mache net tas kuutes woo ich mache wil, awer kraat tas xlechtes woo ich net mache wil. 20Awer, wën ich mache was ich net wil, sin es xon net ich woo tas macht, awer te sint woo in mich trin leewe tuut.
21Soo wees ich tas was paseyert mit mich is tas: wën ich tuun wil was kuut is, kriin ich ploos kemach was xlecht is. 22In mich trin wees ich tas ich em Hërkot sayn kesets kërn hon. 23Awer ich siin en anerxter kesets am xafe an was ich mache, en kesets woo khëmft keeche was mayne ferxtant aproweyert. Ti macht fon mich en kefangne fon te sinte kesets woo in mayne khërwer xaft. 24Wii unkliklich sin ich! Weyer tuut mich pefraye fon tëm khërwer woo mich tsum toot fiert? 25Tas Hërkot keloopt kept, wayl eyer tuut tas mache torich unser Hër Yeesus Kristus!
Also, tas is mayn situatsioon: in mayn ketanke tiine ich em Hërkot sayn kesets, awer mit mayn mënxlich natuer tiine ich ti kesets fon te sinte.
