Fon Hërkot aan kenom
1Yets woo meyer aan kenom kep sin fon Hërkot torich unsere klaawe an tëm, hon meyer friite mit tëm torich unser Hër Yeesus Kristus. 2Es waar Kristus weyer uns kep hot, torich unsere klaawe, tas leewe in Hërkots knaate. Un yets playwe meyer xtram in tëm klaawe un fraye uns in te hofnung fer mit hale an Hërkots kloor. 3Un meyer tuun uns aach fraye im layte, wayl meyer wise tas ti layte ketult protutseere, 4te ketult pringt Hërkots sayn aproweerung, un tii aproweerung tsiit ti hofnung. 5Tii hofnung lost uns net tesaponteere, wayl Hërkot hot sayne liipe aus kexut in unser hërts, torich te Hayliche Kayst, woo eyer uns kep hot.
6In te woerheet, wan meyer khee kaystlich kraft hate, is Kristus kextorep uf te xlechte sayn plats, in te tsayt woo Hërkot aus kesuucht hat. 7Kans xwiirich yemant fine woo aan nëme teet se xtërwe weche yemant woo ti kesets noo keet. Khan sin tas yemant koraaj het fer se xtërwe weche en kuute mënx. 8Awer, Hërkot hot uns ketsaycht wii fiil eyer uns liipe tuut: Kristus is uf unser plats kextorep wan meyer noch in sinte keleept hon. 9Un, yets woo meyer aan kenom kep sin fon Hërkot torich Yeesus sayne toot am krayts, is noch sicherer tas meyer pefrayt kewe, torich iim, fon Hërkot sayne xtroof. 10Meyer waare faynte fon Hërkot, awer eyer hot uns in froynte transformeyert torich te toot fon sayne Soon. Un, yets woo meyer Hërkot sayn froynte sin, is es noch sicherer tas meyer keret kewe torich Kristus sayn leewe. 11Un net ploos tas, awer tuun uns aach fraye weche was Hërkot kemach hot torich unser Hër Yeesus Kristus, woo yets uns in Hërkot sayn froynte transformeyert hot.
Aatam un Kristus
12Te sint is uf unser welt khom torich een eensichste man, un sayne sint hot te toot mit sich keprung. Als resultaat, hot te toot sich ferxtraut fer ti kans mënxheet wayl se al sinte kemach hon. 13Eep ti kesets ap kep waar, waar xon te sint uf te welt; awer, wën ti kesets net eksisteyert, tuut Hërkot te sint net rechne. 14Awer, tsayt Aatam say tsayte pis Mooses, hot te toot ti kanse mënxe tomineyert, wën se ach net sinte kemach hon wii Aatam, wii eyer Hërkot sayn ortnung net aan keheyert hot.
Aatam waar ti fikur fon tëm woo khome solt. 15Awer es kept en unerxiit tswixe Aatam sayne sint un tas kexënk woo Hërkot uns kept. In te woerheet, fiile sin kextorep weche em sint fon eene eensichste mënx; awer Hërkot sayne knaate is fiil kreeser, un eyer kept ti retung umsonst fer fiile, torich em knaate fon eene eensichste man, Yeesus Kristus. 16Un es kept en unerxiit tswixe was Hërkot kept un te sint fon eene eensichste man. Wayl, im fal fom sint, ti kontenatsioon is khom weche eene eensichste sint. Awer, im fal fon te retung, tuut Hërkot fertsaye tii woo fiil sinte kemach hon, wën se ti retung ach net fertiint hon. 17Is woer tas, weche eene eensichste man un weche sayne sint, te toot aankefang hot ti mënxheet se tomineere. Awer te resultaat fon was kemach kep is fon eene eensichste man, Yeesus Kristus, is fiil kreeser! Un al tii woo Hërkot aan nëme un woo als kexënk sayne kroose knaate kriin, tuun rechiire in naye leewe, torich Kristus.
18Also, soo wii ploos eene sint ale mënxe konteneyert hot, soo aach ploos eene retungs akt pefrayt ale layt un kept tëne leewe. 19Un soo wii fiile mënxe in sinter transformeyert kep sin weche eene ensichste man woo net keheyert hot, soo aach kewe fiil fon Hërkot aan kenom weche eene ensichste man woo keheyert hot.
20Ti kesets is khom fer tas xlechte ferkreesere. Awer, woo te sint sich ferkreesert hot, hot Hërkot sayne knaate sich noch fiil mee ferkreesert. 21Un tas is paseyert tas, soo wii te sint tomineyert hot un te toot keprung hot, soo aach Hërkot sayne knaate, woo macht tas eyer ti mënxe aan nëmt, tomineere teet un tas eewiche leewe pringe teet. Tas leewe is unser torich unser Hër Yeesus Kristus.
