In Malta
1Wii meyer xon uf lant waare, kesunt un keret, hon meyer se wise kriit tas ti insel Malta kenënt waar. 2Ti inwooner hon uns mit kuutheet pehantelt. 3Phaulus hot phaar xpeen uf kerof un waar tii ins fayer am xmayse, wan en xlang, fom fayer aus am rayse, sich an tëm sayn hant fest kepis hot. 4Ti pewooner fon te insel hon ti xlang kesiin hënge an Phaulus sayn hant un saate:
— Tee man mus yemant umkeprung hon. Tee hot sich fom meer keret, awer toch soo tuut ti himlix justis iim net leewe lose.
5Awer Phaulus hot ti xlang ap kexitelt ins fayer un hot niks kexpiert. 6Ti layt hon kewaart tas eyer uf xwele teet ore teet pletslich toot fale. Awer, wii se lang tsayt kewaart hate un niks paseyert is, hon se sayn meenung keënert un hon aankefang se saan tas eyer en kot waar.
7Ticht an tëm plats waar en lant woo fer Puuplio keheyert hot, te xëf fon te insel. Tee hot uns froyntlich uf kenom, un iwer tray taache waare meyer tëm sayn kaste. 8Tëm sayne fater hot im pet kelee, krank mit fiiwer un tisentery. Phaulus is in tëm sayn tsimer kang, hot en kepeet kemach, hot sayn hënt iwer em kehal un hot em keheelt. 9Too truf, sin ti anere kranke fon te insel pay khom un sin aach keheelt kep. 10Ti hon fiil rexpekt fer uns ketsaycht un, wii mer in kextii sin, hon se ales was meyer praychte fer ti rees in te poot ketuun.
Fon Malta pis Room
11Noo tray moonate uf te insel, sin meyer in kextii uf en poot fon te xtat Alexantria, woo fikuure fon te tswilings kote Kastor un Polux am sënge pooche hat. Te poot waar iwer te winter an te insel keplip. 12Meyer sin an ti xtat Sirakuus aan khom, woo meyer tray taache keplip sin. 13Fon too sin mer wayter kereest un sin pis an ti xtat Rëjium khom. Am anere taach hot te wint aankefang se ploose fom siit, un in tswaay taache sin mer in Puteoli aankhom. 14In tee xtat hon meyer phaar kriste aan ketrof woo uns ferlangt hon tas meyer een woch mit tëne playwe solte. Un soo sin mer in Room aankhom. 15Ti priiter fon Room hon ti oter kriit kehat tas meyer am khome waare un sin mit uns pekeechne khom in ti wile fon Apius Prase un Tray Wënte. Wii eyer se kesiin hot, hot Phaulus Hërkot ketankt un hot sich animeyert.
In Room
16Wii meyer in Room rin kang sin, hot Phaulus erlaupnis kriit fer aleen se woone, mit ploos eene soltaat fer iim se wache.
17Tray taache tëm noo, hot Phaulus ti yute fiirer fon Room in kelaat fer sich mit iim se trefe. Wii se fersamelt waare, saat eyer:
— Mayn priiter, ich hon niks keeche unser folek kemach, net mool keeche ti kewoonheete woo mer fon unser foerkhomer kriit hon. Toch soo, sin ich kefang kep in Yeruusalëm un sin ap kep waar fer ti reemer. 18Tii hon mich aus kefroot un wolte mich loos lose, wayl se khee uersach kefun hon fer mich tsum toot konteneere. 19Awer ti yute wolte net hon tas se mich loos lose teere. Tesweche, hon ich ferlangt fer julkeyert se kewe fom reemixe Kayser, wën ich ach khee akusatsioon hon fer se mache keeche mayn aychne folek. 20Tesweche hon ich ferlangt fer aych se siin un mit aych se xpreche. Ich sin mit tëne aysne khete aan kepun weche tëm woo Israël waarte tuut.
21Tan hon tii kesaat:
— Meyer hon khee priif fon Yutëya kriit iwich tich. Aach khee ëne fon unser priiter is fon tort khom mit oter ore fer xlecht se xpreche keeche tich. 22Awer, meyer wolte kërn fon tich heere was tuu tënkst, wayl meyer wise tas iweral ti layt keeche tayne krupe xpreche.
23Tan hon se en taach pextimt mit Phaulus, un an tëm taach sin fiil fon tëne khom pis uf es plats woo eyer waar. Fon moynts pis nacht hot eyer tëne ti mensaaj aan kesaat un auskeleet iwer te Hërkots Raych. Un, torich Mooses sayn Kesets un ti picher fon te Profëte, hot eyer fersuucht tas tii Yeesus erkhëne teere. 24Phaar hon tëm sayn wërter aan kenom, awer anere hon net keklaapt. 25Tan sin se al fort kang, unich sich am fertseele. Awer, eep se raus kang waare, hot Phaulus noch etwas kesaat:
— Te Hayliche Kayst hat recht kehat wii eyer torich te profët Isaiias kexproch hot fer ayre foerkhomer. 26Wayl eyer saat fer Isaiias:
Kee un saa fer tas folek:
Teyer heyert, awer ferxteet net;
tuut kuke, awer siit niks.
27Wayl te sin fon tëm folek is tsuu;
Tii hon ti oore tsuu ketekt un hon ti aue tsuu kemach.
Wën se tas net kemach hete, khënte sayn aue siin,
un sayn oore khënte heere;
tëne sayne kewise khënt ferxteen;
un tii teere tsurik khome fer mich,
un ich teet se heele — saat Hërkot.
28Un Phaulus macht xlus, am saan:
— Also, kriit se wise tas Hërkot ti mensaaj fon te retung kexikt hot fer tii woo khee yute sin! Un tii wole heere!
29[Wii Phaulus tas kesaat hot, sin ti yute fort kang, mit kewalt am tiskuteere.]
30Tswaay yoer hot Phaulus too in en kemiit haus kewoont un hot uf kenom al tii woo iim pesuuche khom waare. 31Tee hot te Hërkots Raych aan kesaat un hot keuntericht iwer te Hër Yeesus Kristus, am xpreche mit ale koraaj un frayheet.
