1Tan, was fertiint mer fer en yut se sin? Hat ti pexnaytung en weyert? 2Yoo, sicher, un uf fiile aarte! Un ti eyerxt wantaaj is tas Kot sayn mensaaj an ti yute wayter kep hot. 3Awer, wën phaar net leaal keplip sin, meecht Hërkot tesweche net leaal sin? 4Uf khee fal! Hërkot playpt eerlich, wën ach ale mënxe uneerlich sin. Wii ti Hayliche Xrifte saan iwer iim:
“Tas es pewayst kept tas tuu recht hast
wën tuu xprechst
un tas tuu kewine tuust
wën tuu julkeyert kepst.”
5Awer, wën ti unkerechtichkheete woo meyer mache tiine fer se tsayche tas Hërkot mit justis um keet, was khëne meyer saan? Tas Hërkot unkerechtich is wën tee uns xtroofe tuut? (Ich xpreche hier wii ti mënxe keweent sin se xpreche.) 6Tas khan net sin! Wën Hërkot net kerechtich weyer, wii khënt eyer ti welt julkeere?
7Awer, khan ich saan tas mayn liye mache tas em Hërkot sayn woerheet mee klaar playpt, tëm sayn kloor am ferkreesere? In tëm fal, warom mus ich noch konteneyert kewe als en sinter? 8Tan, warom net saan: “Meyer mache tas xlechtes tas fon tëm xlechtes tas kuutes khome khan?” In te woerheet, phaar hon liye iwich mich kesaat, am saan tas ich tas fersichere. Awer, ti kewe konteneyert, wii se es fertiine tuun.
Meyer al sin xultich
9Tan, meechte meyer, ti yute, in en peser situatsioon sin als tii woo khee yute sin? Uf khee aart! Ich hon xon fer aych ketsaycht tas ale layt, yute un tii woo khee yute sin, sin unich te macht fom sinte. 10Wii ti Hayliche Xrifte saan:
Is khee ëne mënx woo macht was richtich is;
11is nimant woo ferxtant hat;
es kept nimant woo Hërkot atoreere tuut.
12Al hon sich aus kewaycht fom richtiche weech,
al hon em ferloer.
Is nimant mee woo macht was kuut is,
is wërklich nimant mee.
13Al tuun liye un hinerkeen oone uf se heere.
Fon tëne sayn tsung khome xlechte liye,
un fon sayn lipe khome wërter fom toot,
wii wën tas xlange kift weyer.
14Tëne sayn munt is fol fon xrekliche ferfluuchunge.
15Ti hons aylich fer um se pringe.
16Woo se torich khome, lose se fernichtung un unklik.
17Ti khëne net te weech fom friite
18un hon net kelërnt Hërkot se eere.
19Meyer wise tas ales was ti kesets saat, kept kesaat fer tii woo unich te kesets leewe. Tas ti layt al uf heere sich justifikeere un tas ti kanse layt fon te welt unich em Hërkot sayne julkamënt playwe. 20Also, nimant kept fon Hërkot aan kenom wayl eyer macht was ti kesets xikt, wayl ti kesets macht tas yeete ëne se wise kriit tas se sinter sin.
Retung torich em klaawe
21Awer yets hot Hërkot xon ketsaycht tas te mitel woo eyer ti layt aan nëme tuut niks se tuun hot mit te kesets. Mooses un te Profëte sayn Kesets kept tsayer too triwer: 22Hërkot tuut ti layt aan nëme torich te klaawe woo se an Yeesus Kristus hon. Soo tuut Hërkot pehantle tii woo klaawe tuun, wayl es khee unerxiit unich te layt kept. 23Al hon sinte kemach un mise wayt wech playwe fon Hërkot sayn kloor. 24Awer, torich sayne knaate un oone niks tsurik ferlange, tuut Hërkot se al aan nëme torich Yeesus Kristus, woo se rete tuut. 25-26Hërkot hot Yeesus keopfert, soo tas, torich tëm sayne toot am krayts, Kristus te mitel wëre khënt tas ti mënxe ti fertsayung fon sayn sinte kriin teere, torich te klaawe an tëm. Hërkot wolt soo tsayche tas eyer kerechtich is. In te ferkangne tsayt waar eyer ketultich un hot ti mënxe net kextrooft weche sayn sinte; awer yets, weche Kristus sayne opfer, tsaycht Hërkot tas eyer kerecht is. Soo is eyer kerecht un tuut aan nëme tii woo an Yeesus klaawe.
27Meechte meyer uersach hon fer hoochmuutich se kewe? Uf khee aart! Un warom net? Meecht es sin wayl meyer ti kesets noo keen? Nee; is net. Is wayl meyer an Kristus klaawe. 28Soo ferxteen meyer tas Hërkot te mënx aan nëmt torich te klaawe un net wayl te mënx macht was ti kesets xikt. 29Ore meecht Hërkot ploos te Hërkot fon te yute sin? 30Hërkot is ploos ëne un tuut ti yute aan nëme in basis an tëne sayne klaawe un tuut aach tii woo khee yute sin aan nëme torich em klaawe woo tii hon. 31Meech tas petayte wole tas, weche em klaawe, meyer ti kesets pehantle wii wën tii khee weyert het? Nee; uf khee aart! Kraat es keeche teel, meyer fersichere tas ti kesets weyert hot.
