Tas leewe im Hayliche Kayst
1Yets kept es xon khee konteneerung mee fer ti mënxe woo fereenicht sin mit Yeesus Kristus. 2Wayl ti kesets fom Hërkot sayne Kayst, woo uns leewe keprung hot wayl meyer fereenicht sin mit Yeesus Kristus, hot tich pefrayt fon te kesets fon te sinte un fom toot. 3Hërkot hot kemach was ti kesets net khont mache wayl ti mënxlich natuer xwach waar. Hërkot hot te sint konteneyert in te mënxlich natuer, sayne aychne Soon am xike, woo khom is in unser sintich natuer fer xlus mache mit te sinte. 4Hërkot hot tas kemach tas meyer khënte ti kerechte ortnunge fon te kesets komplët inhale, woo leewe tëm noo em Herkot sayne Kayst un net tëm noo ti mënxlich natuer. 5Wayl ti mënxe woo leewe tëm noo ti mënxlich natuer hon sayne ferxtant kontroleyert torich tii selwich natuer. Awer, tii woo leewe tëm noo Hërkot sayne Kayst hon sayne ferxtant fom Kayst kontroleyert. 6Kontroleyert kewe torich ti mënxlich natuer fiert uns tsum kaystliche xtërwe; awer, kontroleyert kewe torich em Hërkot sayne Kayst, fiert uns tsum eewiche leewe un friite. 7Tesweche kewe ti mënxe woo fon te mënxlich natuer kontroleyert sin faynte fon Hërkot, wayl se net em Hërkot sayn kesets noo keen un, in te woerheet, khëne se net noo keen. 8Ti mënxe woo leewe tëm noo sayn mënxlich natuer khëne Hërkot net kefale.
9Teyer, awer, leept net wii ti mënxlich natuer xikt, awer wii em Hërkot sayne Kayst wil, wën tee wërklich in aych leept. Weyer net Kristus sayne Kayst hot keheyert net tsu tëm. 10Awer, wën Kristus in aych leept, tan, wën ach ayre khërwer xtërwe tuut weche te sinte, is em Hërkot sayne Kayst leewe fer aych wayl teyer aan kenom kept waart fon Hërkot. 11Wën in aych te Kayst fon tëm woo Yeesus witer peleept hot leept, tan kept tee woo Yeesus Kristus peleept hot aach leewe fer ayre xtërwliche khërwer, torich sayne Kayst, woo in aych leewe tuut.
12Also, mayn priiter, meyer hon en flicht, woo is net leewe tëm noo unser mënxlich natuer. 13Wayl, wën teyer leewe tuut noo ayer mënxlich natuer, tuut teyer kaystlich xtërwe; awer, wën torich em Hëkot sayne Kayst teyer ayre sintiche aktsioone toot macht, tuut teyer kaystlich leewe. 14Wayl, tii woo kefiert kewe torich em Hërkot sayne Kayst sin Hërkot sayn khiner. 15Wayl te Kayst woo teyer fon Hërkot kriit hot macht aych khee sklaawe un macht net tas teyer pang het. Kraat es keeche teel, te Kayst macht aych Hërkot sayn khiner; un torich ti macht fom Kayst saan meyer mit xtrame klaawe fer Hërkot: “Fater, mayne Fater!” 16Em Hërkot sayne Kayst fereenicht sich mit unsere kayst fer se fersichere tas meyer Hërkot sayn khiner sin. 17Meyer sin tëm sayn khiner, un tesweche kriin meyer seechne woo eyer uf heept fer sayn folek, un kriin aach mit Kristus tas was Hërkot uf kehoop hot fer iim. Wayl, wën meyer teel mit hale in Kristus sayn layte, tuun meyer aach mit hale in sayn kloor.
Ti futur kloor
18Ich tënke tas was meyer layte iwer unser leewe khan net ferklaycht kewe, uf khee aart, mit te kloor woo uns reweleyert kept im futur. 19Te kanse Uniwërs waart mit kroos unketult te momënt woo Hërkot uns reweleere tuut was tëm sayn khiner wërklich sin. 20Wayl te Uniwërs is unneetich kep, net weche sayne aychne wile, awer wayl Hërkot wolt tas soo hon. Awer, es kept tii hofnung: 21Eene taach kept te aychne Uniwërs fray fon te fernichtung macht woo em als sklaawe pehalt un wërt teel nëme in te klorioos frayheet fon Hërkot sayn khiner. 22Wayl meyer wise tas pis yets te kanse Uniwërs yoomert un phayn mit macht wii en fraa woo en khint uf ti welt am pringe is. 23Un net ploos te Uniwërs, awer meyer, woo te Hayliche Kayst hon als eyerxt kexënk woo meyer fon Hërkot kriit hon, meyer aach tuun yoomere in uns selwer soo lang wii meyer waarte tas Hërkot mache tuut tas meyer tëm sayn khiner sin un uns kans pefrayt. 24Wayl es waar torich ti hofnung woo meyer keret kep sin. Awer, wën meyer xon siin was meyer waarte, tan is tas net mee en hofnung. Weyer playpt am waarte uf was eyer xon siin khan? 25Awer, wën meyer etwas am waarte sin woo meyer noch net siin khëne, tan waarte meyer mit ketult.
26Soo aach khomt te Kotes Kayst uns helfe in unser xwachheet. Wayl meyer wise net wii meyer peete sole, awer te Hërkots Kayst, mit yoomere woo meyer net in wërter aus xpreche khëne, ferlangt fer Hërkot fer uns. 27Un Hërkot, woo siit was im hërts trin is, wees was te ketanke fom Kayst is. Wayl te Kayst ferlangt fer Hërkot sayn folek un ferlangt tëm noo Hërkot sayne wile. 28Wayl meyer wise tas aler tings paysamer xaft fer kuut fon tëne woo Hërkot liipe, fon tëne woo eyer keruuf hot, tëm noo sayne plaan. 29Wayl tii woo fon Hërkot xon raus kesuucht kep waare, hot eyer ap keteelt fer eenlich se sin mit sayne Soon. Tee hot tas kemach tas sayne Soon te eyerxte weyer fon fiile kexwister. 30Soo, hot Hërkot keruuf tii woo eyer ap keteelt hat. Hot se net ploos keruuf, hot se aach aan kenom; un hot se net ploos aan kenom, awer hot aach sayn kloor mit tëne ferteelt.
Hërkot sayne liipe, woo unser is torich Yeesus Kristus
31Tsu tas ales, was khan noch kesaat kewe? Wën Hërkot pay uns is, weyer wil sich keeche uns xtele? Nimant! 32Wayl eyer hot net mool sayne Soon tsurik kehal, awer hot en keopfert weche uns al! Wën eyer uns sayne Soon kep hot, meecht eyer uns net aach aler tings kewe? 33Weyer tuut aan kewe tii woo Hërkot raus kesuucht hot? Nimant! Wayl te aychne Hërkot tuut aan saan tas tii khee xult hon. 34Meecht yemant tii konteneere khëne? Nimant! Kristus is fer tii kextorep, un noch, is weyer witer peleept kep is un is uf te rechts sayt fon Kot. Un tee tuut pite fer uns. 35Tan, weyer khan uns ap teele fon Kristus sayne liipe? Meechte es ti layte sin, ti xwiirichkheete, ferfolichung, te hungers noot, ti aarmut, te kefoer ore te toot? 36Wii ti Hayliche Xrifte saan:
“Weche tich sin meyer in toot kefoer te kanse taach;
meyer kewe pehantelt wii xoofe woo noo te xlachteray kenom kewe.”
37In al tëne situatsioone hon meyer te komplët triunf torich tëm woo uns keliipt hot. 38Wayl ich sin sicher tas niks uns ap teele khan fon Hërkot sayne liipe; net te toot, net es leewe; net ti ëngle, net mool anere autoriteete ore himlixe machte; net te presënt, net te futur; 39net ti welt fon tort uwe, net ti welt fon tort une. Im kanse Uniwërs kept es niks woo uns ap teele khan fon Hërkot sayne liipe, woo unser is torich Yeesus Kristus, unser Hër.
