Ti flicht fer ti anere kefale tuun
1Meyer woo xtarek sin im klaawe mise ti xwache helfe sayne last traan un net uns selwer kefale. 2Kraat es keeche teel, yeete fon uns mus sayne pruuter kefale, fer tëm sayne kuut, tas eyer im klaawe wakse tuut. 3Wayl net mool te aychne Kristus hot fersuucht sich selwer kefale; im keeche teel, wii ti Hayliche Xrifte saan: “Ti pelaytichunge fon tëne woo tich ferxënt hon sin uf mich kefal.” 4Wayl ales was in ti Hayliche Xrifte is, waar kexrip kep fer uns in lërne, tas meyer hofnung khëne hon torich te ketult un ti koraaj woo ti Xrifte uns kewe. 5Tas Hërkot, woo te ketult un ti koraaj uns kept, aych heleft kuut se leewe ëne mit em anere, Yeesus Kristus sayne payxpiil noo am keen! 6Un soo tas teyer, al mitsamer, wii wën teyer een eensichst persoon weyert, Hërkot un Fater fon unser Hër Yeesus Kristus loope tuut.
Ti kuut naychkheet fer ale foleke
7Also, tuut ëne te anere aan nëme fer Hërkot sayn kloor, soo wii Kristus aych aan kenom hot. 8Wayl, ich saan aych tas Kristus sich in en tiiner fon te yute kemach hot fer se wayse tas Hërkot leaal is, fer se mache tas Hërkot sayn ferxprechunge fer ti patriarke sich in hale teere 9un fer se mache tas ti woo khee yute sin Hërkot loope teere weche sayn kuutheet. Wii ti Hayliche Xrifte saan:
“Tesweche tuun ich tich loope unich tëne woo khee yute sin
un singe loop liiter fer tich.”
10Ti Hayliche Xrifte saan aach:
“Teyer woo khee yute sayt,
frayt aych mit em folek woo Hërkot aus kesuucht hot!”
11Un saan noch:
“Al tii woo khee yute sin, loopt te Hër!
Tas ale foleke iim loope tuun!”
12Un aach Isaiias saat:
“Khomt en nookhomer fom kheenich Dawii, soon fon Yesee;
tee khomt tsum foerxayn fer se kowerneere tii woo khee yute sin,
un tii wëre hofnung an tëm hon.”
13Tas Hërkot, woo uns tii hofnung kept, aych file tuut mit frayt un friite, torich em klaawe woo teyer an tëm het, tas ayer hofnung sich ferkreesere tuut torich ti macht fom Hayliche Kayst!
Phaulus tuut sich taytlich aus xpreche
14Mayn priiter, ich sin sicher tas teyer fol kuute wile sayt, wist ales was neetich is un sayt fërtich fer ëne em anere se lërne. 15Awer, in tëm priif hon ich taytliche wërter penutst fer se mache tas teyer traan tënkt an was teyer xon wist. Ich hon soo kexrip weche em priwilëëj woo Hërkot mich kep hot 16fer Yeesus Kristus sayne tiiner sin fer se xafe fer tii woo khee yute sin. Ich tiine als en priister wën ich te ewankeelium woo fon Hërkot khomt aan saan. Un mache tas tas tii woo khee yute sin en opfer sin khëne woo fon Hërkot aan kenom kewe khëne, fer iim hiin keopfert fom Hayliche Kayst. 17Soo, wayl ich fereenicht sin mit Yeesus Kristus, khan ich mich xtolseere fon te aarwat woo ich mache fer Hërkot. 18Ich kriin koraaj fer se xpreche ploos fon was Kristus torich mich ketuun hot tas tii woo khee yute sin Hërkot aan heere tuun. Un tas is kemach kep torich wërter un aktsioone, 19torich ti macht fon sinaale un wunere un torich ti macht fom Hërkot sayne Kayst. Soo, am reese fon Yerusalëm aan pis ti prowins Iliiria, waar ich fol am aan saan te ewankeelium iwer Kristus. 20Fer net se paue uf funtamënte woo anere keleet hon, hon ich mich imer aan kextrënkt fer te ewankeelium aan saan uf plets woo noch nimant fon Kristus kexproch hat. 21Wii ti Hayliche Xrifte saan:
“Tii woo nii was keheyert hate xpreche iwich tee tuun em siin,
un tii woo net keheyert hate xpreche iwer iim tuun em ferxteen.”
Phaulus sayne plaan fer Room pesuuche
22Tesweche wolt ich aych oft pesuuche khome, awer tas waar mich net meechlich. 23Awer, yets hon ich mayn aarwat hier in te rechioone xon fërtich un wayl ich yoore lang an aych am tënke sin, 24hofe ich tas ich yets aych pesuuche khan. 25Awer, yets keen ich noo Yeruusalëm in te aarwat fer Hërkot sayn folek woo too woone tuut. 26Wayl ti khëriche fon te prowinse fon Masetoonia un Akaya hon fray pextimt en opfer se kewe fer ti layt fon Hërkot sayn folek fon Yeruusalëm woo es neetich hon. 27Ti aychne kriste fon Masetoonia un Akaya hon tas fraywilich kemach; awer, in te woerheet, mise tii tëne layt helfe. Ti yute hon sayn kaystlich raychtum ferteelt mit tëne woo khee yute sin, un tesweche mise tii ti yute helfe mit material raychtum. 28Wan ich tii aarwat fërtich pringe un ti kans opfer ap kewe woo kesamelt kep waar, reese ich noo Spanye un iwer weech pesuuche ich aych. 29Un ich wees tas, wën ich aych pesuuche khome, nëme ich mit mich fiile seechne fon Kristus.
30Ich ferlange, priiter, im naame fon unser Hër Yeesus Kristus un torich em liipe woo te Kayst kept, heleft mich, am peete fer mich mit xtarke klaawe. 31Peet tas ich fray playwe fon te layt fon Yutëya woo net an Kristus klaawe un aach tas te hilef woo ich pis Yeruusalëm hiin nëme tuun kuut aan kenom kept fon Hërkot sayn folek woo too woone tuut. 32Un soo, wën Kot wil, khome ich in Room aan fol frayt un mache aych en pesuuch woo mich naye muut kewe wërt. 33Un tas Hërkot, unser kwel fon friite, say mit aychl! Aamen!
