Reemer 4

₁Tan, was khëne meyer saan iwer Aapraham, te foerkhomer fon unser folek? Was waar es woo eyer fertiint hot? ₂Wën tas weche em tings woo eyer fërtich keprung hot woo Hërkot iim aan kenom hot, tan hat eyer motiif fer sich xtolseere, awer net foer Hërkot. ₃Also, was saan ti Hayliche Xrifte? Tii saan: “Aapraham hot an Hërkot keklaapt, un tesweche hot Hërkot iim aan kenom.” ₄Te loon woo te aarwater kriit is khee kexënk, awer is ti peloonung woo eyer recht hot weche ti aarwat woo eyer kemach hot. ₅Awer, te persoon woo net sayn hofnung an was eyer macht traan tuut, awer tuut ploos an Hërkot klaawe, is te klaawe fon tëm persoon woo macht tas Hërkot iim aan hoole tuut, te Hërkot woo en xultner pehantelt wii wën eyer unxultich weyer. ₆Un waar tas woo Dawii saan wolt wën eyer kexproch hot iwer ti kliklichkheet fon tëne woo Hërkot aan nëmt, oone se kuke was se mache. ₇Dawii saat:

₉Meecht tii kliklichkheet woo Dawii triwer kexproch hot ploos eksisteere fer tii woo pexnit sin? Mool sicher net! Tii eksisteyert aach fer tii woo net pexnit sin. Wayl meyer hon xon kesaat tas ti Hayliche Xrifte saan: “Aapraham hot an Hërkot keklaapt un, tesweche, hot Hërkot iim aan kenom.” ₁₀Wan is tas paseyert? Waar tas tefoer ore tëm noo wii Aapraham pexnit kep waar? Es waar tefoer, un net tëm noo. ₁₁Tee is xpeeter hiin pexnit kep. Un tëm sayn pexnaytung waar en sinal fer se pewayse tas Hërkot iim aan kenom hot wayl tee klaawe hat; un tas is paseyert wii tee noch net pexnit kep waar. Soo is Aapraham te kaystliche fater fon al tii woo an Hërkot klaawe un fon tëm aan kenom kewe, wën se ach net pexnit sin. ₁₂Tee is aach te fater fon tëne woo pexnit sin. Net ploos wayl se pexnit sin, awer wayl se es selwiche klaawiche leewe leewe wii Aapraham, unser fater, keleept hot eep eyer pexnit kep waar.

₁₃Hërkot hot fer Aapraham un sayn nookhomer ferxproch tas ti welt tëne keheere teet. Tii ferxprechung is kemach kep net wayl Aapraham ti kesets noo kang waar, awer wayl eyer an Hërkot keklaapt hat un waar aan kenom kep fon iim. ₁₄Also, wën tii woo ti kesets noo keen kriin was Hërkot ferxprtoch hat, tan is te klaawe unnutslich un Hërkot sayn ferxprechung hot khee weyert. ₁₅Wayl ti kesets pringt Hërkot sayne xtroof. Awer, woo es khee kesets kept, kept es aach khee unkeheyer keeche ti kesets.

₁₆Un soo, hot Hërkot sayn ferxprechung sayn basis am klaawe, tas ti ferxprechung karanteyert kept als en kexënk fon Hërkot fer ale nookhomer fon Aapraham. Ti is net ploos fer tii woo ti kesets noo keen, awer aach fer tii woo an Hërkot klaawe wii Aapraham keklaapt hot, wayl eyer is te kaystliche fater fon uns al. ₁₇Wii ti Hayliche Xrifte saan: “Ich hon fon tich te fater fon fiile natsioone kemach.” Soo, tuut ti ferxprechung fon Hërkot ap hënge, te Hërkot an weem Aapraham keklaapt hot, te Hërkot woo ti toote peleepe macht un macht tas eksisteere tuut was net eksisteyert hat. ₁₈Aapraham hat klaawe un hofnung kehat, sokaar wan khee motiif waar fer hofnung se hon, un tesweche is eyer fon fiile natsioone fater kenënt kep. Wii ti Hayliche Xrifte saan: “Sayn nookhomer wëre fiile.” ₁₉Aapraham waar neekst hunert yoer alt. Awer, wii eyer an sayne khërwer ketënkt hot, woo xon wii toot waar, ore wan eyer ketënkt hot tas Sara khee khiner kriin khënt, is sayne klaawe net xwecher kep. ₂₀Aapraham hot net sayne klaawe ferloer, un hot net ketswayfelt iwer Hërkot sayn ferxprechung. Sayne klaawe hot iim mit kraft kefilt, un eyer hot Hërkot keloopt ₂₁wayl eyer kans sicher waar tas Hërkot mache khënt was eyer ferxproch hat. ₂₂Tesweche, torich sayne klaawe, “is Aapraham aan kenom kep fon Hërkot.” ₂₃Ti wërter “is aan kenom kep” xpreche net ploos fon tëm. ₂₄Xpreche aach fon uns, woo aan kenom kewe, meyer woo an Hërkot klaawe, te Hërkot woo Yeesus, unser Hër, peleept hot. ₂₅Yeesus is ap kep waar fer se xtërwe weche unser sinte un is peleept kep tas meyer aan kenom keepte fon Hërkot.