Tas naye leewe in Kristus
1Also, was wëre meyer saan? Meechte meyer mise wayter leewe in sinte tas te Hërkots knaate noch kreeser kept? 2Sicher net! Meyer sin xon kextorep fer te sint; tan, wii khëne meyer wayter in sinte leewe? 3Kans sicher weest teyer tas, wii meyer ketaaft kep sin in Kristus Yeesus, sin meyer ketaaft kep fer fereenicht playwe aach in tëm sayne toot. 4Soo, wii meyer ketaaft kep sin, sin meyer mit tëm pekraap kep wayl meyer mit tëm kextorep sin. Un tas is soo tas, wii Kristus witer peleept kep is torich ti kloorix macht fom Fater, aach meyer en nay leewe leewe tuun.
5Also, wën meyer fereenicht kep sin mit tëm torich kraat soo en toot wii tëm sayne, aach soo kewe meyer fereenicht mit tëm torich en peleepung kraat soo wii tëm sayn. 6Wayl meyer wise tas unser alt sintich natuer is toot kemach kep mit Kristus am krayts tas unsere sintiche ich toot kemach keept, un tas meyer soo net mee sklaawe sin fom sint. 7Wayl, weyer xtërept playpt fray fon te macht fom sint. 8Wën meyer xon kextorep sin mit Kristus, klaawe meyer tas meyer aach mit tëm leewe tuun. 9Meyer wise tas Kristus peleept kep is un nii mee xtërwe tuut, wayl te toot hot khee macht mee iwer iim. 10Sayne toot waar en toot fer te sint un kilt fer imer. Un tas leewe woo eyer yets leept is en leewe fer Hërkot. 11Soo aach teyer mist aych toot rechne fer te sint; awer, wayl teyer in Kristus Yeesus sayt, mist teyer aych leewent rechne fer Hërkot.
12Also, lost net tas te sint ayre xtërwliche khërwer tomineyert. Un lost net tas te sint macht tas teyer ti wunxe noo keet fon ayer sintich mënxlich natuer. 13Un tuut aach khee teel fon ayre khërwer ap kewe fer te sint, tas tee net penutst kewe khan fer se tuun was xlecht is. Kraat es keeche teel, als mënxe woo fom toot keprung kep sin ins leewe, kept aych komplet ap fer Hërkot, tas tee aych penutse tuut fer se mache was richtich is. 14Te sint tuut aych net tomineere, wayl teyer sayt net mee kontroleyert torich ti kesets, awer torich Hërkot sayn knaate.
Hërkot sayn sklaawe
15Was sol tas petayte? Tuun meyer wayter sinte mache wayl meyer net mee kontroleyert kewe torich ti kesets, awer torich Hërkot sayn knaate? Sicher net! 16Wayl teyer wist kans kuut tas, wën teyer aych ap kept fer sklaawe se sin fon yemant, sayt teyer wërklich sklaawe fon tëm mënx woo teyer aan heere tuut. Un soo, khënt teyer te sint aan heere, woo te toot protutseyert, ore khënt teyer Hërkot aan heere un fon tëm aankenom kewe. 17Awer, meyer tanke Hërkot wayl teyer, woo tefoer sklaawe waart fom sint, tuut yets mit ayer kans hërts ti woerheet aan heere. Ti woerheet is in te unterichte woo teyer kriit hot. 18Teyer sayt pefrayt kep fom sint un sayt sklaawe fon Hërkot fer se mache was richtich is. 19Ich xpreche mit kans keweenliche wërter wayl teyer noch xwach sayt. In te ferkangne tsayt, het teyer aych kans ap kep als sklaawe fon te imoraliteet un fon te xlechtichkheet fer tas xlechtes se tiine. Kept aych yets kans ap als sklaawe fon was richtich is fer en leewe hiin keopfert fer Hërkot se leewe.
20Wan teyer sklaawe fom sint waart, het teyer net kemach was richtich waar. 21Awer, was het teyer fon kuutes fertiint wii teyer tas tings kemach het fon was teyer aych hayt xeeme tuut? Wayl te resultaat fon tëm ales is te toot. 22Awer, yets sayt teyer pefrayt kep fom sint un sayt sklaawe fon Hërkot. Too temit fertiint teyer en leewe kans an tëm hiin keopfert, un te resultaat is tas teyer es eewiche leewe kriit. 23Wayl te loon fom sint is te toot, awer tas kexënk woo teyer umsonst kriit fon Hërkot is tas eewiche leewe, woo meyer hon Kristus Yeesus, unsere Hër.
