Hërkot julkeyert ti layt
1Mayne froynt, hot niks se saan weyer tuu pist, tuu hast khee unxultichung wëns tuu ti anere julkeere tuust. Wayl, wan tuu se julkeere tuust, awer machst tas selwiche woo tii mache, pist tuu tich selepst am konteneere. 2Meyer wise tas Hërkot kerecht is wën eyer konteneere tuut tii woo tas mache. 3Awer tuu, woo tas selwiche tuust woo tuu an te anere konteneere tuust, meechst tuu tënke tas tuu tich auswayche khanst fon Hërkot sayne julkamënt? 4Ore meechst tuu net siin Hërkot sayn kroos kuutheet, ti tolerans un ketult? Tuu weest kans kuut tas tee kuut is un tas eyer mache wil tas tuu tayn leewe ënere tuust. 5Awer tayn hërts is hart un tik khopich. Tesweche pist tuu yets tayne xtroof am ferkreesere woos tuu mit mache must am taach woo em Hërkot sayn wuut un ti kerechte julkamënte reweleyert kewe, 6wayl eyer tuut yeete ëne peloone tëm noo was tee kemach hot. 7Hërkot kept es eewiche leewe fer ti layt woo imer tas kuutes mache un tuun ti kloor, ti eere un tas eewiche leewe suuche. 8Awer macht sayn wuut un sayne xtroof fale uf ti woo ploos an sich selepst tënke un tii woo neewe lose was kerecht is fer em xlechtes noo keen. 9Es kept layte un fertswayflung fer al tii woo xlechtes tuun, eyerxt fer ti yute un aach fer tii woo khee yute sin. 10Awer, Hërkot kept ti kloor, eere un friite fer tii woo tas kuutes tuun, eyerxt fer ti yute un aach fer tii woo khee yute sin. 11Wayl eyer pehantelt ale mënxe ekaal.
12Al tii woo sinte mache oone em Hërkot sayn kesets khëne tuun sich ferleere oone tii kesets; awer, al tii woo sinte mache awer khëne Hërkot sayn kesets kewe tëm noo julkeyert. 13Wayl ti layt woo Hërkot aan nëmt sin net ploos tii woo ti kesets aan heere, awer tii woo mache was ti kesets xikt. 14Tii woo khee yute sin hon net ti kesets. Awer, wën se mache aus sayne aychne wile was ti kesets xikt, sin tii sayn aychne kesets, wën se ach net ti kesets hon. 15Ti tsayche, torich was se mache, tas se ti kesets ins hërts kexrip hon. Sayne aychne kewise tsaycht tas tas woer is, un sayn ketanke, woo manich mool se aan kewe ore manich mool se tefenteere, tuun tas aach tsayche. 16Un, tëm noo mit em ewankeelium woo ich aan saan, soo wërt es paseere am taach woo Hërkot, torich Yeesus Kristus, ti heeliche ketanke fon ale mënxe julkeere tuut.
Ti yute un ti kesets
17Was khan mer saan fon tich? Tuu saast tas tuu en yut pist, klaapst an ti kesets un pist xtols uf te Hërkot woos tuu atoreyerst. 18Tuu weest was Hërkot wil tas tuu mache solst un lërnst in te kesets aus suuche was richtich is.
19Tuu pist sicher tas tuu te fiirer fon te plinte pist, licht fer tii woo in te tunkelheet sin, 20instruktoer fer ti woo khee xtuutium hon un leerer fer ti yunge. Tuu pist sicher tas tuu in te kesets ti komplet foerxtelung finst fom khëntnis un fon te woerheet. 21Tuu woo ti anere in lërne tuust, warom lërnst tuu tich net selepst? Wën tuu saast tas mer net xteele tëref, warom tuust tuu selepst xteele? 22Wëns tuu saast tas mer net tëref sayne man ore fraa hinerkeen, warom tuust tuu selepst tayne phaar hinerkeen? Tuu tuust ti iitole hase, awer xteelst tings fon te thëmple. 23Tuu tuust tich xtolseere wayl tuu Hërkot sayn kesets host, awer tuu pist en ximp fer Hërkot wayl tuu net tëm sayn kesets noo keest. 24Wayl ti Hayliche Xrifte saan: “Tii woo khee yute sin xpreche xlecht fon Hërkot weche aych, ti yute.”
25Ti pexnaytung hot sayne weyert wëns tuu, woo en yut pist, ti kesets noo keest; awer, wën tuu tii net noo keest, is es wii wën tuu net pexnit kep weyerst. 26Un, wën en man woo net pexnit kep waar ti kepoote fon te kesets noo keet, tuut Hërkot em pehantle wii wën eyer pexnit kep weyer. 27Soo teyer, yute, wërt konteneyert fon tëne woo khee yute sin, wayl teyer net ti kesets noo keet wën teyer se ach kexrip hot un pexnit kep waart, soo lang wii ti woo khee yute sin ti kesets noo keen, wën se ach net pexnit kep waare. 28Also, ich frooe: weyer is en echte yut un is wërklich pexnit kep? Is sicher net tee woo en yut is ploos auswënich un pexnit ploos am khërwer. 29Es keeche teel, te echte yut is tee woo inerlich en yut is, tee woo sayn hërts pexnit hot; un tas is etwas woo em Hërkot sayne Kayst macht un woo ti kexrip kesets net mache khan. Un te loop woo tee persoon kriit khomt net fon te mënxe, awer khomt fon Hërkot.
