Ti kuut naychkheet fer ale layt
1Ich, Phaulus, tiiner fon Yeesus Kristus, xraywe tee priif. Hërkot hot mich keruuf un hot mich apketeelt fer sayne aphostel sin, tas ich ti kuut naychkheet aan saan fom Hërkot sayne ewankeelium.
2Xon lang tsayt tsurik waar tii kuut naychkheet xon ferxproch kewees kep, torich sayn profëte, un kexrip kep in te Hayliche Xrifte. 3-4Tii xprecht iwer Hërkot sayne Soon, unser Hër Yeesus Kristus, woo, als mënx, nookhomer fom kheenich Dawii waar, un waar mit kroos macht pewayst als em Hërkot sayne Soon, tëm noo em Kayst fon haylichkheet, torich sayn peleepung. 5Torich Kristus, hot Hërkot mich ti eere kep fer mënxe fon ale natsioone fiire fer an Kristus klaawe un tëm aan heere. 6Unich tëne layt sayt teyer woo in Room woone tuut, woo Hërkot am ruufe is fer tsu Yeesus Kristus keheere.
7Tesweche xraywe ich fer aych al woo in Room sayt, al teyer woo Hërkot liipe tuut un woo eyer keruuf hot fer sayn aychne folek se sin.
Tas ti knaate un te friite fon Hërkot, unser Fater, un fom Hër Yeesus Kristus pay aych playwe!
Tank kepeet
8Am eyerxte plats, torich Yeesus Kristus tanke ich mayne Hërkot weche aych al, wayl uf te kans welt heyert mer xpreche iwich te klaawe woo teyer hot. 9Ich tiine Hërkot mit mayn kans hërts, ti kuute naychkheete am aan saan iwer tëm sayne Soon. Hërkot is tsayer tas ich ti woerheet saan. Tee wees tas ich imer an aych tënke 10un fer aych peete. Un ferlange fer Hërkot tas, wën tas sayne wile is, sol mache tas ich aych pesuuche khome khan. 11Wayl ich wil wërklich aych siin, fer mit aych ti kaystliche seechne teele, fer aych se xtërke, 12tas heest, tas mer uns ëne em anere uf muntere torich em klaawe woo teyer un ich hon.
13Mayn priiter, ich wil hon tas teyer se wise kriit tas fiil mools wolt ich aych pesuuche khome, awer pis yets khont ich tas net mache. Wayl ich het kërn tas mayn aarwat kuute resultaate pringe teet unich aych, soo wii es xon paseyert is unich anere woo khee yute sin. 14Wayl is mayn flicht fer al preetiche, soo fiil fer ti siwiliseyerte wii fer tii woo noch net siwiliseyert kep sin, soo fiil fer ti wisente wii fer tii woo noch khee wisheet hon. 15Is tesweche woo ich wil te ewankeelium aan saan aach fer aych woo in Room woont.
Ti macht fom ewankeelium
16Ich xeeme mich net fom ewankeelium, wayl tee is em Hërkot sayn macht fer se rete al tii woo klaawe, eyerxt ti yute un aach ti woo khee yute sin. 17Wayl te ewankeelium tsaycht wii Hërkot uns aan nëmt: is torich unsere klaawe, fom aanfank pis ans ën. Wii ti Hayliche Xrifte saan: “Wil leewe tee woo, torich em klaawe, fon Hërkot aan kenom kept.”
Ti xult fon te mënxheet
18Fom himel tuut Hërkot sayne xtroof reweleere keeche ale sinte un ale xlechtichkheete fon te mënxe woo, torich sayn ferkheyerte akte, net lose tas anere ti woerheet khëne iwer Hërkot. 19Hërkot xtrooft tii mënxe wayl was ti layt lërne khëne iwer Hërkot is kans klaar fer tii, wayl te aychne Hërkot hot tas tëne ketsaycht. 20Tsayt tas Hërkot ti welt ketsoo hot, sayn kwaliteete woo mer net siin khan, was mënt, sayn eewich macht un sayn himlix natuer, khëne kans klaar kesiin kewe. Ti mënxe khëne tas ales siin am tings woo Hërkot kemach hot. Soo, hon ti mënxe khee ausreet. 21Tii wise weyer Hërkot is, awer kewe tëm net ti kloor woo eyer fertiint hot un sin tëm net tankpaar. Kraat es keeche teel, te mënxe sayn ketanke sin tum kep un sayne leere sin is ketekt mit tunkelheet. 22Ti saan weere wisent, awer sin tum. 23Anxtat te unxtërwente Hërkot atoreere, tuun se iitole atoreere woo eenlich sin mit mënxe, ore mit feel, ore mit tiire fon fier fiis, ore mit tiire woo sich uf em potem rom xlepe.
24Tesweche hot Hërkot ti mënxe ap kep tsum wunx fon tëne sayn hërtse fer tas trekich tings mache un fer ximpliche ferpintunge ëne mit em anere mache. 25Tii tuun ti woerheet iwer Hërkot um troke uf liye un tuun tas tings woo Hërkot ketsoo hot atoreere un tiine, anxtat te aychne Hërkot atoreere un tiine, woo keloopt kewe mus fer imer. Aamen!
26Weche tëm tings woo tii mënxe mache, hot Hërkot se ap kep fer ximplich tings. Wayl sokaar ti fraae tuun ti natierliche ferpintunge umthauxe uf tii woo keeche ti natuer sin. 27Un aach ti mëner lose ti natierliche ferpintunge mit te fraae un prëne in pasioon ëne tsum anere. Mëner hon ximpliche ferpintunge ëne mit em anere un, tesweche, fertiine se fer sich selepst te xtroof weche sayn feeler.
28Un, wayl se net te waare khëntnis wise wole iwer Hërkot, hot Eyer se ap kep fer sayn aychne xlechte ketanke, soo tas se mache was se net tërfe. 29Sin fol fon ale sorte unrecht, xlechtichkheete, pekeerichkheet, nayt, toot telikte, xtrayt, liye un xlechtichkheete keeche ti anere. Tuun liye uf pringe 30un pringe kexpreech uf keeche ti anere. Hase Hërkot un sin frech xnisich, hooch muutich un praalix. Tënke fiile aarte fer xlechtichkheet fërtich pringe, tuun net sayn eltre aan heere 31sin imoraal, tuun net sayn wort inhale, tuun nimant liipe un tuun ti anere net petaure. 32Ti wise tas Hërkot sayne kepoote saat tas tii woo tas mache fertiine te toot. Awer toch soo mache se tas tings wayter un, noch xlimer, aproweere tii woo tas selwiche mache wii sii.
